Barcelona yanyagiye Real Madrid, isunikira Lopetegui mu muryango usohoka (Amafoto)

Yanditswe na IGIHE
Kuya 28 Ukwakira 2018 saa 11:43
Yasuwe :
0 0

Ikipe ya FC Barcelona yanyagiye Real Madrid ibitego 5-1 muri Shampiyona ya Espagne ‘La Liga’, umutoza Julen Lopetegui akomeza kujya mu mazi abira ko ashobora kwirukanwa.

Ni umukino wahuje amakipe yombi adafite abakinnyi bakomeye bagarukwaho cyane iyo yahuye, byaherukaga mu 2007. Lionel Messi wavunitse yarebeye umukino muri Stade ya Camp Nou mu gihe Cristiano Ronaldo we yerekeje muri Juventus de Turin yo mu Butaliyani.

Umunya-Brazil, Philippe Coutinho ni we wafunguriye Barcelona amazamu mu gice cya mbere ku munota wa 11.

Real Madrid itozwa na Lopetegui yakomeje kotswa igitutu, inakora amakosa yavuyemo penaliti yinjijwe neza na rutahizamu, Luis Suarez.

Uyu Munya-Uruguay yatsinze ibitego bitatu (30, 75, 83) ahita yuzuza icyenda mu mikino ya El Classico.

Marcelo Vieira yagerageje kugarura ikipe ye mu mukino atsinda igitego ku munota wa 50 ari nacyo yatahiye.

Igitego cya nyuma cya Barcelona cyatsinzwe na Arturo Vidal ku munota wa 87. Ni intsinzi ikomeye ibonye kuva mu 2010 ubwo iyi kipe yatozwaga na Pep Guardiola yanyagiye Real Madrid yari ifitwe na José Mourinho ibitego 5-1.

Barcelona iri ku mwanya wa Mbere muri La Liga irarusha Real Madrid iri ku wa Cyenda amanota arindwi.

Real Madrid imaze gutsindwa inshuro eshatu zikurikirana, ni ubwa mbere igize intangiriro mbi muri Shampiyona kuva mu myaka 19 ishize.

Ni ikimenyetso ko ibihe by’Umutoza Lopetegui bigana ku musozo. Mu bashobora kumusimbura havugwamo Umutaliyani, Antonio Conte wahoze atoza Chelsea Fc.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza