00:00:00 IGIHE NETWORK KN KINYARWANDA EN ENGLISH FR FRANCAIS

Bizimana Djihad yabonye ikipe nshya mu Bubiligi

Yanditswe na Habimana Sadi
Kuya 28 Gicurasi 2021 saa 03:00
Yasuwe :
0 0

Nyuma yo gutandukana na Waasland-Beveren, Bizimana Djihad yasinye imyaka ibiri mu ikipe ya KMSK Deinze yo mu cyiciro cya kabiri mu Bubiligi.

Mu Cyumweru gishize nibwo Bizimana Djihad yatangaje ko yamaze gutandukana na Waasland-Beveren yamaze kumanuka mu cyiciro cya kabiri mu Bubiligi ndetse anashimira bagenzi be mu gihe cy’imyaka itatu bamaranye.

Kuri uyu wa Gatanu, ikipe ya KMSK Deinze yo mu cyiciro cya kabiri mu Bubiligi yatangaje ko yamaze gusinyisha Bizimana Djihad amasezerano y’imyaka ibiri.

KMSK Deinze ni ikipe yazamutse mu cyiciro cya kabiri nyuma yo kuba iya mbere mu cya gatatu muri 2019-2020.

Nyuma yo gusinya, Bizimana yavuze ko yishimiye kujya mu ikipe imuha umwanya wo gukina.

Ati “Kuri njye ni ngombwa cyane gukina mu ikipe aho bampa amahirwe yo kwerekana ibyo nshoboye gutanga, kandi ndatekereza ko nzabikora mu buryo bwiza kandi natekereza ko KMSK Deinze ari ahantu heza. ”

Umutoza wa KMSK Deinze, Wim De Decker, na we yishimiye uyu mukinnyi mushya w’Umunyarwanda kubera ko yari amaze imyaka itatu akina mu Cyiciro cya Mbere.

Ati “Djihad afite uburambe bw’imyaka myinshi mu Cyiciro cya Mbere cy’Ababiligi, birumvikana ko byongereye agaciro ku ikipe yacu. Afite inyota yo gukina, ni umukinnyi ukora kandi ufite imbaraga, kandi turizera ko azerekana ubushobozi bwe hano.”

Bizimana Djihad w’imyaka 24, yazamukiye muri Etincelles FC yakinnyemo kugeza mu 2014 mbere yo kujya muri Rayon Sports yamazemo umwaka umwe, ahita ajya muri APR FC yakiniye imyaka itatu.

Bizimana Djihad yasinye imyaka ibiri muri KMSK Deinze yo mu cyiciro cya kabiri mu Bubiligi
Bizimana Djihad ntiyatinze gusinyira ikipe nshya nyuma yo gutandukana na Waasland-Beveren yari amazemo imyaka itatu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .