Kwamamaza

APR FC mu ihurizo ryo kwikuraho ipfunwe no kwishyura umwenda ibereyemo Rayon Sports

Yanditswe kuya 14-09-2016 saa 17:18' na Manzi Rema Jules


Umukino uzahuza APR FC na Rayon Sports kuri uyu wa Kane muri 1/2 cy’irushanwa rya ’AS Kigali Pre-Season Tournament’ ukomeje kuvugisha benshi, bitewe n’uburyo impande zombi zahigiye kuzawitwaramo.

Mu mwaka ushize Rayon Sports yihereranye APR FC iyinyagira ibitego 4-0 muri Shampiyona ndetse yongera no kuyitsindira ku mukino wa nyuma w’igikombe cy’amahoro, igitego kimwe ku busa.

Benshi mu bakunzi ba APR FC bari gukubita agatoki ku kandi bavuga ko biteguye kwihorera kuri mukeba Rayon Sports.

Bumvikana bavuga ngo “Ntitujya dutsindwa kabiri, ntibishoboka.” Aya magambo akunze gukoreshwa n’abafana b’ikipe y’Ingabo z’Igihugu ifite ubukaka n’ubushongore, igitinyiro n’icyubahiro ariko umwaka ushize ntiwayigendekeye neza kuko yigirijweho nkana na mukeba.

Nyuma y’imyaka 23 imaze ishinzwe, yegukanye ibikombe 15 bya shampiyona, umunani by’Amahoro na bitatu bya CECAFA nta yindi kipe irabikora mu gihugu nubwo hari izimaze imyaka myinshi zishinzwe.

Kuri uyu wa Kane, APR FC ifite urugamba rutoroshye rwo kwikuraho igisuzuguriro cy’umwaka ushize aho yandagajwe na Rayon Sports mu mikino ibiri amakipe yombi aheruka guhuriramo.

Nyuma yo gutsindwa na Kiyovu Sports kuri uyu wa Kabiri byatumye Rayon Sports ihita isanga APR FC muri 1/2, umukino benshi bemeza ko uzaba ari ishiraniro kuko ubusanzwe uba gacye mu mwaka.

Aba bakeba babiri bakaba bagomba kwishakamo ikipe imwe izagera ku mukino wa nyuma w’irushanwa ryateguwe na AS Kigali, igomba kuzahura n’izaba yavuye hagati ya Kiyovu Sports na AS Vita Club.

Nyuma yo gutsindwa na Kiyovu Sports, umutoza Irambona Masoudi Djuma yahise ahakana ko ikipe ye yakuyemo abakinnyi bakomeye ashaka kwitsindisha kugira ngo ihure na APR FC aho kunyura mu nzira irimo AS Vita Club anashimangira ko nta kipe n’imwe atinya bityo yiteguye gusubiramo ibyo yakoze umwaka ushize atsinda iyi kipe.

Ati “Bose barimo kubyibazaho, ariko muri iri rushanwa turimo gupima abakinnyi. Ubu 11 nabamenye. Buri muntu umwanya we ndawuzi n’aho agomba gutangira."

Yongeyeho ati “Impamvu ya kabiri abantu barimo kuvuga ngo nasuzuguye Kiyovu nuko iri ari irushanwa ribanziriza shampiyona. Turi gushakisha no guhuza imikinire ntabwo ari shampiyona. Dufite undi mukino kuwa Kane, ntabwo wakinisha umukinnyi uyu munsi, ngo akine buri gihe, ntabwo ari imashini, agomba kuruhuka. Nta kipe iduteye ubwoba muri zose, turazubaha.”

Ku bakunzi ba Rayon Sports barigamba ko bashaka gukora amateka bagatsinda APR FC inshuro eshatu zikurikiranya.

Ku ruhande rwa APR FC, bavuga ko uyu ari wo mwanya bakereka abakeba ko amazi atakiri ya yandi by’umwihariko bashingiye ko ikipe bari bafite umwaka ushize yahindutse uhereye ku bakinnyi n’abatoza bityo bagomba kwihorera.

Kuri Rayon Sports nubwo ifite abakinnyi bashya nka Moussa Camara na Nahimana Shassir bigaragaje mu mikino ibiri iheruka harimo uwa Police FC iyi kipe yatsinze 2-1 na Sunrise banyagiye 4-0 yatakaje ba rutahizamu bayihetse umwaka ushize ari nabo bigaragaje cyane ku mikino bahuye na APR FC barimo Davis Kasirye wayitsinze ibitego bitatu wenyine muri shampiyona na Ismaila Diarra watsinze igitego kimwe rukumbi cyayihesheje igikombe cy’Amahoro.

Davis Kasirye (wambaye ingofero) yatsinze ibitego bitatu
Umukino uheruka wagaragayemo gushyamirana ku mpande zombi
APR FC nayo yatakaje umuzamu Kwizera Olivier, Iranzi Jean Claude, Rwatubyaye Abdul na Emery Bayisenge mu bagaragaye ku mukino uheruka
Ikipe yabanje mu kibuga Rayon Sports inyagira APR FC ibitego bine ku busa
Umukino w'aya makipe niwo wa mbere urebwa n'abafana benshi mu Rwanda

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved