APR FC yasezerewe na Djoliba AC yo muri Mali mu mikino Nyafurika

Yanditswe na Manzi Rema Jules
Kuya 17 Werurwe 2018 saa 05:55
Yasuwe :
5 3

APR FC yari ihagarariye u Rwanda mu mikino ya CAF Confederation yatsinze Djoliba AC ibitego bibiri kuri kimwe mu mukino wo kwishyura kuri uyu wa Gtandatu kuri Stade Amahoro ariko isezererwa muri iri rushanwa kubera igitego kimwe yari yatsindiwe mu mukino ubanza wabereye muri Mali mu Cyumweru gishize.

Ikipe imwe mu zari zaserukiye u Rwanda mu mikino Nyafurika uyu mwaka ariyo APR FC yari iri gukina CAF Confederation Cup yasezerewe ku giteranyo cy’ibitego 2-2 mu mikino yombi ariko ivamo kubera igitego yari yatsinzwe mu mukino ubanza.

Mu mukino wo kuri uyu wa Gatandatu wabereye kuri Stade Amahoro amakipe yombi yatangiye asatira cyane ariko biza guhira Djoliba AC ibona igitego hakiri kare cyane ku munota wa 10 gitsinzwe na Siaka Bakayoko.

APR FC nk’ikipe ikomeye kandi yakiniraga imbere y’abafana bayo, ntiyacitse intege nayo yahise itangira kotsa igitutu izamu rya Djoliba AC biza no kuyihira ku munota wa 19 yishyura igitego gitsinzwe na Bizimana Djihadi ku ishoti rya kure yatereye inyuma y’urubuga rw’amahina.

Iyi kipe y’umutoza Petrovic ariko yatozwaga ahanini na Jimmy Mulisa kuri uyu mukino, yakomeje gushaka igitego cya kabiri mbere y’uko igice cya mbere kirangira cyari kuyifasha cyane kwiyongerera icyizere cyo kujya mu ijonjora rya nyuma biranga iminota 45 irangira ari kimwe kuri kimwe.

Mu gice cya kabiri APR FC niyo yabanje gukora impinduka Sekamana Maxime asimbura Issa Bigirimana ku munota wa 67, Umutoza wa Djoliba AC, Diarra Fenyari, abonye ko ikipe ye itangiye kugarizwa nawe ahita akora impinduka ku munota wa 74 akuramo Naby Soumah asimburwa na Mohammed Cisse.

APR FC yasabwaga nibura ibitego bindi bibiri kugira ngo ibone itike yakomeje gushaka igitego cya kabiri igahererekanya neza hagati mu kibuga biza kuyiha umusaruro ku munota wa 76 ku ishoti ryatewe na Bizimana Djihad wigaragaje cyane umuzamu awugaruye Innocent Nshuti ahita aboneza mu rushundura biba bibiri.

Kugera kuri uyu munota abafana ba APR FC bari bamaze kwigarurira icyizere kuko ikipe yabo yasabwaga igitego kimwe gusa ikirinda gutsindwa ikindi igahita ikomeza ariko yagerageje uburyo butandukanye biranga iminota 90 irangira ari ibitego 2-1.

Gutsindwa uyu mukino byashyize iherezo ku nzozi z’iyi kipe y’ingabo z’igihugu zo kugera mu matsinda biha amahirwa Djoliba AC yo kujya mu ijonjora rya nyuma aho izahura n’imwe mu makipe azasezererwa muri CAF Champions League.

Abakinnyi babanjemo ku ruhande rwa Djoliba AC:

Adama Keita (16), Siaka Bagayoko (03), Emile Kone (04), Aboulaye Diaby (5), Mamatou Kouyate (8), Umar Kida (9), Mamadou Cisse (12), Seydou Diallo C (14), Naby Soumah (15), Cheick Niang (18) na Boubacar Traore (23).

Abakinnyi babanjemo ku ruhande rwa APR FC:

Kimenyi Yves (21), Omborenga Fitina (25), Imanishimwe Emmanuel(07), Rugwrio Herve (04), Buregeya Prince18), Mugiraneza Jean Baptiste(07), Djihad Bizimana (08), Issa Bigirimana(26), Iranzi Jean Claude(12), Muhadjili Hakizimana (10), Nshuti Savio Dominique (27).

APR FC yari yakoze ku nkingi zayo zose za mwamba
Abakinnyi ba Djoliba FC babanje mu kibuga
Abakinnyi ku mpande zombi basuhuzanya ubwo umukino wari ugiye gutangira
Kapiteni wa Djoliba Diallo Seydou agerageza kurinda izamu
Bizimana Djihad yaciye mu rihumye ba myugariro batatu ba Djoliba AC atsinda igitego cya mbere cya APR FC
Umunyezamu wa Djoliba AC, Adama Keita, areba umupira ugana mu rushundura nyuma y'ishoti rya Djihad Bizimana
Ibyishimo byari byose ku bafana ba APR FC ubwo ikipe yabo yari imaze kubona ibitego bibiri

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza