Amavubi ni aya nyuma, Mashami atsinzwe igeragezwa! Byapfiriye he?

Yanditswe na Eric Tony Ukurikiyimfura
Kuya 18 Ugushyingo 2019 saa 10:10
Yasuwe :
0 0

Mu gihe cy’iminsi itatu gusa, Amavubi atakaje imikino ibiri, amahirwe yo kujya mu Gikombe cya Afurika cya 2021 kizabera muri Cameroun ari kugabanuka ndetse birangiye umutoza Mashami Vincent atagaze ku byo yasabwe ubwo yahabwaga amasezerano y’amezi atatu muri Kanama, agasabwa amanota ane mu mikino ibiri yakinnye mu cyumweru twasoje.

“Nagerageje gukora ibyo nshoboye mu bushobozi bwanjye, ahasigaye ni ah’abashinzwe gahunda zose. Bazareba, hanyuma ubuzima buzakomeza kuko hano nicaye ntabwo ari njye wa mbere uhicaye kandi ntabwo ndi uwa nyuma.”

Ayo ni amagambo y’umutoza Mashami Vincent nyuma yo gutsindwa na Cameroun igitego 1-0 kuri iki Cyumweru, Amavubi agakomeza kuba ku mwanya wa nyuma mu itsinda F ryo gushaka itike ya CAN 2021, afite amanota 0 kuri atandatu.

Ubwo yongeraga guhabwa ikipe y’Igihugu muri Kanama, Mashami Vincent yari yasabwe ibintu bitatu bikomeye bitigeze bisabwa undi mutoza wese wahawe ikipe y’igihugu.

Icyo gihe, Mashami yasabwe gufasha u Rwanda kugera mu ijonjora rya kabiri ryo gushaka itike y’Igikombe cy’Isi cya 2022 kizabera muri Qatar, abigeraho asezereye Seychelles ku bitego 10-0 muri Nzeri.

Yasabwe kandi gufasha u Rwanda kugera mu mikino ya nyuma ya CHAN 2020 izabera muri Cameroun, na byo abigeraho asezereye Ethiopia ku bitego 2-1 mu kwezi gushize mu gihe amanota ane yari yasabwe mu mikino ibiri yahuyemo na Mozambique na Cameroun mu gushaka itike ya CAN 2021, birangiye nta na rimwe abonye.

Ku ruhande rwe, abona nta kibazo kinini bimuteye kuba atakongererwa amasezerano kuko ngo yakoze ibishoboka byose mu bushobozi yari afite ndetse asanga ntaho n’ubundi yari guhungira ibyo yasabwe kugeraho nk’uko yigeze kubikomozaho mbere yo gutangira aya mezi atatu.

Ati” Icyambabaza ni uko yaba ari njye wa mbere bigiye kubaho cyangwa ari njye wa nyuma. Ni nko kuvuga ngo urahunga urupfu, ntaho warukwepera. Ushobora gutsinda cyangwa ugatsindwa ariko iyo uzi ko ntacyo wasize inyuma uba ufite amahoro.”

Umusaruro w’Amavubi muri iyi mikino ibiri wabazwa nde?

1. Umutoza Mashami Vincent

Birumvikana, uwa mbere ni umutoza Mashami Vincent kuko ni we wemeza umukinnyi uhamagarwa n’abakinnyi bakoreshwa ku mukino.

Mbere yo gukina iyi mikino ibiri, Mashami Vincent yahamagaye ikipe y’Igihugu habura iminsi umunani gusa ngo Amavubi akine na Mozambique mu gihe Amavubi yagiye i Maputo, abakinnyi bose bamaranye iminsi ibiri gusa (ku wa Gatandatu no ku Cyumweru) ugereranyije igihe abavuye muri APR FC n’abakina hanze bagereye mu mwiherero.

Mashami yashinjwe ikosa ryo gupanga nabi ikipe ku mukino wa Mozambique, akina nta mukinnyi wambura imipira (Milieu récupérateur) yabanje mu kibuga, ndetse na we yabihinduye u Rwanda rwamaze gutsindwa ibitego bibiri ubwo yinjizagamo Niyonzima Olivier ‘Sefu’ ku munota wa 42, asimbuye Muhire Kevin.

Umutoza w’Amavubi yanenzwe kandi kuba atarabonye neza ko mu minota ya mbere y’umukino Mozambique yarushaga Amavubi cyane yifashishije abakinnyi bo ku mpande gusa, aho bari babujije amahwemo Imanishimwe Emmanuel na Omborenga Fitina ubusanzwe bubakirwaho mu busatirizi bw’Ikipe y’Igihugu.

2. Minisiteri ya Siporo na FERWAFA

Ubwo hakorwaga ihererekanyabubasha hagati y’iyahoze ari MINISPOC na Minisiteri ya Siporo, Minisitiri Aurore Mimosa Munyangaju yasabye abakozi b’iyi minisiteri nshya ko bakwiye guhindura imikorere.

Mu magambo ye yagize ati” Ikindi cy’ingenzi ni uko nasaba abakozi ba Minisiteri ya Siporo ko dukomeza kubakira ku ihame ryo gukorera hamwe no guharanira guhindura imikorere, imikoranire yari ihari, tugakomeza kugira ibishya. Ibi byose bikazaba bigamije kugera ku musaruro u Rwanda rutwitezeho nka Minisiteri ya Siporo.”

Ni byo, hari ibitagenda neza ku ruhande rw’iyi minisiteri ishinzwe ikipe y’Igihugu nk’uko n’ubundi umutozaMashami Vincent yabikomojeho ubwo yari amaze guhabwa Amavubi mu mezi atatu ashize.

Ati” Ntabwo navuga ngo uburyo dukoreramo, uburyo duhamagaramo abakinnyi, uburyo duteguramo ikipe ngo ni bwiza cyane, ariko na none ntabwo ari bubi cyane urebye wenda n’izindi gahunda igihugu cyacu muri rusange cyangwa se Minisiteri ireberera imikino yose inshingano iba ifite, ntabwo biba byoroshye kwita ku mikino yose ngo abantu babyakire kimwe. Ntabwo nabura kuvuga ko bidahagije, hakenewe izindi mbaraga ziyongeraho.”

Ikipe y’Igihugu yakinnye na Cameroun kuri iki Cyumweru saa 18:00 yarageze mu Rwanda mu gitondo cyo ku wa Gatandatu nyuma y’uko ibwiwe ko idashobora guhabwa indege yihariye yari guhita iyikura muri Mozambique nyuma y’umukino yakinnye ku wa Kane.

Mashami avuga ko abakinnyi bari bafite umunaniro ariko batabigira urwitwazo ahubwo bakwiye kwemera ko batsinzwe.

Kapiteni w’Amavubi, Niyonzima Haruna, yirinze kugira ibyo avuga ku bibazo by’indege bagiriye mu rugendo, abwira abanyamakuru ko atabibasangiza ariko hari abayobozi basuye Amavubi mbere y’umukino wa Cameroun bakabiganiraho.

Ati” Twatanze ibishoboka nubwo twakoze ikosa tugatsindwa igitego, tugiye gutegura ibiri imbere kandi nizera ko tuzabikora neza.”

“Ndakeka ibyo tutabitindaho nk’uko umutoza yabivuze twarabiganiriye ndetse hari abayobozi twahuye mbere y’umukino tubiganiraho, ibyo ni ibintu navuga biri private [ntabasangiza] ariko ntabwo twabigenderaho.”

U Rwanda ni cyo gihugu cyakinnye imikino ibiri mu gihe gito (iminsi itatu) mu makipe yose, aho byibuze abandi bagize undi munsi wiyongeraho.

Aha ariko, umuntu yakwibaza no ku bashinzwe gukurikirana ikipe y’igihugu [Team Manager], aho umukinnyi nka Niyonzima Ally ahamagarwa bivugwa ko ikibazo cy’amazina yagize mu bwana cyakemutse, ariko bikarangira adakinishijwe. Ibi bikaza byiyongera ku byabaye kuri Niyonzima Haruna na Kimenyi Yves cyangwa se abandi mu myaka ishize.

Ni iki kiza gukurikiraho?

Umwaka w’imikino urarangiye ku ikipe y’igihugu kuko izagaruka mu kibuga muri Kanama 2020, yakirwa na Cap-Vert mu mukino w’umunsi wa gatatu mu itsinda F.

Muri Werurwe hazakinwa amajonjora yo gushaka itike y’Igikombe cy’Isi cya 2022 mu gihe nta gihindutse CHAN 2020 izabera muri Cameroun izaba muri Mata.

Umutoza w'Amavubi Mashami Vincent yatsinzwe imikino ibiri yari yasabwemo amanota ane
Amavubi ni aya nyuma mu itsinda F ryo gushaka itike ya CAN 2021, aho ifite amanota 0 kuri atandatu
Minisitiri wa Siporo, Aurore Mimosa Munyangaju yari yaje gushyigikira Amavubi ubwo yakinaga na Cameroun
Perezida wa FERWAFA, Sekamana Jean Damascene na we yarebye uyu mukino

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza