APR FC yaba yamaze gusinyisha Ally Niyonzima wa Mukura VS

Yanditswe na Philbert Girinema
Kuya 21 Nzeri 2016 saa 11:02
Yasuwe :
0 0

Biravugwa ko mu masaha yo ku mugoroba wo kuri uyu wa Gatatu umukinnyi Ally Niyonzima wakiniraga Mukura VS yaba yashyize umukono ku masezerano y’imyaka ibiri muri APR FC.

Amakuru agera ku IGIHE ni uko Ally Niyonzima wakiniraga Mukura VS bishoboka ko yamaze kwerekeza muri APR FC agasinya imyaka ibiri muri iyi kipe ifite igikombe cya shampiyona cy’umwaka ushize.

Mu kiganiro n’Umunyamabanga wa Mukura VS, Sheikh Habimana Hamdan, yavuze ko nta cyo abiziho ariko ko uyu mukinnyi abafitiye amasezerano y’imyaka ibiri bityo atumva icyaba cyamuteye kugenda mu buryo budakurikije amategeko.

Ati “Ally ni umukinnyi wa Mukura VS afite amasezerano y’imyaka ibiri. Ubu ntari i Butare kuko yadusabye uruhushya rwo kujya kwivuza i Burundi, uko yaba yagiye gusinya mu yindi kipe simbizi.”

Uyu muyobozi avuga ko nta kipe n’imwe yigeze ibegera ibasaba uyu mukinnyi bityo biramutse byabayeho byafatwa nk’agasuzuguro ndetse inzego zibifitiye ububasha zikaba zakitabazwa.

Twagerageje kuvugisha uyu mukinnyi ntibyadukundira ndetse no kuri telefone igendanwa y’Umuvugizi wa APR FC nawe ntiyabonetse ku murongo.

Ally Niyonzima wari mu Ikipe y’Igihugu yanganyije na Ghana mu ntangiriro z’uku kwezi, agiye muri APR FC yaba asanze umuvandimwe we Ngando Omar ukina nka myugariro ndetse na Muhadjili Hakizimana wakinanaga muri Mukura umwaka ushize.

Ally Niyonzima (imbere) biravugwa ko yerekeje muri muri APR FC avuye muri Mukura VS
Ally Niyonzima yari mu bakinnyi b'inkingi za mwamba muri Mukura VS

Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza