Kwamamaza

APR FC iri gushakisha umutoza wa gatanu mu mwaka umwe, Rwasamanzi akamwungiriza

Yanditswe kuya 23-09-2016 saa 07:38' na Jah d'eau DUKUZE


Yves Rwasamanzi uherutse guhesha APR FC igikombe cy’irushanwa rya AS Kigali, yarangije gushyira umukono ku masezerano y’umwaka atoza iyi kipe nk’umutoza wungirije mu gihe Mugisha Ibrahim na we yahawe amasezerano y’umwaka nk’umutoza w’abazamu.

Aba batoza bombi bari kumwe na Kanyankole Yaounde, bari beretswe itangazamakuru tariki ya 26/7/2016, ndetse ubuyobozi bwa APR FC butangaza ko barangije guhabwa amasezerano yo kuzatoza iyi kipe mu mwaka uzakurikira.

Camarade(wa kabiri ibumoso) yemeje ko Yves(wa mbere ibumoso) yasinye nk'umutoza wungirije mu gihe Mugisha(wa mbere iburyo) na we yasinye umwaka nyuma yaho abo bombi batsindiye ikizamini cyananiwe Yawunde(wa kabiri iburyo)

Ubwo imikino ya gisirikare yaberaga mu Rwanda yari isojwe ariko, uwari umutoza mukuru wa APR FC, Kanyankole Gilbert Yaounde yaje gusezererwa azize umusaruro muke nkuko iyi kipe yabitangaje.

Uyu mutoza utari umaze igihe kinini anasezerewe mu ikipe y’igihugu atatojemo umukino n’umwe, yaje na we kwemeranywa n’ubuyobozi ko yari akiri mu igeragezwa mbere yo gusinya amasezerano ayo ari yo yose.

Nyuma yo gusiga ikipe mu maboko ya Rwasamanzi Yves, waje kwegukana igikombe cy’irushanwa ryateguwe na AS Kigali atsinze amakipe nka Vita Club, AS Kigali ndetse by’umwihariko akanyagira mukeba Rayon Sports, amakuru agera ku IGIHE, ni uko ubuyobozi bwa APR FC bwahise bumuha amasezerano y’umwaka umwe we n’umutoza w’abazamu Mugisha Ibrahim.

Ubwo twavuganaga n’Umunyambanga w’iyi kipe Kalisa Adolphe bakunze kwita Camarade, yaje kuduhamiriza aya makuru, gusa avuga ko uyu mutoza yasinyishijwe nk’umutoza wungirije.

Yagize ati: “Ni byo (Yves Rwasamanzi) yasinye umwaka umwe nk’umutoza wungirije”.

Gusinyisha Rwasamanzi nk’umutoza wungirije, byahise bihamya amakuru yari amaze iminsi ko iyi kipe ya APR FC iri mu biganiro n’umutoza uzaturuka ku mugabane w’u Burayi. Amakuru agera ku IGIHE, avuga ko iyi kipe yabanje kugirana ibiganiro n’abatoza babiri b’Abaholandi, gusa kuri ubu hakaba hari abatoza batatu yaba yararangije gushyira hanze ngo izatoranyemo umwe izaha akazi.

Uretse abo batoza b’Abaholandi batari bamenyekana amazina, abatoza nka Didier Gomes Da Rosa na Yvan Minaert bahoze muri Rayon Sports na bo bari mu bavuzwe bifuzwa na APR FC ngo basimbure umunya Tunisia Nizar Khanfir. By’umwihariko, Umubiligi Yvan Minaert watozaga Leopards yo muri Kenya, yitangarije ko ari mu biganiro na APR FC.

Ati “U Rwanda ni igihugu nagiriyemo ibihe byiza kandi n’umupira waho uri gutera imbere. Ibiganiro byabayeho na APR FC ariko sinavuga ngo byararangiye. Nitumara kumvikana muzabimenya.”

Gushakisha umutoza mukuru mushya bivuze ko APR FC ishobora kuba imwe mu makipe aciye agahigo ko gutozwa n’abatoza benshi mu mwaka umwe, dore ko ushobora kuza i Kigali yaba ari uwa gatanu uyitoje muri 2016. Uyu mwaka iyi kipe yatangiranye na Rubona Emmanuel, iza guhabwa Nizar Khanfir nk’umutoza mukuru, wahaye umwanya Yaounde na we akayisigira Yves Rwasamanzi kuri ubu utegereje uwo azungiriza.

Iyi kipe yatwaye shampiyona iheruka, isanganywe agahigo ko gutozwa n’abatoza benshi mu gihe gito, aho uri mu nzira azaba ari uwa 14 mu myaka umunani yonyine itambutse. (Andy Mfutila 2006-2008, Rene Feller 2008-2009, Eric Paske 2009-2010, Ernie Brandts 2010-2012, Eric Nshimiyimana 2012-2013, Andreas Spear 2013-2014, Mashami Vincent 2014, Dr Ljubomir Petrovic 2014-2015, Dusan Dule 2015, Rubona Emmanuel 2015-2016, Nizar Khanfir 2016, Yaounde Kanyankole 2016 na Yves Rwasamanzi 2016).

APR FC, kuri ubu yugarijwe n’ibibazo by’abakinnyi yazamuye mu ishuri rya ruhago bamara gukura bakayitera umugongo bakigira muri mukeba Rayon Sports, biteganyijwe ko izasubukura imyitozo ku wa Mbere tariki ya 26 Nzeri 2016, yitegura umwaka mushya wa shampiyona izatangira yisobanura n’Amagaju tariki ya 15 Ukwakira 2016.

Yvan Minaert yaba ari we mutoza mushya wa APR FC?
Ni Gomes se?
Cyangwa ni Ernie Brandts ugarutse!

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 27 September 2016
Copyright © 2009 -2014 - IGIHE Ltd - All Rights Reserved