Bizimana wari umaze ibyumweru bigera kuri bibiri akora igeragezwa muri Waasland-Beveren nyuma yo gushimwa n’Umubiligi Sven Vermant uyitoza n’abayobozi bayo yasinyishijwe amasezerano yo kuyikinira mu gihe cy’imyaka itatu.
Waasland-Beveren ikomeje kwiyubaka yasinyije uyu musore ukomoka mu Karere ka Rubavu, ku mugoroba wo kuri uyu wa Kane. Yabaye uwa gatatu isinyishije nyuma y’Umunya- Sénégal Paul Keita na myugariro ukomoka mu Buholandi, Milan Massop.
Mu butumwa iyi kipe imaze imyaka itatu izamutse muri Belgian Pro League, yanditse ku rubuga rwayo, yagize iti “Bizimana Djihad w’imyaka 21 yamaze gusinya amasezerano y’imyaka itatu, ishobora kongerwa ikaba ine.”
Mu gihe cy’igeragezwa, Bizimana yanyuze buri wese muri Waasland-Beveren nkuko ubuyobozi bw’ikipe bwabitangaje ko “Ubushobozi afite bwatunguye buri wese kuva ku bakinnyi bagenzi be, abatoza ndetse n’abayobozi b’ikipe.”
Bizimana yamenyekaniye muri Etincelles y’iwabo i Rubavu, ayivamo ajya muri Rayon Sports mbere yo kubengukwa na APR FC yari amazemo imyaka itatu mbere yo kwerekeza muri Waasland-Beveren.
Igeragezwa yaherukaga gukora nk'uwabigize umwuga ni iryo muri Shampiyona y’Abadage Bundesliga aho atahiriwe mu ikipe ya Fortuna Dusseldorf.
Bizimana amaze gukina imikino 20 mu Ikipe y’Igihugu Amavubi, aho yagaragaje ko ari umwe mu bakinnyi bakomeye mu bo hagati mu kibuga u Rwanda rugenderaho.
Uyu musore ukomoka mu muryango w’abakinnyi b’ibyamamare mu Rwanda, se umubyara yahoze akina umupira muri Marines FC, naho nyina akaba ari mushiki wa Niyonzima Haruna, Sibomana Abdoul na Hakizimana Muhadjili bakinanaga muri APR FC.







Ibitekerezo 0