Kwamamaza

APR FC: Ni gute Intare batinya yaje guhinduka insina ngufi abakeba bacaho urukoma?

Yanditswe kuya 26-09-2016 saa 09:14' na Jah d'eau DUKUZE


Ntabwo ndi umutoza, uko ni ukuri. Uretse kwiga itangazamakuru n’itumanaho, birashoboka ko nta n’ubumenyi buhagije mfite mu bijyanye n’imicungire y’amakipe cyangwa mu buyobozi muri rusange, gusa burya ntabwo bisaba ko uba umwubatsi w’umwuga kugira ngo umenye ko umucanga utaba urufatiro rwiza ku nzu y’igorofa. Muri APR FC Ishyamba ntabwo ari ryeru.

Umukunzi wese w’imikino mu Rwanda yaba afana APR FC cyangwa se atayifana, arabizi neza ko ari yo kipe irusha izindi ibigwi hano mu gihugu: Ibikombe 16 bya shampiyona, umunani by’Amahoro na bitatu bya CECAFA bigaragaza umwitangirizwa iyi kipe y’Ingabo z’Igihugu yahaye ngenzi zayo z’imbere mu gihugu , aho byasaba imyaka n’imyaka ngo zibe zayihigika. Ku ruhando mpuzamahanga kandi, APR FC yahoze ari ikipe yubashywe.

Igitinyiro cya APR FC cyaba cyarajyanye n'imyaka ya 2012?

Ubwo APR FC yuriraga bisi yayo i Dar es Salaam igana i Mwanza muri CECAFA ya 2005, abanya-Tanzania benshi barahuruye, ngo bihere amaso iyo ndege yo ku butaka. Hejuru y’ibyo ariko, bari banakuruwe n’iyo kipe yari imaze kuba ubukombe ku mugabane wa Afurika, dore ko mu mwaka wari wabanje yari yandagarije Zamalek i Kigali mbere yo kuhatwarira CECAFA itsinze Ulinzi 3-1.

Muri Tanzania ntabwo icyo gihe yahiriwe na Ben Mwalala na Villa ye ku mukino wa nyuma, ariko byibura iyi kipe yari irangajwe imbere na Kapiteni Didier Bizimana, Manfred Kizito, Titus Mulama, Bobo Bola n’abandi, yari mu bihe byiza mu mateka yayo, aho hagati ya 2003-2007 yari ntakorwaho muri aka karere no muri Afurika inashobora kugera muri ½ cy’igikombe cyahoze cyitwa Cup Winners Cup kuri uyu mugabane. Ibi byose byaje gukendera nka Nyomberi ku buryo buri wese byamutera kwibaza uko byagenze kugira ngo iyi kipe ibe igeze aho iri magingo aya.

Politike ifutamye y’isoko ry’igura…

Kuva mu mwaka wa shampiyona wa 2012-2013, APR FC yafashe icyemezo cyo gukinisha abakinnyi bafite ibyangombwa by’uko ari abanyarwanda. Iyi politike yari igamije ahanini kugabanya amafaranga menshi yashorwaga mu kugura abanyamahanga kenshi batanashoboye, ndetse no guha amahirwe abakinnyi b’abanyarwanda bahereye ku bazamukiye mu ishuri ryabo rya ruhago.

Bidatunguranye, umusaruro wabaye nk’ugabanukaho gato kuko muri iyi myaka ine yatwayemo ibikombe bine (bitatu bya shampiyona na kimwe cy’Amahoro) mu gihe mu myaka ine yabanje yari ifitemo ibikombe umunani (bine bya shampiyona, bitatu by’Amahoro na kimwe cya CECAFA).

APR FC yakunze gutanga akayabo ku bakinnyi nyamara ntibahabwe umwanya wo gukina

Ibi ariko ntabwo byari bibi ugereranyije n’impinduka z’abakinnyi yari yakoze, cyane ko Butera Andreew atari bube Papy Faty ndetse Mubumbyi Bernabin ntiyari buhindukemo Lionel Saint Preux.

Ikibazo cyaje kuba muri APR FC, ni uko n’ubundi nkuko byari bimeze ku gihe cy’abanyamahanga, iyi kipe yakomeje gushora amafaranga menshi igura abakinnyi mu by’ukuri idakeneye.

Nko mu mwaka ushize wa shampiyona, iyi kipe yashoye agera kuri miliyoni 30 izana abakinnyi barimo Djihad Bizimana, Mugenzi Bienvenu, Ininahazwe Fabrice na Usengimana Faustin. Aba bose byarangiye nta n’umwe ubonye umwanya uhoraho mu kibuga, aho nyuma yo gutangwaho akayabo, nta n’umwe washoboye gutangira imikino irenga irindwi muri shampiyona, ikintu kigaragaza ko aba bakinnyi baguzwe badakenewe cyane.

Mu gihe umwaka ushize wagakwiye kuba warasigiye isomo iyi kipe ya APR FC mu kwitondera kugura abakinnyi, iyi kipe yongeye kubisubiramo ahubwo igura abandi bakinnyi akayabo nyamara bigaragara ko nta kinini bazayimarira. Aha harimo Imran Nshimiyimana na Innocent Habyarimana iyi kipe yatanzeho miliyoni 16 bombi ibakuye muri Police, mu gihe imikino ya AS Kigali yasize itweretse ko ikinini bazakorera iyi kipe ari ukwicara ku gatebe k’abasimbura.

Hejuru y’ibi, APR FC yashoye miliyoni icyenda ku bakinnyi batatu, Itangishaka Blaise na Aimable Nsabimana bavuye muri Marines wongeyeho Mucyo Freddy bakunze kwitwa Januzaj wavuye muri AS Muhanga. Aba bose kuri ubu biracyagoranye no kubabona muri 18, aho nta gihindutse bashobora kuzaba ba Iradukunda Bertrand na Mugenzi Bienvenu bo mu myaka yashize. Isomo? Oya.

…N’igurisha

Uretse amafaranga menshi APR FC ihomba mu kugura abakinnyi bo kuzuza umubare, iyi kipe inahomba amafaranga yagakwiye kuba yinjiza mu kugurisha abakinnyi iba yaratanzeho akayabo. Nk’ iyo urebye muri iyi myaka ine ishize APR FC itangije politike yo gukinisha abanyarwanda, usanga imaze gukoresha arenga miliyoni 400 mu kugura abakinnyi no kongerera amasezerano abahari (recruitment). Ikibazo ni uko iyo urebye ayo yinjije muri aba bakinnyi usanga ari 0.

Mugiraneza Jean Baptiste Migi, Iranzi Jean Claude, Kwizera Olivier (yari yaratijwe ariko yashoboraga kuguruka), Emery Bayisenge na Rwatubyaye Abdoul, bose ukurikije isoko riri hanze ubundi kuri ubu nta n’umwe wakaguzwe ari munsi y’ibihumbi 50 mu madorali (40 000 000Frw) ndetse ugereranyije n’ayatanzwe kuri Sugira Ernest mu minsi mike, iyi kipe yakabaye yarabakuyemo nibura miliyoni 400. Aba bose ariko bahuriye ku kintu kimwe: Kugenda bigurishije.

Olivier Kwizera na Migi bashoboraga kwinjiriza APR FC akayabo k'amafaranga gusa birangira bagendeye ubuntu

Uburangare bwo kumenya igihe cyo kongerera amasezerano umukinnyi ndetse n’igihe cyo kumugurisha ni bimwe mu bikomeza gushyira APR FC mu gihombo umwaka ku mwaka. Iranzi Jean Claude, ni byo ko iyi kipe ishobora kumubonamo akayabo mu gihe agurishijwe na Topolcany gusa mu myaka ibiri ishize, iyi kipe yari bugirane amasezerano nkayo na Simba, ndetse igahabwa n’ibihumbi 50 by’amadorali, icyo gihe Iranzi ntiyagurishwaga,maze bisaba gutegereza ko amasezerano ye arangira ngo agende nkuko byagenze kuri Haruna na Migi.

Aha kandi, Rwatubyaye Abdoul, na we ntabwo yari bube agendeye ubuntu kandi yari we myugariro mwiza muri aka karere. Kwizera Olivier, iyo APR FC imuha uruhushya agashaka ibyangombwa byo kujya muri Afurika y’Epfo muri Gicurasi , iyi kipe yari bubone ibihumbi 40 by’amadorali, Olivier agakinira Meltzburg. APR yaramwimanye ngo abanze asoze shampiyona. Icyavuyemo, Olivier ari muri Bugesera ndetse APR FC yamubonyeho 0.

Izo ngero nke n’izindi ntavuze, zerekana ko kugeza ubu APR FC nta kinini yari yungukira muri politike yo gukinisha abanyarwanda bonyine ugereranyije n’uko byari biri mbere. Ku ruhande rumwe, n’ubundi impano z’abana b’abanyarwanda ziracyapfukiranywa kubera kugura abakinnyi benshi ku mwanya umwe biganjemo abadakenewe. Ku rundi ruhande, iyi kipe iracyakomeza gutanga amafaranga y’umurengera no mu gihe bitari ngombwa, bikomeza no kuyishyira mu gihombo kinini nkuko byahoze mu gihe cy’abanyamahanga.

Muri make, gusezerera abanyamahanga, bishobora kuba byaratumye APR FC yica “Gitera” nyamara “ikibimutera” kikiri aho.

Imiyoborere itera abantu kwibaza byinshi

Nk’ikipe y’Ingabo z’Igihugu, Minisiteri izifite mu nshingano, ikora ibishoboka byose ngo iyi kipe ibeho ku rwego rwo hejuru nk’andi makipe yose yihaye yo mu karere. Ntabwo uzumva ibibazo by’imishahara muri iyi kipe cyangwa se abakinnyi batahawe ibyabo. Aha ariko, ikibazo cy’imiyoborere muri APR FC kigaragara noneho mu buzima bwayo bwa buri munsi, aho ubunyamabanga bw’iyi kipe butungwa agatoki.

Muri bimwe nkunze gusoma ku gihugu cyacu, nabonyemo ko mu mwaka wa 2015 Ihuriro Mpuzamahanga ry’Ubukungu ryasohoye icyegeranyo gishyira u Rwanda ku mwanya wa mbere ku Isi, mu guteza imbere ikoreshwa ry’ikoranabuhanga.

Kugeza ubu, birababaje kuba ikipe nka APR FC, mu myaka 10 ishize yafatwaga nk’iya mbere mu karere k’ibiyaga bigari no muri Afurika y’Uburasirazuba, kuri ubu bigoye kuyibonamo amakuru kubera nta rubuga rwa Internet rukora igira (Website) ndetse nta naho igaragara ku mbuga nkoranyambaga (Facebook, Twitter, Instagram). Isi tugezemo cyane cyane mu mikino, APR FC ntabwo yagakwiye kuba ibarirwa mu makipe ameze gutyo.

Ubunyamabanga bwa APR FC buracyemangwa

Iyo urebye kandi muri APR FC, kuva yatangira politike yo gukinisha abanyarwanda, abatoza icyenda bamaze kuyisimburanwaho (Eric Nshimiyimana 2012-2013, Andreas Spear 2013-2014, Mashami Vincent 2014, Dr Ljubomir Petrovic 2014-2015 Dusan Dule 2015, Rubona Emmanuel 2015-2016, Nizar Khanfir 2016, Yaounde Kanyankole 2016 na Yves Rwasamanzi 2016), uwa 10 arategerejwe. Ibi na byo, byerekana ko ku ruhande rumwe, bishoboka ko habaho kudashishoza mu guha akazi umutoza runaka cyangwa se kudashishoza mu kumusezerera.

Uburyo APR FC igenda ifatamo abakinnyi bayo na bwo buri mu biyisubiza inyuma muri iyi minsi. Ni byo nkuko twabivuze, iyi kipe ntabwo uzayumvamo ibibazo by’imishahara, ariko na yo abakinnyi bamwe ntabwo bakunze kwishimira uburyo bafatwa. Urugero rwa hafi, ni Olivier Kwizera wasohowe mu myitozo ngo ntakiri umukinnyi w’iyi kipe yagiriye akamaro kanini ikamwitura ibyo ngo ni uko atashoboye kubona Visa imujyana muri Afurika y’Epfo.

Rwatubyaye ni umwe mu basohotse muri APR FC batishimye

Abakinnyi bazamukiye mu ishuri rya ruhago rya APR FC, na bo bari mu bagiye bagaragaza kutishima. Ubusanzwe, politike y’iyi kipe ivuga ko umukinnyi ukinira ikipe y’igihugu nkuru ahabwa “recrutement” igera kuri miliyoni umunani. Ibi ariko iyo bigeze kuri aba bana bazamuye biba ibindi kuko benshi bagenerwa miliyoni eshatu zitwa iz’ibikoresho mu gihe baba babona bagenzi babo banarusha bahabwa akayabo. Ibi, biri mu byatumye Rwatubyaye ahitamo kwerekeza muri Rayon Sports ndetse na Yves Rwigema akamukurikira… n’abandi wenda bazagenda.

Kuri ubu, abakinnyi nka Mugenzi Bienvenu bari mu gihirahiro, nyuma yo gusezererwa ariko ntibahabwe amabaruwa abasohora mu ikipe (release letter) , Kakira Suleyman ashobora kureka ruhago burundu, kubera ko amakipe asa nk’arambiwe kumufata nk’intizanyo cyane ko APR FC yanze kumurekura burundu cyangwa se kumuha umwanya mu ikipe. Icyo kibazo agihuriyeho n’abandi ndetse gishobora kugera kuri Nova Bayama kuri ubu uri muri Rayon Sports.

Mu myaka 10 ishize, APR FC yaguraga umukinnyi wese mwiza mu karere, none uyu munsi n’abakeba baza kuyihahiramo… ese Intare batinyaga ihindutse insina ngufi gute? Aho iyahigaga ntiyahiye ijanja?

Yves Rwigema wazamukiye mu ishuri rya ruhago rya APR FC na we yavuye muri iyi kipe ayishinja kutamufata uko bikwiye

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved