Amavubi yakoze ibyo yasezeranyije Abanyarwanda, ahagama Ghana iwayo

Yanditswe na Ishimwe Israel
Kuya 3 Nzeri 2016 saa 10:08
Yasuwe : XX
0

Ikipe y’Igihugu Amavubi yanganyije na Ghana igitego 1-1 mu mukino wa nyuma mu itsinda H mu guhatanira itike y’igikombe cya Afurika cya 2017 kizabera muri Gabon.

Ni umukino waberaye kuri Accra Sports Stadium ku mugoroba wo kuri uyu wa Gatandatu, tariki ya 3 Nzeli 2016.

Samuel Tetteh niwe wafunguye amazamu ku ruhande rwa Black Stars ku munota wa 24 mu gihe Muhadjiri Hakizimana yatsinze igitego cyo kwishyura ku ruhande rw’Amavubi ku munota wa 83 w’umukino.

Ni umukino watangiye Ghana yahabwaga amahirwe yotsa igitutu ikipe y’igihugu, Amavubi itozwa na Jimmy Mulisa ndetse ku munota wa mbere gusa, abasore ba Ghana bari bafite ishyaka ryinshi babonye uburyo bukomeye bwo kunyeganyeza inshundura ariko umuzamu Ndayishimiye Eric Bakame ababera ibamba.

Iyi kipe yakomeje gusatirwa bikomeye binyuze kuri myugariro Baba Rahman wakiniraga cyane mu gice cy’u Rwanda ariko Bakame akomeza kwitwara neza akuramo uburyo bw’ibitego byabazwe.

Ku munota wa 22, kuri coup franc nziza yatewe na Alfred Duncan, Bakame nayo yayikuyemo ariko nyuma y’iminota ibiri gusa ku makosa ya ba myugariro b’u Rwanda, Samuel Tetteh ahita afungura amazamu.

Ni umukino nk’uko kapiteni Haruna Niyonzima yari yabitangaje wari uwo kurwanira ishema ry’igihugu kuko amahirwe yo kubona itike yo yari yararangiye nyuma yo gutsindwa na Mozambique ibitego 3-2 i Kigali.

Igice cya mbere cyarangiye Amavubi adateye na rimwe mu izamu rya Ghana ndetse uburyo bukomeye bwabonetse ni ubwa Faustin Usengimana ku munota wa 30 ariko ntiyabubyaza umusaruro.

Mu gice cya kabiri Amavubi yakomeje kurushwa mbere y’uko umutoza Jimmy Mulisa afata icyemezo akuramo rutahizamu Sugira Ernest ku munota wa 67 yinjiza Muhadjili Hakizimana, rutahizamu watsinze ibitego 16 muri shampiyona umwaka ushize.

Uyu murumuna wa kapiteni Haruna Niyonzima bari bagiye gufatanya hagati mu kibuga, yahise ahindura umukino Amavubi atangira gusatira no gushyira igitutu kuri Ghana.

Ku munota wa 83 ku ikosa yari akorewe, Hakizimana Muhadjili yateye coup franc maze umuzamu wa Ghana, Razak Brimah ukinira Cordoba yo muri Espagne ashiduka inshundura zanyeganyeze.

Jimmy Mulisa yahise akuramo Yannick Mukunzi yinjiza Ally Niyonzima ndetse mu minota ya nyuma akuramo Savio Dominique Nshuti ashyiramo Innocent Habyarimana.

Umutoza wa Ghana, Umunya-Israel Avram Grant yakoze impinduka yinjiza abakinnyi nka Jordan Ayew wari wabanje ku ntebe y’abasimbura ariko ntiyafasha ikipe ye gutsinda Amavubi yatozwaga na Jimmy Mulisa yungirijwe na Mashami Vincent.

Iminota 90 yarangiye amakipe yombi anganya 1-1, ku mukino wa mbere nk’umutoza mukuru w’Amavubi, Jimmy Mulisa akora amateka anganyiriza n’ikipe ya Kabiri muri Afurika iwayo.

Ghana isoje imikino yo mu itsinda H ari iya mbere n’amanota 14 mu gihe u Rwanda rufite amanota 7 ku mwanya wa kabiri.

Abakinnyi babanjemo ku mpande zombi:

Ghana: Razak Braimah, Harrison Afful, Baba Rahman, Edwin Gyimah, Jonathan Mensah ,Patrick Partey, Agyemang Badu, Alfred Duncan, David Accam, Samuel Tetteh na Frank Acheampong.

Rwanda: Ndayishimiye Eric Bakame, Rusheshangoga Michel, Ndayishimiye Celestin, Rugwiro Herve, Usengimana Faustin, Mugiraneza Jean Baptiste Migi, Haruna Niyonzima , Tuyisenge Jacques, Mukunzi Yannick , Sugira Ernest, na Nshuti Dominique Savio.

Samuel Tetteh yishimira igitego cya mbere cya Black Stars
Abakinnyi ba Ghana bishimira igitego cya mbere cyatsinzwe na Samuel Tetteh
Kapiteni wa Ghana, Emmanuel Agyemang Badu ahanganye na Celestin Ndayishimiye
Emmanuel Agyemang Badu ahanganye na Yannick Mukunzi
Yannick Mukunzi agundagurana n'abakinnyi ba Ghana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza