Arsenal yasinyishije Ødegaard wa Real Madrid

Yanditswe na Eric Tony Ukurikiyimfura
Kuya 27 Mutarama 2021 saa 03:19
Yasuwe :
0 0

Arsenal yo mu Cyiciro cya Mbere mu Bwongereza, yasinyishije umukinnyi wo hagati usatira izamu, Martin Ødegaard, ku ntizanyo y’amezi atandatu, avuye muri Real Madrid.

Umunya-Norvège Ødegaard w’imyaka 22, yagowe no kubona umwanya mu ikipe y’umutoza Zinedine Zidane muri uyu mwaka w’imikino.

Real Sociedad yari yaratijwemo mu mwaka ushize w’imikino, na Ajax yo mu Cyiciro cya Mbere mu Buholandi, ni andi makipe yifuzaga kumutizwa.

Umutoza wa Arsenal yavuze ko Ødegaard ari umukinnyi mwiza ukiri muto kandi bizeye ko azabafasha mu busatirizi.

Ati “Martin ni umukinnyi tuzi neza. Nubwo akiri muto, amaze igihe akina ku rwego rwo hejuru. Azadufasha mu busatirizi.”

Uyu musore usanzwe ahamagarwa mu ikipe y’Igihugu ya Norvège, ashobora kwifashishwa ku wa Gatandatu ku mukino Arsenal izakiramo Manchester United.

Umuyobozi wa Tekinike muri Arsenal, Edu, yavuze ko bazanye ‘impano yihariye’.

Inzobere mu mupira w’amaguru wa Espagne, Guillem Balague, yavuze ko Real Madrid yabujije Ødegaard gusubira muri Real Sociedad kuko bashakaga ko ajya mu ikipe yo muri Premier League.

Martin Ødegaard yerekeje muri Arsenal nyuma y’iminsi mike Mesut Özil agiye muri Fenerbahçe yo muri Turukiya.

Ødegaard yageze muri Real Madrid avuye muri Stromsgodset muri Mutarama 2015 ndetse yakiniye Real imikino icyenda muri uyu mwaka w’imikino.

Nyuma yo gusubira i Bernabéu mu mpeshyi avuye mu ntizanyo yarimo muri Sociedad, byari byitezwe ko aba umukinnyi ngenderwaho mu ikipe ya Zidane wamutoje mu ikipe ya kabiri mbere yo guhabwa ikipe nkuru.

Gusa, nyuma yo kubanza mu kibuga mu mikino ibiri ya La Liga, yakinnye undi mukino umwe kuva ku wa 21 Ugushyingo 2020.

Martin Ødegaard yahawe ikaze muri Arsenal
Arsenal yasinyishije Martin Ødegaard ku masezerano azarangirana n'uyu mwaka w'imikino
Ødegaard azajya yambara nimero 11
Umutoza wa Arsenal, Mikel Arteta, yavuze ko Martin Ødegaard azabafasha cyane mu busatirizi
Martin Ødegaard yakiniraga Real Madrid, ariko yabuze umwanya wo kubanza mu kibuga
Real Madrid yanze ko Ødegaard yongera gutizwa muri Real Sociedad

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .