Amavubi yitegura Mozambique yakoreye urugendo rw’amaguru ku Nyanja y’u Buhinde (Amafoto)

Yanditswe na Eric Tony Ukurikiyimfura
Kuya 12 Ugushyingo 2019 saa 02:38
Yasuwe :
0 0

Ikipe y’igihugu y’u Rwanda ‘Amavubi’ iri kubarizwa muri Mozambique, kuri uyu wa Kabiri mu gitondo yakoze urugendo ruto rw’amaguru ku Nyanja y’u Buhinde mu rwego rwo gufasha abakinnyi kunanira imitsi mu gihe bakomeje kwitegura umukino ubanza wo mu itsinda F ryo gushaka itike y’igikombe cya Afurika kizabera muri Cameroun mu 2021 , uzaba ku wa Kane tariki ya 14 Ugushyingo.

Amavubi ari kubarizwa i Maputo guhera kuri uyu wa Mbere, aho yakiriwe n’Abanyarwanda benshi bahatuye.

Ikipe y’Igihugu icumbikiwe muri African Prestige Hotel iri rwagati mu Mujyi wa Maputo, ikaba ari hoteli igezweho y’inyenyeri eshanu.

Muri iki gitondo, abakinnyi bakoze urugendo rugufi hafi y’Inyanja y’u Buhinde mu rwego rwo kunanura imitsi mu gihe ku mugoroba bakora imyitozo ya mbere bitegura umukino uzaba ku wa Kane.

Umutoza w’Amavubi, Mashami Vincent, yavuze ko kuri ubu abakinnyi bose bameze neza dore ko na Bizimana Djihad wahagaze avuye mu Bubiligi, kuri ubu ari kumwe na bagenzi be.

Ati " Abakinnyi baramutse neza nyuma y’urugendo rurerure, urabona ko babyutse bameze neza, tuvuye gukora urugendo rugufi kugira ngo turambure imitsi, dukuremo umunaniro bari bafite w’urugendo ndetse no kuryama, akagendo gato k’iminota 15-20, wabonye ko harimo kunanura imitsi kugira ngo mu by’ukuri bongere basubirane ku buryo tuza gukora imyitozo abakinnyi bameze neza nta kibazo bafite."

Amavubi azakirwa na Mozambique mu mukino uzaba kuri uyu wa Kane tariki ya 14 Ugushyingo kuri Zimpeto Stadium i Maputo, ahite agaruka mu Rwanda gukina na Cameroun nyuma y’iminsi itatu tariki ya 17 Ugushyingo i Nyamirambo.

Muri iyi mikino y’amatsinda, u Rwanda ruzaba rusabwa kuba urwa mbere cyangwa rukaba urwa kabiri mu gihe Cameroun yaza imbere kuko hazazamuka ikipe imwe muri itsinda F (Cameroun ifite itike).

Ikipe y'igihugu 'Amavubi' iri kubarizwa muri Mozambique guhera kuri uyu wa Mbere
Umujyi wa Maputo ukora ku Nyanja y'u Buhinde
Abakinnyi b'Amavubi bakoze urugendo rw'amaguru hafi n'Inyanja y'u Buhinde mu gitondo cyo kuri uyu wa Kabiri
Omborenga Fitina, Niyonzima Haruna, Mvuyekure Emery, Iranzi na Muhadjiri bafatira ifoto hafi n'Inyanja y'u Buhinde
Uru rugendo rwari rugamije gufasha abakinnyi kunanura imitsi ngo bagabanye umunaniro
Abaganga b'ikipe y'igihugu n'abatoza nabo bari kumwe n'abakinnyi
Tuyisenge Jacques, Bizimana Djihad, Niyonzima Olivier Sefu na Imanishimwe Emmanuel bakora uru rugendo rwamaze iminota igera kuri 20
U Rwanda ruri kwitegura guhura na Mozambique mu mukino w'umunsi wa mbere wo mu itsinda F ryo gushaka Itike ya CAN 2021
Amavubi arakora imyitozo ya mbere muri Mozambique, kuri uyu mugoroba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza