Antoine Hey wifuzaga kugaruka mu Rwanda agiye gutoza Myanmar

Yanditswe na Manzi Rema Jules
Kuya 4 Gicurasi 2018 saa 11:11
Yasuwe :
0 0

Umudage Antoine Hey wahoze atoza Amavubi mbere yo gusezera muri Mutarama 2018 nyuma akaza kongera kwandika asaba kugaruka ntasubizwe, kuri ubu agiye kwerekeza mu ikipe y’igihugu ya Myanmar muri Aziya.

Hey wari wagizwe Umutoza mukuru w’Amavubi mu buryo butavuzweho rumwe muri Werurwe 2017, yafashe icyemezo arasezera muri Mutarama 2018 nyuma yo gusezererwa mu matsinda ya CHAN 2018 bivugwa ko agiye gutoza ikipe y’igihugu ya Syria.

Nubwo uyu mutoza yari aherutse kwandikira ubuyobozi bushya bwa Ferwafa buyobowe na Brig. Gen. Jean Damascène Sekamana asaba ko yagaruka agakomereza aho yari agejeje, mmtimes.com cyanditse ko mu gihe cya vuba azaba yagizwe umutoza mukuru w’igihugu cya Myanmar, asimbuye Gerd Zeise uherutse gusezera.

Iki kinyamakuru cyanditse ko mu itangazo rigenewe abanyamakuru Ishyirahamwe ry’umupira w’amaguru muri Myanmar ryasohoye, kuri uyu wa kane tariki 3 Gicurasi abayobozi baryo babonanye na Hey n’abamwungirije baganira ku buryo yatoza ikipe yabo.

Hey nawe abicishije kuri twitter yaciye amarenga ko agiye gutoza ikipe y’igihugu ya gatandatu agira ati “Urugendo rurakomeje, hakurikiyeho muri Asia! Ikipe y’igihugu ya gatandatu?”

Ku bijyanye n’uko uyu mutoza wari yasabye kugaruka mu Mavubi, Umuvugizi wa Ferwafa Bonnie Mugabe yabwiye IGIHE ati “Yarabisabye abayobozi barabizi ariko ntacyo barabikoraho.”

Igihugu cya Myanmar kizwi nka Burma, gihana imbibi n’u Buhinde, Bangladesh, Thailand, Laos n’u Bushinwa.

Nubwo atari igihugu kizwi cyane mu mupira w’amaguru, kirakomeye kuko cyatsindiwe ku mukino wa nyuma w’igikombe cya Aziya mu 1968, cyegukana igikombe cya Asian Games mu 1966 no mu 1970 kinegukana igikombe cy’irushanwa rya SEA Games rihuza ibihugu bikora ku nyanja mu 1967.

Ni igihugu cya 39 kinini ku Isi, gifite ubuso bwa kilomero kare 676,578; mu 2017 cyari gituwe n’abagera kuri 53,582,855.

Ubukungu bwacyo bushingiye ku buhinzi, ubukerarugendo, amabuye y’agaciro kikanaba kimwe mu bihugu byabaye indiri z’ibiyobyabwenge.

Umudage Antoine Hey wahoze atoza Amavubi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza