APR yihimuye kuri Rayon Sports isanga Vita Club ku mukino wa nyuma

Yanditswe na Kanamugire Emmanuel
Kuya 15 Nzeri 2016 saa 09:28
Yasuwe :
0 0

Mu mukino utari woroshye watangiye imvura igwa iminota 90 irinda irangira, APR FC yikuyeho igisuzuguriro imbere ya Rayon Sports iyinyagira ibitego bitatu ku busa igera ku mukino wa nyuma w’irushanwa ryateguwe na AS Kigali isanze yo AS Vita Club nayo yatsinze Kiyovu Sports mu mukino wabanje.

Umwaka ushize warangiye APR FC itabashije gutsinda na rimwe mukeba Rayon Sports kuko mu mukino ubanza wa shampiyona zaguye miswi, umukino wo kwishyura inyagirwa 4-0 aho bongeye guhura ku mukino wa nyuma w’igikombe cy’Amahoro itsindwa 1-0 cyo mu minota ya nyuma.

Nk’uko byari byatangiye ari intambara y’amagambo hagati y’abafana, bamwe bati"uwabatsinze ntaho yagiye" abandi bati "Kirazira kikaziririzwa ntitujya dutsindwa gatatu" ifirimbi ya nyuma y’umusifuzi Twagirumukiza Aboudul Karim niyo yamaze impaka, igaragaza uwigizaga nkana "Rayon Sports" yanyagiwe 3-0.

Iminota 15, abafana ba Gikundiro bamwe bari batagiye guta icyizere cyo kwandikisha amateka atarabaho yo gutsinda mukeba inshuro eshatu bikurikiranya kuko ibitego bibiri byari byamaze kugera mu izamu, bya Sibomana Patrick ku munota wa karindwi na Issa Bigirimana ku wa 15.

Ahari bazavuga ko ryari irushanwa ryo kwitegura shampiyona ikaba ari yo mpamvu umutoza Masoudi yabanje mu kibuga abakinnyi batamenyerewe nka Ange Mutsinzi wari mu mutima wa ’defense’ na Irambona Eric, ariko ku bafana ba APR FC igisuzuguriro bacyikuyeho.

Nubwo umwanya munini abafana bawumaze baririmba basaba ko batsinda 4 bakishyura ideni bariye ubushize muri shampiyona, Maxime Sekamana yashyizemo ikindi kimwe iminota 90 irangiye ari 3-0.

Rayon Sports uretse kuba yaratangiye irushanwa ikanga andi makipe itsinda Police FC ikananyagira 4-0 Sunrise, ni imwe mu makipe ashobora kuzakura ipfunwe muri iri rushanwa kuko yatsinzwe n’abakeba bombi yaba Kiyovu Sports yari imaze imyaka ine itayikuraho amanota atatu ndetse ikaba inasubiriwe na APR FC.

Imikino ya nyuma y’iri rushanwa iteganyijwe kuri uyu wa Gatandatu tariki 17 Nzeli, ikibuga kikazabanza gukuburwa na Rayon Sports izaba ikina na Kiyovu Sports zishakamo itahana umwanya wa gatatu na ho umukino uzatanga igikombe ukazahuza ibihangange, AS Vita Club na APR FC saa kumi n’ebyiri n’igice yose ikazabera kuri Stade Amahoro i Remera.

Abasifuzi bayoboye umukino wahuje APR FC na Rayon Sports
Abafana ba APR FC bari benshi ku kibuga
Irambona Eric ni umwe mu bakinnyi batitwaye neza ku ruhande rwa Rayon Sports
Masudi ntiyahiriwe kuri uyu mukino

Amafoto: Mahoro Luqman


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244