Kwamamaza

APR FC yanyagiye Dauphin Noir 5-0 abafana bisabira guhura na Rayon Sports

Yanditswe kuya 9-09-2016 saa 21:12' na Jah d'Eau Dukuze


APR FC yatanze isomo rya ruhago mu mukino wayo wa mbere mu irushanwa rya As Kigali inyagira Dauphin Noir y’i Goma ibitego bitanu ku busa kuri Stade ya Kigali.

Umukino wabaye ku mugoroba wo kuri uyu wa Gatanu wari uwa mbere wa APR FC nyuma yo gusezerera uwari umutoza wayo Kanyankore Gilbert Yaoundé aho abafana batari benshi nk’abo ku munsi wabanje, bari baje kureba ishusho y’ikipe yabo nyuma y’ibyo yaberetse mu mikino ya gisirikare.

Ntabwo byasabye gutegereza igihe kirekire ngo ibimenyetso by’uko Dauphin Noir ishobora kuba iri ku rwego ruciriritse bigaragare. Ku munota wa kabiri gusa, ba myugariro b’iyi kipe yo muri Congo baje gusiganira umupira mu rubuga rw’amahina, maze Issa Bigirimana abatsindana igitego.

Dauphin Noirs yakomeje kurushwa umupira bigaragara maze igice cya mbere kijya kugana ku musozo, Maxime Sekamana aza guhabwa umupira mwiza na Buteera Andrew na we utazuyaje agahita arangiriza mu izamu.

Intangiriro z’igice cya kabiri zatangiranye n’igitego cya gatatu, aho Sekamana Maxime wigaragaje muri uyu mukino yaje kongera kungukira ku makosa y’umunyezamu akarangiriza mu izamu umupira warimo ucaracara mu rubuga rw’amahina.

Imvura y’ibitego yaje gukomeza ku munota wa 52 ubwo Bigirimana Issa yazamukanaga umupira ku ruhande rw’iburyo awugeza neza kwa Papy Sibomana wari ukinjira mu kibuga,maze na we ntiyazuyaza yinjiza igitego cya kane.

Ku munota wa 90 w’umukino, Nshuti Innocent ya APR FC yazamuye mu ikipe yayo y’abakiri bato yaje gukorerwaho ikosa mu rubuga rw’amahina maze aza no kwiterera iyo penaliti ni ko kuyinjiza anashimangira intsinzi ya 5-0.

Uko ibitego byajyendaga bisimburana kujyamo, ni ko abafana ba APR FC baririmbaga indirimbo zisaba ko bahura n’ikipe ya Rayon Sports. Iyi kipe y’i Nyanza ku nkomoko, ni yo yatsinze imikino ibiri iheruka guhuza aya makipe yombi, ndetse ikaba yaraye yitwaye neza mu mukino yatsinzemo Police FC 2-1.

Aya makipe yombi, akaba ashobora guhura mu gihe imwe ibaye iya mbere indi ikaba iya kabiri mu itsinda, cyangwa se mu gihe yose akomeje akazahurira ku mukino wa nyuma.

Imikino ya As Kigali Pre-Season Tournament, izakomeza ku Cyumweru tariki ya 11/9/2016. Kuri stade Amahoro APR FC izisobanura na Vita Club saa 17:00 mbere y’umukino wa Rayon Sports na Sunrise wo uzatangira saa 20:00.

Kuri stade ya Kigali ho, As Kigali izaba iri kumwe na Dauphin Noirs 15:30 mu gihe Kiyovu Sports na Police bazakinira ku Mumena kuri iyo saha.

Wari umukino APR FC yihariye cyane
Sibomana Papy yinjiye mu kibuga ahita atsinda igitego
Abafana ba APR FC bari i Nyamirambo ngo barifuza gukina na Rayon Sports
Abakinnyi bishimira igitego cya Nshuti
Muhadjili(imbere) ni umwe mu bakinnye iminota 90 mu mukino
Nshuti ashima Imana nyuma yo gutsinda Penaliti
Nshuti Innocent(ibumoso) yahawe amahirwe ahita ayabyaza umusaruro
Nshuti yatsindaga igitego cya mbere mu ikipe nkuru
Sekamana Maxime yatowe nk'umukinnyi w'umukino

Amafoto: Mahoro Luqman


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 29 Nzeri 2016
Copyright © 2009 -2014 - IGIHE Ltd - All Rights Reserved