APR FC irimo abakinnyi icyenda bashya yatangiye kwitegura CECAFA Kagame Cup (Amafoto)

Yanditswe na Eric Tony Ukurikiyimfura, Ntare Julius
Kuya 1 Nyakanga 2019 saa 11:22
Yasuwe :
0 0

APR FC yari igizwe n’abakinnyi barimo icyenda bashya, yatangiye imyitozo kuri uyu wa Mbere, yitegura imikino ya CECAFA Kagame Cup izatangira mu mpera z’iki cyumweru.

Ku mugoroba wo kuri uyu wa Mbere ni bwo APR FC yerekanye abakinnyi icyenda bashya imaze kugura nyuma yo gusezerera abandi 16, mu gihe hari n’abandi bategerejwe muri iyi kipe imaze kwegukana ibikombe byinshi mu Rwanda.

Mu gitondo hakoze abarimo umunyezamu Rwabugiri Omar na Nkomezi Alex bavuye muri Mukura, Ahishakiye Heritier na Niyigena Clément bavuye muri Marines, ubwo imyitozo yari yabereye ku kibuga cy’i Shyorongi.

Abakunzi b’iyi kipe batari bake bitabiriye imyitozo yo ku mugoroba yabereye ku kibuga cya Kicukiro, aho bagiye kureba abakinnyi barimo abavuye muri Rayon Sports nka Manishimwe Djabel byari byatangajwe ko azerekeza muri Gor Mahia yo muri Kenya.

Niyonzima Olivier Sefu wari wambaye nimero 21, Mutsinzi Ange wari wambaye nimero 5, Manzi Thierry wambaye 4 na Manishimwe Djabel wari wambaye 28 basesekaye ku Kicukiro bamwenyura, bambaye amakabutura y’umukara n’imipira y’umweru bya APR FC ndetse nyuma biyongeraho Mushimiyimana Mohamed wakiniraga Police FC we wari wambaye nimero 6.

Abakinnyi bafashijwe n’umutoza Jimmy Mulisa, bakoze imyitozo yoroheje mbere yo gukina hagati yabo bahererekanya, aho iyi kipe iri kwitegura irushanwa rya CECAFA Kagame Cup izatangira ku wa Gatandatu, ihangana Proline FC yo muri Uganda.

Mu bakinnyi basigaye muri iyi kipe batakoze imyitozo kuri uyu wa Mbere harimo Buregeya Prince bivugwa ko ashobora kwerekeza hanze y’u Rwanda ndetse na Nshuti Innocent utarakira neza, bombi bari ku kibuga aho imyitozo yabereye.

Aganira n’itangazamakuru nyuma y’imyitozo, Jimmy Mulisa yavuze ko bishoboka cyane ko hari abandi bakinnyi baziyongera muri iyi kipe, bakiganira n’ubuyobozi.

Ati ”Hari abakinnyi bashya bagaragaye mu myitozo. Ni abakinnyi beza bamaze iminsi bitwara neza mu makipe yabo. Nk’umuntu wakiniye ikipe, mbahaye ikaze. APR ni ikipe ifite amateka isaba ibintu byinshi cyane. Ni ugutegereza turebe, abenshi abayobozi baracyaganira na bo, tuzategereza turebe bazabibamenyesha.”

APR FC imaze kwegukana CECAFA Kagame Cup inshuro eshatu muri eshanu imaze gukinirwa mu Rwanda. Iyi kipe itegerejwemo andi mazina akomeye, aho havugwa Haruna Niyonzima wamaze gutandukana na Simba SC.

Barimo kandi Niyomugabo Claude na Rurangwa Mossi ba AS Kigali, Rwabuhihi Placide na Nizeyimana Djuma ba Kiyovu Sports iri kwitegura umukino wa nyuma w’Igikombe cy’Amahoro uzahuza aya makipe yombi, ku wa Kane.

Manishimwe Djabel (ibumoso) na Manzi Thierry (iburyo) bakurikiwe na Niyonzima Olivier na Mutsinzi Ange ubwo basesekaraga ku myitozo ya APR FC yabereye ku Kicukiro kuri uyu wa Mbere
Mutsinzi Ange na Sefu bamwenyuraga mu myambaro mishya y'umukara n'umweru
Manishimwe Djabel byari byatangajwe ko yerekeza muri Kenya, yatunguranye ajya muri APR FC kuri uyu wa Mbere
Manzi Thierry aganira na Omborenga Fitina, aho bombi bagaragazaga ibyishimo ku maso
Aba bakinnyi basesekaye ku Kicukiro bari mu modoka ya Team Manager wa APR FC, Lt. Col Sekaramba Sylvestre
Mutsinzi Ange yageze muri APR FC nyuma yo kuva muri Rayon Sports yari amazemo imyaka itatu
Niyonzima Olivier Sefu, Manzi Thierry na Hakizimana Muhadjiri batangiye imyitozo bitegura CECAFA Kagame Cup izatangira mu mpera z'icyumweru
Myugariro Niyigena Clement APR FC yakuye muri Marines mu myitozo yabereye ku Kicukiro kuri uyu wa Mbere
Mulisa Jimmy ni we wakoresheje imyitozo dore ko umutoza mukuru adahari
Abakinnyi ba APR FC babanje gukora imyitozo yorojehe ibafasha kunanura imitsi
Niyonzima Olivier 'Sefu' yahawe nimero 21 yambaraga muri Rayon Sports
Manzi Thierry na we yahawe nimero 4 yambarwaga na Rugwiro Herve yaje gusimbura
Umutoza w'abazamu Mugisha Ibrahim aganira na Ntwari Fiacre (ibumoso) Rwabugiri Omar (hagati) na Ahishakiye Hertier (iburyo)
Nkomezi Alex waguzwe muri Mukura, yahawe nimero 7 yambarwaga na Mugiraneza Jean Baptiste
Rutahizamu Sugira Ernest na Manishimwe Djabel bareba uko bagenzi babo bakina mu myitozo yo kuri uyu wa Mbere
Niyigena Clement azenguruka inyuma ya bagenzi be ubwo bakinaga kwihishanya
Manishimwe Djabel wari wishimye, yiruka ngo mugenzi we (Clement) atamufata
Songayingabo yaguye hasi ubwo abakinnyi ba APR FC bitozaga kuri uyu wa Mbere
Niyonzima Olivier yari akeye ku maso mu mwambaro mushya utari ubururu
Manzi Thierry yiteguye gutangira gukinira APR FC mu mpera z'icyumweru ubwo APR FC izaba ikina na Proline muri CECAFA
Abayobozi ba APR FC bayobowe na Visi Perezida, Maj. Gen. Mubaraka Muganga basuye abakinnyi ubwo imyitozo yari irangiye
Visi Perezida wa APR FC Maj.Gen.Mubaraka Muganga asuhuza umutoza Jimmy Mulisa
Maj. Gen Mubaraka aha ikaze Manishimwe Djabel wageze muri iyi kipe kuri uyu wa Mbere
Abafana ba APR FC bari bafite ibyishimo bidasanzwe nyuma yo kubona aba bakinnyi bashya biganjemo abavuye muri Rayon Sports
Mulisa atanga amabwiriza ku bakinnyi be mu myitozo
Niyonzima Ally aganira na Manishimwe Emmanuel wari wishimiye kubona abakinnyi barimo Mutsinzi Ange
Manishimwe Djabel aganira na Hakizimana Muhadjiri ashobora kuzasimbura muri iyi kipe naramuka yerekeje muri AS Vita Club imwifuza
Djabel yigaragaje mu myitozo ya mbere yakoze yambaye umwambaro wa APR FC
Nkomezi Alex ni umwe mu bazahanganira bikomeye umwanya ubanzamo mu kibuga hagati
Maj. Gen. Mubaraka aha ikaze Manzi Thierry wahoze ari kapiteni wa Rayon Sports
Mutsinzi Ange na we yahawe ikaze mu ikipe y'ingabo
Djabel yavuze ko yumva agahinda k'abafana ba Rayon Sports bababajwe n'uko agiye muri APR FC
Abafana ba APR FC bifotoreza kuri Mutsinzi Ange
Manishimwe Djabel yishimiwe bidasanzwe muri APR FC
Abafana ba APR FC bazamuye Djabel mu kirere, bamushimira ko yemeye kujya mu ikipe yabo
Jimmy Mulisa yahaye ikaze abakinnyi bashya, avuga ko hari n'abandi bazerekeza muri APR FC vuba aha

Amafoto: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza