Amavubi yakiranywe akanyamuneza i Kigali, Mashami yemeza ko igihe cyo gutsinda kigeze (Amafoto)

Yanditswe na Ndayikunda Josué
Kuya 23 Nzeri 2019 saa 06:43
Yasuwe :
0 0

Ikipe y’igihugu y’umupira w’amaguru, Amavubi, yagarutse i Kigali nyuma yo kwisasira Ethiopia ikayitsinda igitego 1-0, mu mukino wa mbere w’ijonjora rya nyuma ryo gushaka itike y’Igikombe cya Afurika cy’abakinnyi bakina imbere mu gihugu, CHAN 2020 wabereye Makelle muri Ethiopia.

Amavubi yageze ku kibuga cy’indege mpuzamahanga cya Kigali ku gicamutsi cyo kuri uyu wa Mbere, yakiranwa akanyamuneza n’abafana bari babukereye nubwo batari benshi cyane.

Umutoza w’Amavubi, Mashami Vincent, yavuze ko gushyira hamwe, kumvira abatoza biri mu byabafashije gustindira Ethiopia i Mekelle, yongeraho ko igihe cyo gutsinda ku Mavubi kigeze.

Yagize ati “Nagiye mbivuga ko dufite ikipe nziza, mu buryo twagiye dutsindwa mu mikino twagiye dukina hano i Kigali yaba kuri Côte d’Ivoire, yaba Guinee, yaba Centrafrique, byabaga ari ku maherere ariko navuga ko igihe cyacu natwe cyageze kugira ngo dutsinde kandi dufite ikipe nziza.”

Sugira Ernest watsinze igitego kimwe rukumbi Amavubi yabonye kuri Ethiopia, yavuze ko bari banyotewe no kwitwara neza bakinira hanze, yongeraho ko gutsinda igitego Repubulika Iharanira Demokarasi ya Congo mu mukino wa gicuti baheruka kuyitsindamo 3-2 byamuhaye imbaraga n’icyizere byo gutsinda Ethiopia dore ko atari n’ubwa mbere yarayibonyemo igitego.

Mu mikino mpuzamahanga ine iheruka, Amavubi yose yarayitsinze bikaba intangiriro nziza ku mutoza Mashami, uri gukorera ku mihigo ikubiye mu masezerano y’umwaka umwe aherutse guhabwa muri Kanama 2019.

Biteganyijwe ko umukino wo kwishyura u Rwanda ruzakiramo Ethiopia uzabera i Kigali tariki ya 18 Ukwakira 2019, ukabera kuri Stade ya Kigali I Nyamirambo saa 15:00.

Amavubi nabasha gukuramo Ethiopia azahita akatisha itike yo kwitabira imikino ya CHAN 2020 iteganyijwe kubera muri Cameroun muri Mutarama umwaka utaha.

Hari abafana baje kwakira Amavubi avanye intsinzi muri Ethiopia
Umunyezamu Bakame ari kumwe na Mutsinzi Ange basohoka ku kibuga cy'indege
Bakame yitwaye neza mu mukino u Rwanda rwatsinzemo Ethiopia
Aimable Nsabimana yageze i Kigali amwenyura
Manishimwe Djabel ari mu bitwaye neza mu mukino u Rwanda rwatsinzemo Ethiopia
Rutanga Eric, kapiteni wa Rayon Sports ageze i Kigali
Imran Nshimiyimana yishimiwe cyane n'umwana we
Sugira Ernest niwe watsinze igitego rukumbi cy'Amavubi
Umunyezamu Kimenyi Yves ntiyabashije gukina kubera ibyangombwa
Iradukunda Eric na Niyonzima Sefu bageze i Kanombe
Sugira yaririmbwe n'abafana benshi
Abatoza b'Amavubi bageze i Kigali n'ishema
Amavubi yageze ku kibuga cy’indege mpuzamahanga cya Kigali ku gicamutsi cyo kuri uyu wa Mbere
Abakinnyi burira imodoka ku kibuga cy'indege
Mutsinzi Ange na Rutanga Eric bageze muri Bisi
Sugira yavuze ko banyotewe no gutsinda cyane
Mashami yavuze ko igihe cyo gutsinda kigeze

Amafoto: Niyonzima Moise


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza