Amayeri yo gutsinda Abarabu: Amavubi arahura na Maroc, ni iki asabwa ngo atsinde?

Yanditswe na Ntabareshya Jean de Dieu
Kuya 22 Mutarama 2021 saa 03:00
Yasuwe :
0 0

Ibibazo ni byinshi ku bakunzi b’Ikipe y’Igihugu y’umupira w’amaguru ‘Amavubi’ ihura n’iya Maroc ku mugoroba wo kuri uyu wa Gatanu mu mukino wa kabiri wo mu Itsinda rya C rya CHAN 2020 iri kubera muri Cameroun, bibaza niba ishobora gutsinda aba Barabu bafite irushanwa riheruka.

Hirya no hino mu gihugu abantu bacitse ururondogoro, benshi baribaza icyo umuntu yakora ngo abashe gutsinda ikipe yo mu Barabu bisa nk’aho byabaye ingorabahizi ku makipe yo Munsi y’Ubutayu bwa Sahara.

Akenshi iyo amakipe yo Munsi y’Ubutayu bwa Sahara agiye guhura n’ay’Abarabu, agenda yikandagira. Haba ku makipe y’ibihugu ndetse n’asanzwe, Umwarabu yubatse igitinyiro ku Mugabane wa Afurika.

Ni gake amakipe yo Munsi y’Ubutayu bwa Sahara atsinda ayo mu Barabu mu marushanwa atandukanye ahuriramo.

Amateka yerekana ko mu mikino u Rwanda rwahuyemo n’amakipe y’Abarabu, rufite imibare iri hasi nk’uko bigaragara ko mu mikino 14 rwakinnye rwatsinzwemo 11, ruganya ibiri, rugatsinda umukino umwe.

Amahirwe ahari ni uko muri iyo mikino, umukino umwe rukumbi u Rwanda rwatsinze wari uwaruhuje na Maroc, bigiye gucakirana mu mukino wa kabiri wo mu matsinda ya Shampiyona Nyafurika y’abakinnyi bakina imbere mu bihugu byabo ikomeje kubera muri Cameroun.

Mu kiganiro Urubuga rw’imikino cya Radio Rwanda, bamwe mu bakinnyi bakanyujijeho mu mupira w’amaguru mu Rwanda, yaba mu Ikipe y’Igihugu ndetse n’amakipe yabo, abatoza n’abanyamakuru, bose bagarutse ku cyakorwa kugira ngo ikipe igiye guhura n’Abarabu ibashe gutsinda.

Karekezi Olivier, umwe mu bakinnyi batazibagirana mu mitima y’Abanyarwanda, yakinnye mu ikipe yatsinze Maroc ibitego 3-1 mu 2008. Yavuze ko ibanga rya mbere ari ukugabanya igitutu, ugakinana ubushishozi kandi ukirinda gutsindwa igitego cya kare.

Ati “Umwarabu aza ashaka kugutungura, ashaka kugutsinda igitego cya kare, ashaka kuguca intege. Icyo nabwira barumuna banjye ku mukino bafitanye na Maroc, ni ukutaza gutsindwa igitego cya kare, kandi n’abo amahirwe babona baze kuyabyaza umusaruro kuko umwarabu ushobora kubona uburyo by’ibitego utabubyaza umusaruro we yabona amahirwe inshuro esheshatu akaba yazitsinda.”

Umunyamakuru Yves Bucyana wakoreye Radio Rwanda, kuri ubu ubarizwa kuri BBC mu mikino, asanga intandaro yo gutsinda kw’Abarabu ari uko bazi gutegura neza umukino, anasaba abasore b’Amavubi kwitanga batizigamye.

Ati “Abarabu kuba bakunze kudutsinda ni uko bazi icyo gutsinda bivuze, badutsinda kuko bazi gutegura umukino. Gusa si ukuvuga ko natwe intsinzi itaturyohera ariko gutsinda birategurwa. Ntabwo ari ubwa mbere, kubatsinda natwe twabatsinda kuko si ubwa mbere byaba bibaye. Ni ukuvuga ngo gutsinda umwarabu birashoboka gusa bisaba ubwitange urebye nk’uko bitanze bakina na Uganda. Gusa kuri njye nta mukino usa n’undi.”

Eric Nshimiyimana ni umutoza wa AS Kigali, inafitanye umukino n’ikipe yo muri Tunisia ya CS Sfaxien mu mikino Nyafurika ya CAF Confederation Cup, yavuze ko imbaraga z’Abarabu ziva mu gukinira mu mpande no ku mipira y’imiterekano.

Ati “Urebye imbaraga zabo ziva ku mipira ituruka mu mpande noneho ugasanga bafite n’abakinnyi benshi imbere y’izamu. Ikindi ni uko imipira y’imiterekano baba bayizi cyane, barayikina cyane, urumva ko bisaba kwitonda.”

Yongeyeho ko “Ikiruta byose iyo waregetse, ubwugarizi bwawe bugasohoka cyane, bigusaba ko ubabuza kuko baragusatira cyane.”

Uretse ibivugwa n’aba ariko abenshi mu bakiniye Ikipe y’Igihugu mu myaka yatambutse barimo Mbonabucya Désiré wabaye kapiteni wayo, Mugiraneza Jean Baptiste Miggy wakiniye ikipe ya APR Fc n’Amavubi igihe kirekire, Rusheshangoga Michel, Saidi Abed Makasi, Niyonzima Haruna na Bizimana Didier bahuriza ku kuba wakinana ubushishozi no kwita cyane ku kazi kawe byaba intwaro ikomeye yo gutsinda.

Ni ku nshuro ya kabiri ‘Amavubi’ agiye gukina na Maroc muri Shampiyona Nyafurika kuko ibihugu byombi byaherukaga gukina muri CHAN 2016 ubwo Abarabu batsindaga u Rwanda ibitego 4-1 kuri Stade Amahoro.

Mu mukino wo kwishyura wo gushaka itike y’Igikombe cy’Isi cya 2010, Maroc yatsinze u Rwanda 2-0 mu gihe umukino wa hafi uheruka guhuza ibihugu byombi hari mu irushanwa ryo kwibuka ku nshuro ya 23 wabaye mu 2017, Amavubi atsinda Maroc y’Abatarengeje imyaka 23 ibitego 2-0.

Sugira Ernest ashoreye umupira mu mukino u Rwanda rwatsinzwemo na Maroc mu 2016
Ikipe y'Igihugu 'Amavubi' iracakirana na Maroc ku mugoroba wo kuri uyu wa Gatanu muri CHAN 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .