APR FC yanyagiye Musanze FC ishimangira umwanya wa mbere (Amafoto)

Yanditswe na Eric Tony Ukurikiyimfura
Kuya 30 Ugushyingo 2019 saa 06:24
Yasuwe :
0 0

APR FC ikomeje kuyobora Shampiyona y’Icyiciro cya Mbere mu Rwanda nyuma yo kunyagira Musanze FC ibitego 5-0 mu mukino w’umunsi wa 11 wabereye kuri Stade ya Kigali i Nyamirambo kuri uyu wa Gatandatu.

Musanze FC yakinnye uyu mukino idafite Dushimumugenzi Jean na Muhire Anicet ndetse byongeye ikaba yatozwaga n’umutoza w’abanyezamu Harerimana Gilbert nyuma yo kwirukana Umurundi Niyongabo Amars na Nduwimana Pablo wari umwungirije.

Ikipe y’ingabo yinjiye neza mu mukino, ifungura amazamu ku munota wa gatandatu ku gitego cyatsinzwe na Usengimana Danny wujuje ibitego birindwi nyuma yo guherezwa na Manishimwe Djabel.

Nyuma y’iminota ine, Byiringiro Lague yatsinze igitego cya kabiri nyuma yo gucenga abakinnyi b’inyuma ba Musanze FC mu gihe ku munota wa 15, Nizeyimana Djuma yatsinze icya gatatu ku makosa y’umunyezamu Muhawenayo Gad utafashe umupira watewe na Byiringiro Lague ngo awukomeze.

Habura iminota itanu ngo igice cya mbere kirangire, APR FC yatsindiwe igitego cya kane na Manishimwe Djabel na bwo ku mupira watewe nabi n’umunyezamu Muhawenayo wari usohotse mu gihe Manzi Thierry yatsinze agashinguracumu ku munota wa 75.

Mu minota ya nyuma, Musanze FC yasatiriye APR FC bikomeye binyuze ku bakinnyi barimo Didier Touya na Moussa Sova.

Iyi kipe yo mu Majyaruguru, yashoboraga kubona igitego cy’impozamarira mu minota y’inyongera, Rwabugiri Umar akuraho umupira watewe na Imurora Japhet nyuma yo guhindurwa na Harerimana Obed.

Gutsinda uyu mukino byatumye APR FC ishimangira umwanya wa mbere n’amanota 27, irusha amanota atatu Police FC, yo izakirwa na AS Muhanga kuri iki Cyumweru.

Ikipe y’ingabo izagaruka mu kibuga hagati mu cyumweru gitaha, yakirwa na Gicumbi FC ku wa Kabiri.

Mu yindi mikino yabaye uyu munsi, Etincelles FC yatsinze Gasogi United ibitego 2-1 mu gihe Heroes FC yanganyije na Gicumbi FC ibitego 2-2.

Gahunda y’umunsi wa 11 wa Shampiyona

Ku wa Gatandatu tariki ya 30 Ugushyingo 2019

  • Etincelles FC 2-1 Gasogi United
  •  
  • Gicumbi FC 2-2 Heroes FC
  •  
  • APR FC 5-0 Musanze FC

Ku Cyumweru tariki ya 1 Ukuboza 2019

  • SC Kiyovu vs Rayon Sports FC (Stade de Kigali, 18h00)
  •  
  • Marines Fc vs Mukura VS (Stade Umuganda, 15h00)
  •  
  • AS Muhanga vs Police (Stade Muhanga, 15h00)
  •  
  • Bugesera FC vs Espoir FC (Stade Bugesera, 15h00)
  •  
  • AS Kigali vs Sunrise FC (Stade de Kigali, 15h00)
Abakinnyi ba APR FC babanje mu kibuga
11 ba Musanze FC babanjemo
Usengimana Danny yishimira igitego cyabonetse hakiri kare
Byiringiro Lague ahanganiye umupira na Mwiseneza Daniel
Nizeyimana Djuma agerageza gucenga Nshimiyimana Clement
Byiringiro Lague yishimira igitego cya kabiri
Niyomugabo Claude azamukana umupira ku ruhande rwa Mbonyingabo Regis
Usengimana Danny yinjirana kapiteni wa Musanze FC, Mwiseneza Daniel
Usengimana umaze gutsinda ibitego birindwi muri Shampiyona, atera umupira Hakizimana Francois
Bukuru Christophe acira amazi
Abatoza ba APR FC bitegereza uko abakinnyi bitwara
Abakinnyi ba APR FC bishimira igitego cya mbere
Byiringiro Lague yabonye uburyo bwinshi muri uyu mukino
Gusa umukino warangiye atsinzemo igitego kimwe
Niyomugabo na Usengimana bifatanya na Byiringiro Lague kwishimira igitego
Umunyezamu Muhawenayo Gad yakoze amakosa abiri yavuyemo ibitego bibiri
Niyomugabo yitegereza umupira waturukaga mu kirere
Manishimwe Djabel yatsinze igitego cya kane, anatanga umupira wavuyemo icyatsinzwe na Usengimana Danny
Nizeyimana Djuma watsinze igitego cya gatatu cya APR FC azamukana umupira
Adil Erradi utoza APR FC yitegereza uko abakinnyi be bitwara
Jean Didier Touya ashaka uko acenga Omborenga Fitina
Uyu myugariro wa APR FC yahise amwambura umupira
Niyomugabo Claude ahagurutsa Byiringiro Lague ubwo umukino wari urangiye
Abafana ba APR FC batahanye akanyamuneza
Umunyamabanga mukuru wa APR FC, Lt Col Sekaramba Sylvestre
Perezida wa Musanze FC, Tuyishime Placide yari yaje gushigikira ikipe ye
Intebe y'abatoza ba Musanze FC kuri uyu mukino yatsinzwemo na APR FC
Rwabugiri Umar yarokoye APR FC mu minota ya nyuma

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza