Kwamamaza

AS Kigali mu ihurizo ryo gukemura ikibazo cy’abakinnyi bamaze amezi abiri badahembwa

Yanditswe kuya 28-09-2016 saa 07:27' na Manzi Rema Jules


Umwuka si mwiza muri AS Kigali imaze amezi abiri idahemba abakinnyi byanatumye bamwe mu basanzwe mu ikipe bahagarika imyitozo ndetse n’abashya bagataka ko batarahabwa amafaranga baguzwe.

Ibibazo by’imishahara muri iyi kipe idakunze kuvugwamo amikoro make bitangajwe habura iminsi 18 ngo shampiyona y’umwaka utaha itangire.

Iyi kipe y’Abanyamujyi iherutse gutegura irushanwa ribanziriza shampiyona ryitabiriwe n’amakipe yo mu Rwanda na Congo Kinshasa rigatwara arenga miliyoni 100 z’amafaranga y’u Rwanda. Kuri ubu abakinnyi bayo bananiwe kwihanganira amezi abiri bamaze badahabwa umushahara, bamwe bahitamo guhagarika imyitozo, abandi bakomeza gushinyiriza.

Muri iri rushanwa, yahise isezererwa itarenze umutaru itsinzwe imikino ibiri, uwa APR FC na AS Vita Club, inganya na Dauphin Noirs.

Umwe mu bakinnnyi bashya baguzwe n’iyi kipe yabwiye IGIHE ko kuva yayigeramo yategereje ko ahabwa amafaranga yari yemerewe yaba umushahara ndetse n’ayo kumugura ariko amaso akaba aheze mu kirere.

Ati “Nta mafaranga baduhaye kugeza ubu. Baratubwira ngo twihangane bizakemuka vuba ariko ntiwamenya ari ryari. Njye bansabye kwihangana iki cyumweru, ndategereje ariko nibatampemba nanjye ntaho nzasubira. Si amafaranga babuze ahubwo bayakoresha ibindi bakirengagiza ibyacu.”

Umunyamabanga wa AS Kigali, Nshimiye Joseph, yatangaje ko ibyo abo bakinnyi bita ibirarane atari byo kuko iryo jambo ryagakoreshejwe ari uko umukinnyi amaze nk’amezi atatu cyangwa arenga adahembwa.

Ati “Muri AS Kigali nta birarane dufite, niba abakinnyi bamaze ukwezi kumwe cyangwa abiri, nta gikuba cyacitse kandi turimo kubikoraho vuba birakemuka. N’abatarabona amafaranga yo kubagura ni kimwe byose turimo kubyigaho.”

Ku kijyanye n’abakinnyi batari kugaragara ku myitozo, Nshimiye yavuze ko abadahari ari abasabye impushya n’abarwaye kugeza ubu nta makuru afite y’ababa baravuye mu myitozo kubera kudahembwa.

AS Kigali yateguye imikino ibiri ya gishuti harimo uwo igomba kwisobanura na Bugesera FC kuri uyu wa Kane kuri Stade ya Kigali ndetse no kuwaGatandatu ikazakina na Police FC. Nyuma y’iyi mikino nibwo izahita itanga urutonde ndakuka rw’abakinnyi izakoresha umwaka utaha w’imikino muri Ferwafa.

AS Kigali yarangije ku mwanya wa Kane muri Shampiyona y’umwaka ushize, yaguze abakinnyi barindwi barimo Nshutiyamagara Ismail ‘Kodo’, Ndoli Jean Claude, Ntamuhanga Tumaine Tity, Ndahinduka Michel “Bugesera” na Mubumbyi Bernabé bavuye muri APR FC, Nkomezi Alexis wavuye muri Sunrise FC na Tubane James wavuye muri Rayon Sports.

AS Kigali yariyubatse izana abakinnyi bakomeye barimo Kodo (ibumoso) na Tubane James (iburyo)

>

Murengezi Rodrigue (ufite umupira) mu myitozo itegura shampiyona
Umuzamu Ndoli Jean Claude, wasinyiye AS Kigali avuye muri APR FC
Eric Nshimiyimana n'abatoza bafatanya barimo kureba uko abakinnyi bahagaze mbere yo gutangira imikino ya gishuti

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved