00:00:00 IGIHE NETWORK KN KINYARWANDA EN ENGLISH FR FRANCAIS

Arsenal yandikishije amateka mabi nyuma yo gutsindwa na Chelsea (Amafoto)

Yanditswe na Bukuru JC
Kuya 22 Kanama 2021 saa 11:18
Yasuwe :
0 0

Arsenal yatsinzwe na Chelsea ibitego 2-0 mu mukino w’umunsi wa kabiri wa Shampiyona y’Icyiciro cya Mbere mu Bwongereza (Premier League) wabaye kuri iki Cyumweru, yandikisha amateka mabi dore ko ari ubwa mbere itsinzwe imikino ibiri ibanza kandi na bwo itinjijemo igitego mu myaka 117.

Arsenal yari yatangiye Shampiyona itsindwa na Brentford ibitego 2-0 mu wundi mukino uhuza amakipe y’i Londres.

Kuri iki Cyumweru, yari yongeye gukinira mu rugo, yakirira Chelsea imbere y’abafana batari bake bari kuri Emirates Stadium nyuma y’amezi 18 yari ashize batahagera kubera ingamba zo kwirinda icyorezo cya COVID-19 cyibasiye Isi.

Abafana bagerageje kuba inyuma y’iyi kipe yabo, mu majwi atandukanye bamwe bavugira hejuru bati “Ihute Nico” nubwo ntacyo byahinduye ku mukino wa Chelsea yari hejuru.

Arsenal yashoboraga gufungura amazamu hakiri kare, ku mupira Bukayo Saka yahaye Emile Smith Rowe, ariko uyu wa nyuma atereye ishoti muri metero nka 25, risubizwa inyuma n’umunyezamu wa Chelsea, Edouard Mendy.

Chelsea yafunguye amazamu ku munota wa 15 ku gitego cyatsinzwe na Romelu Lukaku nyuma y’umupira wahinduwe na Reece James, uca ku munyezamu Bernd Leno mbere y’uko Lukaku awukoraho gato ukajya mu nshundura.

James yatsinze igitego cya kabiri cya Chelsea ku munota wa 35 ku mupira yahawe na Mason Mount mu gihe Lukaku yashoboraga gutsinda icya gatatu, umupira yateye n’umutwe ukorwaho na Leno, ukubita umutambiko w’izamu.

Arsenal yari idafite myugariro Ben White wanduye COVID-19, kuri ubu imaze gutsindwa imikino ibiri ya Premier League ihuyemo n’amakipe y’i Londres mu gihe umwaka ushize w’imikino wose warangiye itakaje ibiri gusa.

Ni ku nshuro ya mbere iyi kipe itsinzwe imikino ibiri ibanza, nta gitego yinjiza, mu myaka 117 imaze ikina shampiyona (mu byiciro bine bya mbere mu Bwongereza) kugeza uyu munsi.

Yakabaye yagarutse mu mukino iyo hatangwa penaliti ubwo Bukayo Saka yagwaga mu rubuga rw’amahina agushijwe na Reece James, ariko ikoranabuhanga ry’amashusho [VAR] rikaba ryashimangiye icyemezo cy’umusifuzi. Ubundi buryo bwari kuyifasha ni umupira w’umutwe watewe na Rob Holding mu gice cya kabiri, ariko ujya hejuru y’izamu.

Arsenal itorohewe n’imvune n’uburwayi bwa COVID-19, izasubira mu kibuga ku wa Gatatu ubwo izaba ikina na West Brom muri EFL Cup mbere yo guhura na Manchester City ku Cyumweru gitaha muri Shampiyona.

Chelsea, yo izahura na Liverpool ku wa Gatandatu, na yo ifite amanota atandatu nyuma yo gutsinda Burnley ibitego 2-0.

Mu yindi mikino yabaye mu mpera z’iki cyumweru, Manchester United yanganyije na Southampton igitego 1-1, Tottenham itsinda Wolves igitego 1-0 mu gihe Manchester City yanyagiye Norwich City ibitego 5-0.

Romelu Lukaku yatsinze igitego cye cya mbere muri Chelsea nyuma yo kuyigarukamo avuye muri Inter Milan
Lukaku yishimira igitego cyafashije Chelsea kuyobora umukino hakiri kare
Reece James yatsinze igitego cya kabiri ku mupira yahawe na Mason Mount
Arsenal yibwiraga ko ihabwa penaliti ubwo Bukayo Saka yagwaga mu rubuga rw'amahina, ariko umusifuzi na VAR ntibabyemeza
Pierre-Emerick Aubameyang ukirutse COVID-19, yagiye mu kibuga asimbuye
Romelu Lukaku yashoboraga gutsinda ikindi gitego ariko agorwa n'umunyezamu Leno
Reece James yitabwaho n'abaganga nyuma yo kugira ikibazo
Umutoza Mikel Arteta ahoza Folarin Balogun nyuma yo gutsindwa na Chelsea
Emile Smith Rowe yananiwe kwakira uburyo batsinzwe imikino ibiri yikurikiranya
Lukaku wagoye abakinnyi b'inyuma ba Arsenal, ashimirwa n'umutoza Thomas Tuchel ubwo umukino wari urangiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .