Arsenal yamuritse imyambaro mishya ya Adidas nyuma yo kuva kuri Puma

Yanditswe na Eric Tony Ukurikiyimfura
Kuya 1 Nyakanga 2019 saa 02:44
Yasuwe :
0 0

Arsenal yo mu cyiciro cya mbere mu Bwongereza yamuritse imyambaro mishya izambara mu mwaka utaha w’imikino wa 2019/20, yakozwe n’uruganda rwa Adidas nyuma y’igihe yari imaze yambara iyakozwe na Puma.

Iyi myambaro mishya Arsenal izajya yambara (mu rugo) iri mu mabara y’umutuku ku mubiri hose, amaboko ari mu mabara y’umweru mu gihe ifite ikora rikoze mu mutuku n’umweru ndetse aya mabara agaruka ku maboko no ku rutugu.

Arsenal isanzwe ifitanye ubufatanye n’u Rwanda izakomeza kwambara imyambaro iriho amagambo ya Visit Rwanda agamije guteza imbere ubukerarugendo bw’u Rwanda, aho impande zombi zimaze umwaka umwe zikorana.

Umuyobozi wa Adidas Football, Nick Craggs yavuze ko Arsenal igira umwihariko mu mupira w’amaguru bityo gukorana na yo babyishimiye.

Ati” Arsenal igira umuco wihariye ndetse mu rwego rwo gufatanya na yo guteza imbere umukino n’indangagaziro zayo, twashatse kubigiramo uruhare. Twishimiye gufatanya n’iyi kipe tukayiha imyambaro abakunzi bayo bakunda.”

Umuyobozi wa Arsenal, Vinai Venkatesham, na we yavuze ko nta tandukaniro rinini rihagati ya Arsenal na Adidas yemeye gufatanya n’iyi kipe.

Ati” Indangagaciro za Adidas ni zimwe nk’izacu. Uburyo bakoramo ibintu bigezweho n’intego bafitiye ikipe yacu no gufatanya natwe biri mu nzira zimwe. Twishimiye kugira Adidas iruhande rwacu kugira ngo dutere imbere tunagure imipaka haba mu kibuga no hanze yacyo nk’uko Arsenal ibigenza.”

Iyi myambaro yatangajwe binyuze mu mashusho ya filime ntoya yiswe ‘This is Home” agaragaramo abakinnyi bakiniye n’abagikinira Arsenal nka Idris Elba , Ian Wright , Tony Adams , Alexandre Lacazette , Pierre-Emerick Aubameyang , Mesut Ozil, Vivianne Miedema na Mattéo Guendouzi.

Iyi myambaro yatangiye kugurishwa kuri uyu wa Mbere tariki ya 1 Nyakanga ikaba iboneka ku rubuga rwa interineti rwa Arsenal na Adidas. Iyi kipe yaherukaga kwambara imyambaro ya Adidas mu myaka 25 ishize mu gihe amasezerano yari ifitanye na Puma yarangiranye n’umwaka w’imikino ushize.

Mesut Ozil mu mwambaro mushya wa Arsenal wakozwe na Adidas
Rutahizamu Pierre-Emerick Aubameyang yambaye uyu mwambaro mushya wa Adidas, Arsenal izajya yambara iri mu rugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza