00:00:00 IGIHE NETWORK KN KINYARWANDA EN ENGLISH FR FRANCAIS

Ba ’Kanyamayayi’ barifuza guhagararirwa muri FERWAFA

Yanditswe na Bukuru JC
Kuya 29 Ukwakira 2021 saa 07:27
Yasuwe :
0 0

Abashinzwe ibikoresho mu makipe y’umupira w’amaguru mu Rwanda bashinze ishyirahamwe rizabafasha guteza imbere akazi kabo ndetse barifuza kuba umwe mu banyamuryango ba FERWAFA.

Nk’uko bavuga ngo abishyize hamwe nta kibananira, ni ho Tuyisenge Eric ’Cantona’ yakuye igitekerezo cyo gushinga Ishyirahamwe ry’Abacunga Ibikoresho by’Amakipe bazwi nka ba Kanyamayayi cyangwa "Kit-Managers" mu ndimi z’amahanga.

Mu Rwanda si benshi baha agaciro akazi ko gushingwa ibikoresho by’amakipe akina umupira w’amaguru nyamara gatunze imiryango myinshi.

Tuyisenge Eric ’Cantona’ aganira na IGIHE yemeje ko yatangije Ishyirahamwe rya ba Kanyamayayi bose bakorera mu Rwanda mu rwego rwo kwiteza imbere.

Ati “Ni byo natangije Ishyirahamwe rya ba Kit-Managers. Icyo tugamije ni ukwiteza imbere natwe tukagira aho tubarizwa.”

Yakomeje agira ati “Nasanze nta gaciro tugira. Umuntu ukora uwo mwuga afatwa uko atari, akirukanwa uko ashaka ntaho abariza. Ariko ubu bigomba guhinduka, akagira aho abariza uburenganzira bwe.”

Tuyisenge yavuze kandi ko intego y’iri Shyirahamwe ari ukwiteza imbere, bakajya bifatanya muri byose, mu bibi no mu byiza bakaba bari kumwe, ariko kandi bakabikora kinyamwuga.

Ati “Intego ni ukwiteza imbere, tukaba twazajya dufashanya mu birori, mu byago byose nk’abanyamwuga.”

Yakomeje avuga ko kwishyira hamwe kwa bo bizatuma bakomeza kubungabunga inyungu za bo zirimo nko kuba bahabwa amahugurwa ajyanye n’aka kazi n’ibindi.

Yongeyeho ko ubu bamaze gushyiraho urubuga rwa WhatsApp ruzajya rubahuza, kugira ngo bahanahane amakuru aberekeyeho kandi bateganya kuzasaba kuba abanyamuryango ba FERWAFA.

Yagize ati "Mu gihe tuzaba tumaze kubona ubuzima gatozi tuzasaba kuba abanyamuryango ba FERWAFA."

Abatangije iri shyirahamwe bagera kuri 15 ariko ikigamijwe ni ukongera uyu mubare. Igisabwa kugira ngo ube umwe muri bo, ni ukuba ukunda uyu mwuga kandi unafite ikipe ukoramo akazi.

Abari muri iri shyirahamwe basabye FERWAFA ko yabashakira amahugurwa yo hanze y’u Rwanda mu rwego rwo kwagura ubumenyi bakarushaho gukora aka kazi kinyamwuga.

Bamwe mu bamaze kumenyekana bamaze kwihuriza hamwe ni Tuyisenge Eric ’Cantona’ ushinzwe Ibikoresho mu Ikipe z’Igihugu z’Ingimbi; Baziki Pierre na Munyaneza Jacques uzwi nka Rujugiro bashinzwe ibikoresho by’Ikipe y’Igihugu "Amavubi", Hakizimfura Ayubu ushinzwe Ibikoresho muri AS Kigali FC na Uwase Ange ushinzwe Ibikoresho mu Ikipe y’Igihugu y’Abagore Nkuru n’iz’Abangavu.

Tuyisenge Eric 'Cantona' amaze imyaka myinshi ashinzwe ibikoresho mu Ikipe z'Igihugu z'Abato
Tuyisenge yavuze ko ishyirahamwe bashinze rizabafasha guhesha akazi kabo agaciro
Uwase Ange ushinzwe ibikoresho mu Ikipe y'Igihugu y'Abagore
Hakizimfura Ayubu ushinzwe Ibikoresho muri AS Kigali. Aha yari kumwe n'Umutoza Mukuru w'iyi kipe y'Abanyamujyi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .