00:00:00 IGIHE NETWORK KN KINYARWANDA EN ENGLISH FR FRANCAIS

APR FC yatsinze Gicumbi FC, Police FC inyagira Etoile de l’Est (Amafoto)

Yanditswe na Eric Tony Ukurikiyimfura
Kuya 31 Ukwakira 2021 saa 05:52
Yasuwe :
0 0

APR FC ifite igikombe giheruka yatangiye neza umwaka mushya w’imikino wa 2021/22 itsinda Gicumbi FC ibitego 3-1 mu mukino w’umunsi wa mbere wa Shampiyona y’Icyiciro cya Mbere wabereye kuri Stade ya Kigali i Nyamirambo kuri iki Cyumweru.

Gicumbi FC yazamutse mu Cyiciro cya Mbere muri uyu mwaka w’imikino, yahushije uburyo bwa Dusenge Bertin wananiwe kuroba umunyezamu Ishimwe Jean Pierre ku munota wa cyenda.

Uburyo bwa mbere bukomeye bwabonetse mu mukino ni ubwo ku munota wa 21 aho Manishimwe Djabel yateye umupira ari mu rubuga rw’amahina, usubizwa inyuma na Muhawenayo Gad.

Ku munota wa 28, Mugisha Gilbert yacomekeye umupira Manishimwe Djabel wagushijwe mu rubuga rw’amahina, umusifuzi Nsabimana Claude atanga penaliti yinjijwe na Kwitonda Alain ’Bacca’.

Nyuma y’iminota itatu, Gicumbi FC yashoboraga kubona igitego cyo kwishyura, gusa Tuyishimire Eric ’Congolais’ atera umupira wakuwemo na Ishimwe Jean Pierre.

Habura iminota ine ngo igice cya mbere kirangire ni bwo APR FC yatsinze igitego cya kabiri cyinjijwe na Bizimana Yannick wasize ba myugariro ba Gicumbi FC nyuma yo guherezwa umupira muremure na Manishimwe Djabel.

Nyuma y’iminota umunani igice cya kabiri gitangiye, Buregeya Prince yatanze umupira muremure wafashwe na Ndayishimiye Dieudonné wateye ishoti rikomeye umupira ukurwamo na Muhawenayo, ariko ugarukira uyu myugariro w’iburyo awuboneza mu izamu, biba 3-0.

Umutoza wa APR FC, Adil Mohammed Erradi, yakoze impinduka atari yateganyije ubwo Ndayishimiye Dieudonné wavunitse yasimburwaga na Ngabonziza Guilain nyuma ya Mugisha Gilbert na we wasimbuwe na Ishimwe Anicet nyuma yo kuvunika.

Byasabye gutegereza umunota wa 73, Gicumbi FC ibona igitego cyinjijwe na Leku Calvin ku mupira wahinduwe na Nsengayire Shadad.

Habura iminota ine ngo umukino urangire, Gicumbi FC yashoboraga kubona igitego cya kabiri cyo kwishyura, ariko umupira wahinduwe na Gitego Arthur uterwa nabi na Telesphore wawushose Karera Hassan bari mu rubuga rw’amahina.

Mu yindi mikino yabaye kuri iki Cyumweru, Police FC yatsindiye Étoile de l’Est ibitego 3-0 i Ngoma byinjijwe na Usengimana Danny, Hakizimana Muhadjiri na Iyabivuze Osée mu gihe Musanze FC yatsinze Bugesera FC ibitego 3-1 naho Etincelles FC inganya na Rutsiro FC ubusa ku busa.

Abakinnyi babanje mu kibuga hagati ya APR FC na Gicumbi FC

APR FC: Ishimwe Jean Pierre, Ndayishimiye Dieudonné, Niyomugabo Claude, Karera Hassan, Buregeya Prince, Ruboneka Bosco, Kwitonda Alain Bacca, Manishimwe Djabel (c), Rwabuhihi Aimé Placide, Bizimana Yannick na Mugisha Gilbert.

Gicumbi FC: Muhawenayo Gad, Iradukunda Axel, Niyibizi Emmanuel, Mugabo Prince, Harerimana Fidèle, Lulihoshi Dieu-Merci, Laab Garia Paul, Tuyishimire Eric, Dusenge Bertin, Nsengayire Shadad (c) na Mangolare Melly.

Abakinnyi babanje mu kibuga ku ruhande rwa APR FC
Abakinnyi ba Gicumbi FC babanje mu kibuga
Manishimwe Djabel wa APR FC na Nsengayire Shadad wa Gicumbi FC bifotozanya n'abasifuzi bari bayobowe na Nsabimana Claude
Abafana bari bake ku kibuga
Bamwe mu bafana bari baherekeje Gicumbi FC
Gicumbi FC yabonye imipira y'imiterekano itabyaje umusaruro
Bizimana Yannick aroba umunyezamu Muhawenayo Gad ku mupira wavuyemo igitego cya kabiri
Bizimana Yannick mu kwishimira igitego cya kabiri cya APR FC yarebye mu mboni za camera
Abakinnyi ba APR FC bamaze kwishimira igitego cyatsinzwe na Bizimana Yannick
Kwitonda Alain Bacca ashaka amayeri yo gucika Niyibizi Emmanuel
Ndayishimiye Dieudonné agerageza gucika myugariro wa Gicumbi FC
Manishimwe Djabel yari yagoye abakinnyi ba Gicumbi FC mu gice cya mbere
Mugisha Gilbert yahushije uburyo bwiza mu gice cya mbere
Igitego cya kabiri APR FC yatsinze, cyavuye ku mupira muremure watanzwe na Manishimwe Djabel

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .