APR FC yatangiye CECAFA Kagame Cup nabi itsindwa na Singida United

Yanditswe na Manzi Rema Jules
Kuya 30 Kamena 2018 saa 10:23
Yasuwe :
0 0

APR FC yitabiriye CECAFA Kagame Cup nk’umutumirwa, yatsinzwe umukino wa mbere na Singida United yo muri Tanzania ari naho irushanwa riri kubera, ibitego bibiri kuri kimwe.

APR FC yahagurutse mu Rwanda ku wa Gatatu nyuma yo gutsinda Espoir FC ikegukana igikombe cya shampiyona uyu mwaka, yakinnye umukino wa mbere muri CECAFA Kagame Cup ku mugoroba wo ku wa Gatanu ihura na Singida United zihuriye mu itsinda C.

Iyi kipe yakiniraga mu rugo niyo yafunguye amazamu hakiri kare ku munota wa karindwi ku gitego cya Habib Kyombo wateye umupira n’umutwe, umunyezamu Kimenyi Yves ntabashe kuwugarura.

Mbere y’uko igice cya mbere kirangira umutoza Petrovic wa APR FC washakaga igitego cyo kwishyura, yakoze impinduka ku munota wa 41 akuramo Nshimiyimana Amran ukina hagati mu kibuga yinjiza utahizamu Byiringiro Lague kugira ngo afatanye na Hakizimana Muhadjili gusatira.

Yongeye gukora impinduka igice cya kabiri gitangiye, akuramo Nshuti Dominique Savio utari witwaye neza yinjiza Sekamana Maxime, ku munota wa 70 biba ngombwa ko n’umunyezamu Kimenyi Yves asohoka mu kibuga afite ikibazo cy’imvune asimburwa na Ntaribi Steven.

Singida United itigeze iha umwanya APR FC, yaje kubona igitego cya kabiri ku munota wa 81 gitsinzwe na John Tibar ku mupira wari uvuye muri koruneri, mu minota y’inyongera APR FC iza kubona igitego cy’impozamarira gitsinzwe na Nsabimana Aimable.

APR FC izongera gusubira mu kibuga ku wa 2 Nyakanga ihura na Simba SC itozwa na Masoudi Djuma; tariki 4 Nyakanga ikazasoza imikino yo mu itsinda ihura na Dakadaha yo muri Somalia.

Amakipe ya mbere abiri mu matsinda niyo azerekeza muri 1/4.

APR FC muri Tanzania ntiyahiriwe n'umukino wa mbere muri CECAFA Kagame Cup

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza