AS Muhanga yateguje abakozi bayo gusubikirwa amasezerano

Yanditswe na Eric Tony Ukurikiyimfura
Kuya 20 Mutarama 2021 saa 06:04
Yasuwe :
0 0

Ubuyobozi bwa AS Muhanga bwamenyesheje abakozi bayo ko bushobora gusubika amasezerano guhera muri Gashyantare 2021 mu gihe imyitozo yaba itaratangira.

Kuwa 12 Ukuboza 2020 nibwo Minisiteri ya Siporo yafashe icyemezo cyo guhagarika Shampiyona yari igeze ku munsi wayo wa gatatu kubera ko hari amakipe amwe yagaragayemo ubwandu bwa COVID-19, abakinnyi bose basabwa gusubira mu miryango yabo.

Nk’uko bigaragara mu ibaruwa ubuyobozi bwa AS Muhanga bwandikiye abakozi bayo, iyi kipe ishobora gusubika amasezerano guhera tariki ya 1 Gashyantare kubera amikoro make.

Bwagize buti “Bushingiye ku cyemezo cya Minisiteri ya Siporo, imyanzuro y’Inama y’Abaminisitiri, amikoro make ya AS Muhanga no kuba ibikorwa by’ikipe byarahagaze tariki ya 11 Ukuboza 2021, buramenyesha abakozi bayo bose ko kubera impamvu zavuzwe hejuru, hazahembwa kimwe cya kabiri cy’umushahara w’ukwezi kwa mbere umwaka wa 2021.”

“Burabamenyesha kandi ko mu gihe ibikorwa bya siporo byaba bidasubukuwe guhera ku itariki ya 1 Gashyantare 2021, amasezerano AS Muhanga yari ifitanye n’abakozi bayo azaba asubitswe by’agateganyo kugeza igihe imyitozo izasubukurirwa.”

Kugeza ubu ntibiramenyekana igihe imikino ishobora gusubukurwa nubwo hari amakuru y’uko byaba mu matariki ya nyuma gato y’irushanwa rya CHAN riri kubera muri Cameroun kugeza tariki ya 7 Gashyantare 2021.

Ku wa 24 Ukuboza 2020, Komite Nyobozi ya FERWAFA yagiranye inama n’abayobozi b’amakipe y’Icyiciro cya Mbere, bungurana ibitekerezo ku cyakorwa kugira ngo Shampiyona yongere gukomorerwa.

FERWAFA iherutse gutangaza ko yamaze gushyiraho amabwiriza azakurikizwa, ariko azabanza kwemezwa na Minisiteri ya Siporo n’izindi nzego zirimo iz’ubuzima mbere y’uko Shampiyona yemererwa gukomeza.

Kiyovu Sports ni indi kipe iherutse gutangaza ko yahagaritse amasezerano y’abakozi bayo guhera ku wa 15 Mutarama 2021.

AS Muhanga ishobora gusubika amasezerano y'abakozi bayo mu gihe byagera ku wa 1 Gashyantare batarasubira mu kazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .