APR FC yirukanye abakinnyi 16 barimo Migi na Savio (Amafoto)

Yanditswe na Ntare Julius
Kuya 28 Kamena 2019 saa 01:29
Yasuwe :
0 0

Ikipe ya APR FC yasezereye burundu abakinnyi 16 barimo abari inkingi za mwamba nka Mugiraneza Jean Baptiste [Migi] wari umaze igihe ari kapiteni wayo, Iranzi Jean Claude, Rusheshangoga Michel n’abandi bari bayirambyemo.

Ubuyobozi bw’Ikipe y’Ingabo bwatangaje iki cyemezo mu gitondo cyo kuri uyu wa 28 Kamena 2019.

Abakinnyi birukanwe barimo abari bamaze iminsi badatanga umusaruro bari bitezweho muri ibi bihe iyi kipe itari ihagaze neza kuko yasezerewe mu Gikombe cy’Amahoro, ndetse inatakaza icya Shampiyona ya 2018/2019 cyegukanywe na mukeba wayo Rayon Sports.

Urutonde rw’aba bakinnyi ruriho abanyezamu Kimenyi Yyves na Ntaribi Steven; ba myugariro ni Niragira Ramadhan, Ngabonziza Albert, Rusheshangoga Michel, Rukundo Dennis na Rugwiro Herve. Mu bakina hagati hasezerewe Mugiraneza Jean Baptiste Migi, Nshimiyimana Amran, Nizeyimana Mirafa, Iranzi Jean Claude, Nshuti Dominique Savio, Ntwari Evode, Nsengiyumva Moustapha na Sekamana Maxime ndetse na rutahizamu Bigirimana Issa.

Inama yasezereye aba bakinnyi yabereye ku Cyicaro cya APR FC aho yari iyobowe n’Umuyobozi Wungirije wayo, Maj.Gen Mubaraka Muganga.

Mu butumwa bwe yashimiye abakinnyi birukanwe umurava bagaragaje mu gihe bari bamaze bakinira APR FC.

IGIHE ifite amakuru ko kuva Umutoza Zlatko Krmpotić yagera muri iyi kipe hari abakinnyi batishimiye imikorere ye bituma hagaragara gucikamo ibice byanatanze umusaruro utari mwiza mu Ikipe y’Ingabo z’Igihugu.

Aha kandi ntiharenzwa ingohe ikibazo cy’amarozi cyavuzwe cyane muri iyi kipe uyu mwaka n’imyitwarire mibi yavuzwe hanze y’ikibuga nk’aho Kimenyi Yves yashyizwe hanze yambaye ubusa.

Mu mpera za Shampiyona ishize APR FC, yatakaje imikino y’ingenzi ubwo yaganaga ku musozo, yatumye ibura igikombe cya shampiyona harimo uwo yatsinzwe na Rayon Sports igitego 1-0. Yanganyije na Kiyovu 0-0 na AS Kigali 0-0.

Iyi kipe kandi yamwajwe na AS Muhanga iyitsindira kuri Stade ya Muhanga ibitego 2-1, mu mukino ubanziriza uwa nyuma wa Shampiyona yatsinzwe na Espoir FC kuri Stade ya Kigali ibitego 2-1 bituma iva burundu mu rugamba rwo kwegukana igikombe.

Ikipe y’Ingabo z’Igihugu yasezerewe na AS Kigali mu Gikombe cy’amahoro, nyuma yo gutsindwa na AS Kigali igitego 1-0 mu mikino yombi.

Nyuma yo gusoza umwaka wa Shampiyona nta gikombe na kimwe iyi kipe yegukanye, ni umusaruro utarashimishije ubuyobozi, bwafashe nk’igisebo ku ikipe ifite ibikombe byinshi bya Shampiyona mu Rwanda.

Amahirwe yo guhagararira u Rwanda APR FC isigaranye, ni uko Rayon Sports yatwara Igikombe cy’Amahoro ikaba yagenda nk’iyabaye iya kabiri muri Shampiyona nk’uko amategeko y’Ishyirahamwe ry’Umupira w’Amaguru mu Rwanda (FERWAFA) abiteganya.

APR FC yakoze impinduka mu bakinnyi bayo bafite amazina akomeye irateganya kubasimbuza abandi bazashyirwa ahagaragara mbere y’uko icyumweru kirangira.

Mu bakinnyi bivugwa ko APR FC yamaze kumvikana na bo barimo Umunyezamu Rwabugiri Omar na Nkomezi Alex bakiniraga Mukura VS; Manzi Thierry, Niyonzima Olivier ‘‘Sefu’’ na Mutsinzi Ange bakiniraga Rayon Sports na Niyomugabo Claude na Rurangwa Mossi ba AS Kigali.

Umuyobozi wungirije wa APR FC, Maj Gen Mubaraka Muganga (ibumoso) ni we wasomeye abakinnyi impapuro zibasezerera
Uwari Kapiteni wa APR FC, Mugiraneza Jean Baptiste ''Migi'' yasezerewe azira imyitwarire mibi hanze y'ikibuga
Sekamana Maxime umwe mu bari barambye muri iyi kipe yahagaritswe azira umusaruro muke
Umunyezamu Kimenyi Yves yasezerewe n'iyi kipe azira imyitwarire mibi yo hanze y'ikibuga akaba azasimbuzwa Rwabugiri Omar iyi kipe yarangije kumvikana na we imukuye muri Mukura VS
Iranzi Jean Claude wagarutse muri APR FC mu 2018 avuye muri Zesco United yo muri Zambia yasezerewe azira imyitwarire mibi yo hanze y'ikibuga n'umusaruro muke
Rutahizamu Bigirimana Issa waguzwe na APR FC imukuye i Burundi yirukanwe. Bivugwa ko yamaze kumvikana na Young Africans yo muri Tanzania
Nshimiyimana Imran waguzwe n'iyi kipe imukuye muri Police FC yasezerewe
Nshuti Savio waguzwe muri Mutarama 2018 ari mu basezerewe na APR FC bivugwa ko yamutanzeho akayabo ka miliyoni 30 Frw imuguze muri AS Kigali
Ntwali Evode waguzwe na APR FC imukuye muri AS Kigali yasezerewe kubera umusaruro muke
Myugariro Hervé Rugwiro na we ari mu basezerewe
Abatoza ba APR FC bafite akazi gakomeye ko guhuza abakinnyi bashya n'abahasanzwe maze bakegukana Cecafa nk'uko babisabwe n'ubuyobozi bw'ikipe
Ibaruwa yandikiwe abakinnyi basezerewe
Urutonde rw'abakinnyi 16 basezerewe n'Ubuyobozi bwa APR FC
Myugariro Rugwiro Hervé (ibumoso) na Iranzi Jean Claude (iburyo) ubwo bari mu nama ibasomera ibarwa yo kubasezerera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza