APR FC: Zlatko wasabwe gutwara CECAFA ntashaka gukorana n’abarimo Jimmy Mulisa

Yanditswe na Bukuru JC
Kuya 26 Kamena 2019 saa 09:09
Yasuwe :
0 0

Ubwumvikane buke hagati y’abatoza ubwabo, kudahuza hagati y’abakinnyi n’abatoza ni kimwe mu bintu bitatu by’ingenzi byatumye APR FC igira umusaruro mubi muri uyu mwaka, aho iwusoje nta gikombe yegukanye. Abakinnyi bamwe ntibifuza kuguma muri iyi kipe kuko batishimye.

Umunya-Serbia Zlatko Krmpotić, amaze iminsi ibiri atitabira imyitozo y’ikipe abereye umutoza mukuru ndetse hari amakuru avuga ko yaba yarirukanwe n’ubuyobozi bw’ikipe mu gihe bwo bwahisemo kureka buri wese akavuga ibyo ashatse kuri iki kibazo n’ibindi bivugwa muri iyi kipe.

Ni iki cyihishe inyuma yo kutitabira imyitozo kwa Zlatko Krmpotić?

Amakuru agera kuri IGIHE ni uko uyu mutoza atigeze yirukanwa. Nyuma yo gusoza shampiyona ikipe iri ku mwanya wa kabiri, igaca agahigo kabi ko kuviramo muri 1/8 cy’igikombe cy’Amahoro, ubuyobozi bw’ikipe ya APR FC bwasabye uyu mutoza mukuru ko agomba kwegukana CECAFA Kagame Cup izabera mu Rwanda mu kwezi gutaha.

Umunya-Serbia yababwiye ko adashobora kwegukana iki gikombe mu gihe yaba agikorana n’abatoza nka Mulisa Jimmy umwungirije ndetse na Mugisha Ibrahim utoza abanyezamu b’iyi kipe.

Zlatko ushyigikiwe na bamwe mu bayobozi b’ikipe n’ubwo hari n’abandi batanyuzwe n’ubushobozi bwe, ashinja Mulisa na Mugisha gucamo abakinnyi ba APR FC ibice bibiri, aho hari abakinnyi 18 bari ku ruhande rw’aba batoza yasanze mu ikipe muri Gashyantare.

Uyu mutoza na we udacirwa akari urutega, yahisemo kutongera kwitabira imyitozo ahuriramo n’aba batoza bombi dore ko we ngo yifuza ko niba APR FC ishaka kumugumana nk’umutoza mukuru, yamureka akishakira abandi bakorana.

Zlatko Krmpotić na we ashinjwa kugira abakinnyi bamwe akoresha, abandi akabashyira ku ruhande byeruye, aho hari abakinnyi benshi bamaze igihe badakina, yanze gukoresha imyitozo akababwira ko bakorera muri Gym icyumweru kimwe, bibiri cyangwa bitatu bigashira.

Ubwumvikane buke hagati y’abatoza ba APR FC bugaragarira kandi mu gufata ibyemezo bimwe na bimwe nk’aho mbere y’umukino APR FC yakiriyemo AS Kigali mu gikombe cy’Amahoro, umutoza mukuru yarwaye, ntiyakoresha imyitozo muri icyo cyumweru ariko aba ari we utegeka abakinnyi bajya mu mwiherero abandi ababwira ko bataha.

Jimmy Mulisa wari ufite ikipe icyo gihe [umutoza mukuru arwaye] ndetse na we ufite uruhande rumushyigikiye, yitabaje bamwe mu bakinnyi umutoza yashyize ku ruhande barimo Omborenga Fitina, Sugira Ernest na Issa Bigirimana babanza ku ntebe y’abasimbura muri uwo mukino kuko batari baraye mu mwiherero.

Zlatko Krmpotić arasa n’uwamaze kuva muri APR FC, aho ikintu kimwe gitumye akomeje kuba ari i Kigali ari uko ategereje guhabwa amafaranga yose ikipe imugomba mu gihe gisigaye ku masezerano azarangirana na Mutarama 2020 dore ko ahabwa umushahara w’ibihumbi umunani by’amadolari ya Amerika ku kwezi.

APR FC irateganya kunyuza umweyo mu bakinnyi bayo barimo abatishimye

Uretse kugongana kwa hato na hato hagati y’abakinnyi bamwe na bamwe n’abatoza, bamwe mu bakinnyi ba APR FC ntibishimiye gukorana n’umutoza Zlatko Krmpotić ndetse hari abasoje amasezerano bumva bahabwa impapuro zibarekura bakava muri iyi kipe.

Abatoza ba APR FC bahawe umwanya uhagije wo guhitamo abakinnyi bazasigara muri iyi kipe mu gihe hari umubare utari muto w’abagomba kuyisohokamo, hakazamo amaraso mashya kugira ngo yongere kwisubiza icyubahiro isanganywe nk’ikipe itwara ibikombe mu Rwanda.

Uretse mu bakinnyi iyi kipe ivugwamo n’impinduka zitandukanye mu buyobozi aho uwari Umunyamabanga Mukuru, Kalisa Adolphe ‘Camarade’ ashobora gusimbuzwa Lt. Col. Sekaramba Sylvestre wagizwe Team Manager muri Mutarama uyu mwaka.

Umutoza wa APR FC Zlatko Krmpotić yasabwe gutwara CECAFA Kagame Cup avuga ko adashaka gukora n'abarimo Jimmy Mulisa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza