00:00:00 IGIHE NETWORK KN KINYARWANDA EN ENGLISH FR FRANCAIS

Brésil vs Argentine: Abakinnyi bane barenze ku mabwiriza yo kwirinda Covid-19 basohowe mu kibuga

Yanditswe na Zigiranyirazo Bajecteur
Kuya 6 Nzeri 2021 saa 09:45
Yasuwe :
0 0

Umukino wahuzaga Ikipe y’Igihugu y’Umupira w’Amaguru ya Brésil n’iya Argentine waraye uhagaritswe mu buryo butunguranye aho byatangajwe ko hari abakinnyi bane ba Argentine barenze ku mabwiriza yo kwirinda icyorezo cya Covid-19 by’umwihariko arebana n’ingendo.

Wari umukino wo guhatanira kuzitabira Igikombe cy’Isi kizabera muri Qatar umwaka utaha aho abashinzwe inzego z’ubuzima muri Brésil binjiye mu kibuga nyuma y’iminota mike umukino utangiye bagatangira gusohora mu kibuga abakinnyi ba Argentine.

Ubusanzwe amabwiriza ajyanye n’ingendo mu gukumira icyorezo cya Covid-19 muri Brésil avuga ko “nta mugenzi wemerewe kwinjira muri icyo gihugu mbere y’iminsi 14 asuye u Bwongereza” ni mu gihe mu bakinnyi ba Argentine harimo bane basanzwe bakina muri Shampiyona y’u Bwongereza.

Abo no Emiliano Martinez na Emiliano Buendia bakinira Aston Villa, Cristian Romero na Giovani Lo Celso bakinira Tottenham Hotspurs.

Abakora mu nzego z’ubuzima muri Brésil biyambaje Polisi kugira ngo babashe kubuza abo bakinnyi kwitabira uwo mukino aho bashinjwa kuba baratanze amakuru atari yo ku kuba baheruka mu Bwongereza mbere y’iminsi 14.

Abakinnyi ntibishimiye uburyo iki cyemezo cyafashwemo by’umwihariko aba Argentine aho Messi yumvikanye mu magambo agira ati “Bakabaye baraduhagaritse mu minsi itatu ishize kuva twagera muri Brésil, kuki bategereje ko umukino utangira kugira ngo babone gukora ibi? Iki ni icyago, ni akumiro.”

Biteganyijwe ko ibizakurikira birebana n’uyu mukino bizamenyekana nyuma ya raporo igomba gutangwa n’umusifuzi ndetse n’abandi bari bayoboye uyu mukino, FIFA ikabona gutangaza ikizakurikiraho.

Ishyirahamwe ry’Umupira w’Amaguru muri Argentine ryavuze ko ibyaraye bibaye bisiga icyasha umupira w’amaguru ku Isi.

Messi na Neymar baganira nyuma y'aho umukino wari umaze guhagarikwa
Abashinzwe inzego z'ubuzima muri Brésil bitabaje Polisi isohora abakinnyi ba Argentine birangira umukino uhagaritswe
Emiliano Martinez ni umwe mu bakinnyi ba Argentine barenze ku mabwiriza yo kwirinda Covid-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .