00:00:00 IGIHE NETWORK KN KINYARWANDA EN ENGLISH FR FRANCAIS

AS Kigali yatsinzwe urubanza yaregwagamo na Gakwaya Harufane Djuma

Yanditswe na Habimana Sadi
Kuya 1 Nyakanga 2021 saa 10:57
Yasuwe :
0 0

Ubuyobozi bwa AS Kigali bwatsinzwe urubanza bwarezwemo na Gakwaya Harufane Djuma wari umukozi w’iyi kipe ariko akirukanwa mu buryo bunyuranyije n’amategeko.

Uru rubanza rwaburanishirijwe mu Rukiko Rwisumbuye rwa Nyarugenge. AS Kigali yaburanye abayobozi bayo badahari ariko hari umunyamategeko wayo, Me Sangano Yves.

Ni urubanza rwatangiye mu 2020, ubwo Gakwaya Harufane Djuma afatanyije n’uwamwunganiraga mu mategeko, yatanze ikirego mu Rukiko Rwisumbuye rwa Nyarugenge arega AS Kigali ko yamwirukanye mu buryo bunyuranyije n’amategeko kandi yari umukozi ufite amasezerano yanditse.

Ku wa 29 Kamena 2021, ni bwo urukiko rwanzuye ko AS Kigali yatsinzwe uru rubanza ndetse igomba kwishyura Gakwaya 1.870.000 Frw.

Tariki ya 16 Ukwakira 2018 ni bwo Gakwaya yagiranye amasezerano na AS Kigali ariko ku wa 25 Gashyantare 2019 asezererwa nta nteguza ahawe.

Nyuma yo gusezererwa bitunguranye, Gakwaya yandikiye Ubuyobozi bwa AS Kigali yishyuza imyenda yose yari aberewemo ndetse asaba n’indishyi z’uko yirukanywe binyuranyije n’amategeko, ariko ntiyasubizwa.

-  Gakwaya yareze AS Kigali mu nkiko

Tariki ya 13 Werurwe 2019, Gakwaya yagerageje gushaka ko ikibazo cyakemuka neza biciye mu bwumvikane, yandikira AS Kigali ariko nta gisubizo yahawe. Iyi nzira imaze kunanirana ni bwo yayobotse iy’amategeko.

Gakwaya yagiranye amasezerano na AS Kigali y’akazi ku wa 16 Ukwakira 2018 k’umushahara w’ibihumbi 250 Frw buri kwezi.

Ikipe yari yamwemereye ko kuri buri mukino yitabiriye izajya imuha amafaranga y’ingendo n’ay’itumanaho angana n’ibihumbi 20 Frw ku mikino yakiniye i Kigali na 40.000 Frw ku yabereye hanze y’igihugu.

Avuga ko yaje kwirukanwa abwiwe ko nta mikoro ikipe ifite ariko we ahamya ko atari ko byari bimeze.

Mu 2020 ni bwo Gakwaya yatanze ikirego aregamo AS Kigali nk’uwari umukoresha we. AS Kigali yaburanye yunganiwe na Me Sangano Yves mu gihe Gakwaya we yunganiwe na Me Rutayisire Ildephonse.

Gakwaya n’umwunganizi we basabye umushahara w’iminsi 15 yo muri Gashyantare 2019, ungana na 125.000 Frw, ibihumbi 400 Frw y’ingendo n’itumanaho ariko batahawe aya mafaranga kandi Gakwaya yari ayemerewe n’amategeko.

Muri uru rubanza kandi yavuze ko ubwo yirukanwaga mu kazi, mu ibaruwa yabwiwe ko yirukanywe ku mpamvu z’ubukungu akavuga ko hatubahirijwe ibiteganywa mu ngingo ya 21 y’itegeko N° 66/2018 ryo ku wa 30/08/2018 rigenga umurimo mu Rwanda.

Yasobanuriye Urukiko ko ivuga ko iyo umuntu yirukanywe ku mpamvu z’ubukungu, bimenyeshwa abakozi, bagasezererwa hakurikijwe uburambe mu kazi, ubushobozi n’ibindi. Ibyo byose Gakwaya avuga bitubahirije amategeko.

AS Kigali na yo yemera ko iseswa ry’amasezerano ryashingiye ku bibazo by’ubukungu kandi mbere yo gusesa amasezerano umukozi yahawe integuza y’iminsi 15 nkuko bigaragara mu ibaruwa isesa amasezerano.

Gakwaya yasabye Urukiko gutegeka AS Kigali kwishyura urega igihembo cy’umwavoka cya 800.000 Frw n’andi mafaranga y’ikurikiranarubanza angana n’ibihumbi 200 Frw.

Uburanira AS Kigali FC avuga ko nkuko ibaruwa imusezerera ku kazi ibigaragaza, Gakwaya yahagaritswe ku mpamvu z’ubukungu bwa AS Kigali, byatumye habaho kugabanya imirimo, bituma umwanya we ukurwa ku myanya y’imirimo y’ikipe.

Nubwo kandi atari yujuje igihe cy’amezi 12, itegeko ry’umurimo ibyo riteganya mu ngingo ya 31 yabihawe kuko yahawe imperekeza y’umushahara w’amezi abiri angana n’ibihumbi 500 Frw.

Mu iburanisha, Umunyamategeko w’iyi kipe y’Umujyi wa Kigali yakomeje avuga ko ibaruwa imenyesha Gakwaya ko amasezerano yahagaze, ku wa 15 Gashyantare 2019 yayihawe kandi ko ibyo amategeko amuteganyiriza byose yagombaga kubishaka akabishyira muri system.

Akomeza asobanura ko AS Kigali yahuye n’ibibazo by’ubukungu, ikaba isezerera abakozi iyo amasezerano y’akazi arangiye, ikaba itari gukomezanya nayo amasezerano kandi nta wundi bari bahuje umurimo mu ikipe, bitewe n’ibyo bibazo by’ubukungu akaba yarahawe ibyo amategeko amugenera. Yahawe umushahara nyuma aza gusaba uburenganzira bwe [reclamation] ni bwo bamuhaga sheki ya 500.000 Frw y’umushahara w’amezi abiri. Nyuma yo kurega nta kindi kintu yahawe.

Ku bijyanye n’integuza, AS Kigali yireguye ivuga ko yahaye Gakwaya integuza y’iminsi 15, bikaba bigaragara mu ibarurwa imusezerara. Imperekeza AS Kigali ivuga ko Gakwaya yishyuwe imishahara ye yose kugeza umunsi wa nyuma w’akazi ke karangiye.

Mu gihe yari amaze gukora yishyuwe 992.000 Frw ndetse anyuzwa kuri Konti ye muri Equity Bank. Ayo mafaranga Gakwaya yayahawe ku wa 21 Nzeri 2019. Ndetse ngo yaje guhabwa imperekeza ku wa 18 Werurwe 2020 zihwanye na 500.000 Frw.

Me Sangano Yves wunganira AS Kigali yavuze ko nta kirarane na kimwe ikipe ye ibereyemo uwari umukozi wayo.

AS Kigali yavuze ko Gakwaya nta mirimo yindi yigeze akorera iyi kipe nyuma yo kumusezerera ku kazi. Yavuze ko itegeko ryamuteganyirizaga imishahara y’amezi abiri kandi ngo yarayihawe.

Me Sangano Yves yakomeje avuga Gakwaya atigeze agaragaza icyo kubura icyangombwa cy’umurimo byamwangijeho ndetse yakoze amezi ane ariko asabwa gutanga nimero ya RSSB ariko ntiyabikora.

Nyuma yo kumva impande zombi, Urukiko rwanzuye ko AS Kigali yasezereye Gakwaya ku kazi mu buryo bunyuranyije n’amategeko, ikaba igomba kubimuhera indishyi zingana n’inshuro eshatu z’umushahara we nkuko biteganywa mu ngingo ya 30 y’Itegeko rigenga umurimo mu Rwanda, riteganya ko iseswa ryose ry’amasezerano y’akazi rinyuranyije n’amategeko rishobora gutuma hatangwa indishyi z’akababaro.

Itegeko riteganya ko indishyi z’akababaro zihabwa umukozi wirukanywe binyuranyije n’amategeko ntizishobora kujya munsi y’umushahara w’amezi atatu ariko kandi ntizishobora kurenza amezi atandatu. Bisobanuye ko 250.000 Frw agaragara mu masezerano nk’umushahara uhoraho wa Gakwaya ugomba kwikuba inshuro eshatu ukaba 750.000 Frw.

AS Kigali kandi yanaciwe indishyi zingana n’ibihumbi 250 Frw. Rwaje kwanzura ko AS Kigali FC igomba guha Gakwaya indishyi zo kwirukanwa binyuranije n’amategeko, integuza n’icyemezo cy’umukoresha zingana na miliyoni 1 n’ibihumbi 250 Frw.

Ikindi ni uko Gakwaya agomba guhabwa 600.000 Frw y’igihembo cy’avoka n’ikurikiranarubanza cyo kimwe na 20.000 Frw yatanzeho ingwate y’igarama. Bisobanuye ko AS Kigali FC igomba kwishyura Gakwaya miliyoni 1 n’ibihumbi 870 Frw.

Gakwaya Harufane Djuma yareze AS Kigali FC ayishinja ko yamwirukanye mu buryo bunyuranyije n’amategeko
Ubuyobozi bwa AS Kigali FC bwatsinzwe urubanza bwaregwagamo na Gakwaya Harufane Djuma

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .