Kwamamaza

Ishyamba si ryeru muri Rayon Sports, bamwe mu bakinnyi banze gukora imyitozo

Yanditswe kuya 19-10-2016 saa 14:27' na IGIHE


Nyuma y’umukino umwe gusa wa shampiyona, muri Rayon Sports hongeye kuvugwamo ibibazo byo kudahemba abakinnyi byatumye zimwe mu nkingi za mwamba z’iyi kipe nka kapiteni Ndayishimiye Eric Bakame, Mugheni Fabrice, Kwizera Pierrot, Manzi Thierry, Senyange Ivan na Manishimwe Djabel badakora imyitozo yo kuri uyu wa gatatu.

Rayon Sports ku mukino ufungura shampiyona y’u Rwanda ya 2016/2017 yitwaye neza kuri Stade ya Kigali, inyagira Police FC ibitego bitatu ku busa bya Kwizera Pierrot na Nahimana Shassir.

Gukomeza kwitwara neza kw’iyi kipe igomba kwerekeza i Rusizi mu mpera z’iki cyumweru gukina na Espoir FC, bishobora kubangamirwa n’ibibazo byo kudahemba abakinnyi byongeye kuyigaragaramo ndetse bituma abakinnyi bamwe na bamwe basanzwe bakomeye batitabira imyitozo y’uyu munsi yabereye kuri Stade Mumena.

Ubwo umunyamakuru wa IGIHE yageraga kuri iki kibuga saa tatu za mu gitondo, yasanze imyitozo iri gukorwa n’abakinnyi basanzwe babanza ku ntebe y’abasimbura na bake mu babanza mu kibuga nka Nshuti Dominique Xavio, Nahimana Shasiir na Sefu.

Umunyamakuru yagerageje kuvugana na Perezida wa Rayon Sports, Gacinya Denis, ku bibazo bivugwa muri iyi kipe ariko aryumaho yanga kugira icyo avuga.

Bamwe mu bakinnyi batifuje ko amazina yabo atangazwa, batubwiye ko batarahembwa ukwezi gushize kwiyongera ku yandi atatu y’umwaka ushize.

Umwe muri bo yagize ati “Ukwezi gushize ntituraguhembwa ndetse ku basanzwe haracyari n’ibirarane by’amezi atatu y’ubushize. Nkeka ko icyatumye abakinnyi bamwe bataza mu myitozo ari uko batubeshye, ubundi umunsi wa myuma bari baduhaye yari ku wa Mbere washize ariko nta kintu twabonye.”

Muri iyi myitozo kandi habaye ibiganiro byahuje abayobozi b’iyi kipe barimo Gacinya Denis, Umwungirije Martin Rutagambwa, Umutoza Masudi Djuma n’abakinnyi, byafashe umwanya munini birangira Masudi atishimye ndetse yanze no kuvugisha n’itangazamakuru, ibintu ubundi bidasanzwe.

Muri aba bayobozi bari ku kibuga, uwemeye kuvugana n’itangazamakuru ni Martin Rutagambwa, wavuze ko akigera ku kibuga agasanga abakinnyi benshi badahari yabwiwe ko bafite ibibazo bisanzwe ariyo mpamvu batakoze imyitozo kimwe n’abandi.

Ati “Kapiteni (Bakame) afite ikibazo mu ivi, Pierrot we ngo yaraye ariye ibintu bimumerera nabi niko umuganga amaze kumbwira. Nta kibazo cy’ibirarane kiri muri Rayon Sports. Nihagira umukinnyi umwe muri Rayon Sports ukubwira ko afitiwe ibirarane uzaze nyaguhe uyamunshyirire, ayo batarabona ni ay’uku kwezi ariko na byo biri gukorwa muri banki birakemuka.”

Aba bakinnyi batakoze imyitozo bariyongera kuri rutahizamu Moussa Camara wagize imvune mu mukino wa gishuti na AS Kigali, ushobora no kutazagaragara ku mukino wa Espoir FC kuko nawe atagaragaye ku kibuga uyu munsi.

Rayon Sports uretse umushinga wo gushishikariza abakunzi bayo kwiyandikisha bakoresheje kode ya *699# kugira ngo batere inkunga ikipe yabo, ubu iri no mu biganiro na Ivan Jacky Minnaert wahoze ayitoza kugira ngo ayigarukemo nk’ushinzwe kuyishakira amasoko byose bigamije kuva mu bibazo by’ubukene imazemo imyaka n’imyaka.

Imyitozo yo kuri uyu wa gatatu yakozwe n'abakinnyi biganjemo abasimbura
Abakinnyi bake mu babanza mu kibuga nibo bitabiriye imyitozo, barimo Shassir (ibumoso)
Abafana bari bageze ku kibuga kureba imyitozo y'ikipe yabo
Manishimwe Djabel (wakoze mu mufuka w'ipantaro) ari mu bakinnyi batakoze imyitozo
Abayobozi, umutoza n'abakinnyi bakoranye inama ku kibuga
Rutagambwa yemeje ko nta kibazo cy'ibirarane by'mishahara kiri muri Rayon Sports

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 3 Ukuboza 2016
Copyright © 2009 -2014 - IGIHE Ltd - All Rights Reserved