Bugesera FC igiye gusinyisha rutahizamu ukomoka muri Mali

Yanditswe na Ishimwe Israel
Kuya 11 Ukwakira 2016 saa 02:25
Yasuwe : XX
0

Mu gihe shampiyona y’icyiciro cya mbere mu Rwanda ibura iminsi itatu ngo itangire, Bugesera FC igiye gusinyisha rutahizamu Abudallar Camara ukomoka muri Mali mu rwego rwo kurushaho kwiyubaka no kongerera ubusatirizi bw’ikipe ingufu.

Bugesera FC ni imwe mu makipe yiyubatse cyane igura abakinnyi bakomeye mu Rwanda, barimo ba rutahizamu Bertrand Iradukunda na Bienvenue Mugenzi bavuye muri APR FC, myugariro Mwemere Ngirinshuti wahoze akinira Police FC, na Rucogoza Aimable ‘Mambo’ wavuye muri Gicumbi FC.

Iyi kipe yo mu Ntara y’Uburasirazuba yanasinyishije amasezerano y’umwaka umwe umutoza Mashami Vincent wahoze muri APR FC akanayihesha igikombe cya Shampiyona n’icy’Amahoro ndetse akaba yungirije Jimmy Mulisa mu ikipe y’Igihugu, Amavubi.

Mashami wasimbuye umutoza Ali Bizimungu avuga ko rutahizamu ufite ubunararibonye azafasha mu kwigisha no kuzamura urwego rw’imikinire ku bakiri bato.

Umunyamabanga Mukuru wa Bugesera FC, Silas Mbonimana yatangarije IGIHE ko bahisemo kongera imbaraga mu busatirizi bw’ikipe nyuma yo gusanga abakinnyi ifite badahagije kugira ngo igere ku ntego zayo, kuri ubu ikaba yamaze kumvikana na rutahizamu ukomoka muri Mali, Abudallar Camara.

Yagize ati “Yamaze kugera mu Rwanda ndetse arimo gukorana n’abandi imyitozo ariko dutegereje umuhagarariye mu mategeko ushobora kugera mu Rwanda vuba tukajya twamusinyisha. Ukurikije uko arimo kwitwara biratanga icyizere ko ari umukinnyi mwiza. Uyu mwaka turashaka gushimisha abafana uko byagenda kose kandi tugomba kubikora.”

Uyu rutahizamu aje mu Rwanda asanga mugenzi we bakomoka mu gihugu kimwe, Moussa Camara ukinira Rayon Sports, umaze kwigaragaza guhera mu irushanwa rya AS Kigali yakinnye agatsinda ibitego bitanu ndetse no mu mikino ya gicuti itandukanye yagaragaye muri iyi kipe y’i Nyanza.

Aba bombi biyongera kuri Ismaila Diarra wakiniraga Rayon Sports umwaka ushize akayitsindira ibitego 13 mu mikino yo kwishyura gusa ndetse no mu gikombe cy’Amahoro akarangiza afite ibitego umunani ayoboye abatsinze byinshi kuri ubu akaba yarerekeje muri DCMP yo muri Repubulika Iharanira Demokarasi ya Congo.

Muri uyu mwaka wa shampiyona, Bugesera FC izakoresha ingengo y’imari ya miliyoni 190. Mu mukino wayo wa mbere izatangira yakira Kiyovu Sports ku wa Gatandatu, tariki 15 Ukwakira ku kibuga cya Nyamata.

Bugesera FC igiye gusinyisha, Abudallar Camara ukomoka muri Mali mu rwego rwo kongerera imbaraga ubusatirizi bw’ikipe
Umutoza wa Bugesera FC, Mashami Vincent(uwa kabiri uturutse iburyo) atangaza ko kuzana rutahizamu mwiza bizazamura urwego rw’imikinire ku bakinnyi bakiri bato

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza