Bigoranye, Gasogi United yegukanye Shampiyona y’Icyiciro cya Kabiri itsinze Heroes FC (Amafoto)

Yanditswe na Eric Tony Ukurikiyimfura
Kuya 27 Nyakanga 2019 saa 06:58
Yasuwe :
0 0

Nyuma y’imyaka ibiri ikina Icyiciro cya Kabiri, Gasogi United yazamutse mu cya mbere iri ku mwanya wa mbere nyuma yo gutsinda Heroes FC kuri penaliti 4-2 ubwo amakipe yombi yanganyaga igitego 1-1 mu minota isanzwe y’umukino wa nyuma wabereye kuri Stade ya Kigali kuri uyu wa Gatandatu.

Amakipe yombi yiganjemo abakinnyi bakiri bato, yinjiye mu mukino yaramaze kuzamuka mu Cyiciro cya Mbere nyuma yo kwitwara neza mu mikino ya ½ yasojwe ku wa Gatatu.

Guhererekanya neza n’uburyo buke bugana mu izamu ni byo byaranze iminota 45 ibanza y’umukino yarangiye nta gitego cyabonetse.

Dusange Bertin na Niyonkuru Amani baremye uburyo bwashoboraga kuvamo igitego ku ruhande rwa Gasogi United ariko ntibwagira icyo butanga.

Heroes FC ifite abakinnyi bo ku mpande bihuta barimo Uwiduhaye Abubakar na Nyarugabo Moïse yageragezaga kwinjira mu izamu, ikagorwa n’ubwugarizi bwa Gasogi United bwari buhagaze neza.

Habura iminota itanu ngo igice cya mbere kirangire, Butare Henry yahawe umupira mwiza na Dusange Bertin, ari muri metero eshatu, ubwo yarebanaga n’umunyezamu Twagirumukiza Clément, ashatse kumuroba awugarura n’ikiganza, uhita ukurwaho na myugariro we.

Gasogi United yongeye kugaruka mu gice cya kabiri iri hejuru, Kayitaba Bosco na Niyonkuru Jean Luc bagerageza uburyo bw’amashoti yagiye hanze.

Heroes yaremye uburyo bwatanze igitego cyabonetse ku munota wa 64, ku mupira Uwiduhaye Abubakar yacomekeye Nyarugabo Moïse na we aroba umunyezamu Cuzuzo Gaël.

Gasogi United yakoze impinduka zirimo kwinjiza mu kibuga Kapiteni Nkubana Marc, byayisabye gutegereza umunota wa 80, ibona igitego cyo kwishyura cyatsinzwe na Dusange Bertin kuri penaliti itavuzweho rumwe nyuma y’uko umusifuzi Ahishakiye Barthazar avuze ko uyu rutahizamu wa Gasogi United yagushijwe mu rubuga rw’amahina na Kabanda Félix.

Mu minota ya nyuma y’umukino, Cuzuzo Gaël na Twagirumukiza Clément barokoye amakipe yabo, bashyira muri koruneri uburyo bubiri bukomeye bwabonetse ku mpande zombi.

Iminota isanzwe y’umukino yarangiye nta yindi kipe ibonye igitego gikora ikinyuranyo, haterwa penaliti maze Gasogi United itwara igikombe itsinze kuri penaliti 4-2.

Ikipe ya mbere yahawe igikombe na miliyoni eshatu z’amafaranga y’u Rwanda mu gihe iya kabiri yahawe miliyoni 1 Frw.

Etoile de l’Est yabaye iya gatatu nyuma yo gutsinda Sorwathe FC ibitego 3-0 mu mukino wabanjirije uwa nyuma, yahawe ibihumbi 500 Frw.

Gasogi United na Heroes FC ni zo zizakina icyiciro cya mbere mu mwaka utaha w’imikino wa 2019/20, aho zizasimbura Amagaju FC na Kirehe FC zamanutse.

Abakinnyi babanjemo ku ruhande rwa Heroes FC
Abakinnyi ba Gasogi United babanje mu kibuga
Ba kapiteni bombi, Kazindu Bahati Guy wa Gasogi na Dushimimana Olivier wa Heroes FC, bifotozanya n'abasifuzi bayobowe na Ahishakiye
Abasimbura ba Heroes FC
Intebe y'abatoza ba Heroes FC bakuriwe na Nkeshimana Vianney (ubanza iburyo)
Abatoza ba Gasogi United bakuriwe na Lomami Marcel (wa kabiri uturutse ibumoso)
Abasimbura ba Gasogi United
Dushimimana Olivier ashaka uko atambuka kuri Twagirimana Fulgence wa Gasogi United
Uwiduhaye Abubakar yagoye ubwugarizi bwa Gasogi muri uyu mukino
Nyiri Gasogi United, KNC areba uko abakinnyi be bitwara kuri uyu mukino wa nyuma usoza shampiyona y'icyiciro cya kabiri
Perezida wa FERWAFA, Brig Gen Sekamana Jean Damascène, yarebye uyu mukino
Kazindu Bahati Guy ni we wahawe igitambaro nyuma y'uko Nkubana Marc abanje hanze
Umutoza wa Heroes FC atanga amabwiriza ku bakinnyi be
Lomami Marcel yageze aho akuramo ikoti
Mudacumura Jackson wa Heroes FC ni umwe mu bitwaye neza muri uyu mukino
Umunyezamu Twagirumukiza yahanganye na Kapiteni wa Gasogi United, Nkubana Marc ubwo yari amaze kwishyurwa igitego kuri penaliti itavuzweho rumwe
Imanishimwe Patrick akura umupira ku kirenge cya Niyonkuru Jean Luc
Umunyezamu Twagirumukiza ntiyabashije gukuramo penaliti zatewe na Gasogi United
Heroes FC yatsindiwe kuri penaliti, abakinnyi bahita baryama hasi bagaragaza gucika intege
Abakinnyi ba Gasogi United bazamuye umuyobozi wabo mu kirere ubwo bari bamaze gutsinda kuri penaliti, bakegukana igikombe
Igikombe amakipe yombi yahataniraga mbere yo kuzamuka mu cyiciro cya mbere
Amakipe yageze ku mukino wa nyuma yambitswe imidali
Kapiteni wa Heroes FC ashyikirizwa sheki ya miliyoni imwe n'igice nyuma y'uko ikipe ye ibaye iya kabiri
Umuyobozi wa Gasogi United, KNC ateruye igikombe, aho yacyishimiraga hamwe n'abakinnyi be
Gasogi United yari imaze imyaka ibiri mu cyiciro cya kabiri

Amafoto: Usanase Anitha


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza