Amavubi yerekeje muri Ghana, kapiteni Haruna asigira ubutumwa abafana

Yanditswe na Kanamugire Emmanuel
Kuya 2 Nzeri 2016 saa 04:01
Yasuwe : XX
0

Ikipe y’igihugu Amavubi yerekeje muri Ghana kuri uyu wa Gatanu aho agiye gukina n’iki gihugu umukino wa nyuma mu itsinda H mu guhatanira itike y’igikombe cy’Afurika cya 2017, kapiteni Haruna Niyonzima akaba yasize abwiye Abanyarwanda kugirira icyizere ikipe yabo kuko bazi umwenda bababereyemo ndetse bari gukora cyane kugira ngo bongere kwiyunga n’abafana.

Nyuma y’uko gahunda Amavubi yari afite yo guhaguruka mu Rwanda kuwa Kane ihindutse, iyi kipe y’abakinnyi 18 n’ababaherekeje yahagurutse i Kanombe kuri uyu wa Gatanu saa munani z’amanywa aho biteganyijwe ko amara amasaha atandatu mu rugendo akagera i Accra saa Kumi n’ebyiri n’igice ni ukuvuga saa Mbiri n’igice zo mu Rwanda.

Mbere yo hugaguruka, kapiteni Haruna Niyonzima yatangaje ko imyiteguro yagenze neza, umwuka ari mwiza mu bakinnyi ndetse n’abatoza kuri bo intego ari ugushaka intsinzi kugera ku munota wa nyuma ariko anasaba abafana n’Abanyarwanda muri rusange kugumana ikipe ku mutima kuko abakinnyi bazi icyo babashakaho kandi na bo batagiye muri Ghana gutembera ahubwo bagiye kurwanira ishema ry’igihugu.

Yagize ati “Twariteguye neza, dufite abatoza beza b’Abanyarwanda abakinnyi biyumvamo cyane. Intego itujyanye ni ugushaka intsinzi nubwo twamaze gutakaza amahirwe yo kubona itike ariko dufite igihugu cyacu tugomba kurwanira ishema kugera ku munota wa nyuma. Icyo abafana badushakaho turacyizi, barashaka ibyishimo, tugomba kubirwanira.”

U Rwanda rugiye guhura n’ikipe ya Ghana irimo ibibazo byo kutumvikana hagati y’ishyirahamwe ry’umupira w’amaguru na Minisiteri ya Siporo yanze kurihira abakinnyi bakina hanze amatike y’indege kugeza ubwo kapiteni Andre Ayew ayatanze ndetse minisitiri wa siporo akaba yanategetse ko n’iyo batsinda uyu mukino nta gahimbazamusyi bagomba guhabwa kuko ari umukino utagize icyo umariye Ghana.

Ni umukino uteganyijwe kuba kuri uyu wa Gatandatu saa Kumi n’imwe za Kigali (17:30), bizaba ari saa Cyenda (15:30) zo muri Ghana.

saa Kumi n’ebyiri n’igice z’i Accra (18:30)

Abazamu: Ndayishimiye Eric (Rayon Sport) na Marcel Nzarora (Police Fc)

Ba myugariro: Rusheshangoga Michel (APR FC), Imanishimwe Emmanuel (APR FC), Ndayishimiye Celestin (Police FC), Munezero Fiston (Rayon Sports), Rugwiro Herve (APR Fc), Usengimana Faustin (APR FC) na Manzi Thierry (Rayon Sports).

Abakina hagati:Mugiraneza Jean Baptiste (Azam FC), Mukunzi Yannick (APR FC), Niyonzima Ally (Mukura VS), Niyonzima Haruna (Young Africans),Nshuti Savio Dominique (Rayon Sports), Hakizimana Muhadjiri (APR FC) na Habyarimana Innocent (APR FC)

Ba rutahizamu: Sugira Ernest (AS Vita) na JacquesTuyisenge (Gor Mahia)

Kapiteni Haruna yatangaje ko bagiye kurwanira ishema ry'igihugu no gushaka uko bakwiyunga n'abafana
Rutahizamu wa Vita Club, Sugira Ernest witezweho ibitego

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza