Amavubi yakinnye nk’indwanyi nyazo: Amanota y’abakinnyi b’u Rwanda kuri Uganda

Yanditswe na Eric Tony Ukurikiyimfura
Kuya 19 Mutarama 2021 saa 10:24
Yasuwe :
0 0

Ikipe y’u Rwanda ‘Amavubi’ yaraye inganyije ubusa ku busa n’iya Uganda mu mukino wa mbere wo mu itsinda C rya CHAN 2020.

Amavubi arasabwa kwihagararaho imbere ya Maroc ku wa Gatanu kugira ngo akomeze kugira icyizere cyo kuzarenga amatsinda y’iri rushanwa riri kuba ku nshuro ya gatandatu muri Cameroun.

Nubwo Uganda ari yo yihariye umupira cyane, ariko Amavubi ni yo yabonye uburyo bukomeye bwashoboraga kuvamo ibitego.

Umunyamakuru wa IGIHE yakoze isesengura ry’uyu mukino, atanga amanota ku buryo abakinnyi b’Amavubi bitwaye.

Kwizera Olivier 6.5

Nta kazi gakomeye yabonye muri uyu mukino ndetse yagerageje gushyira ubwugarizi bwe ku gitutu kugira ngo buhagarare neza ndetse na we asohoka neza aho byari ngombwa harimo n’aho yasigaranye na Brian Aheebwa amutanga umupira.

Omborenga Fitina 8

Ni we watowe nk’umukinnyi w’umukino. Uretse kugarira neza, agafunga uruhande rw’abarimo Vianney Ssekajugo, yaremye uburyo bwinshi butandukanye burimo umupira washyizwe ku mutwe na Tuyisenge mu minota ya nyuma y’igice cya mbere ugakubita igiti cy’izamu.

Imanishimwe Emmanuel 7.5

Ni umukinnyi w’u Rwanda wakinnye neza. Yakoze neza ku mupira wa Brian Aheebwa yahinduriye icyerekezo mu minota 23 ya mbere. Yagerageje kandi kurema uburyo butandukanye bugana ku izamu rya Uganda, akorerwa amakosa arimo n’iryavuyemo ikarita y’umuhondo yahawe Joachim Ojera mu gice cya mbere n’iyahawe Paul Willa mu gice cya kabiri.

Mutsinzi Ange 7.5

Myugariro wakinanye imbaraga, ubwenge n’ubwitange, akuraho imipira itandukanye irimo uwatewe na Milton Karisa mbere yo kuvunika ndetse agafasha bagenzi be bo ku mpande.

Manzi Thierry 7

Yagerageje kugabanya igitutu yari amaze iminsi agaragaza mu mikino ikomeye nk’iyi nubwo hari umupira yatakaje, ariko gukinana na Mutsinzi Ange bamenyeranye byamufashije gukina atuje. Yagerageje kandi gukanga rutahizamu wa Uganda, Brian Aheebwa, ku ikosa yamukoreye ku munota wa 28.

Niyonzima Olivier 7

Umwanya akinaho ntumwemerera kugaragara cyane mu kibuga cyane ko umupira yawukoragaho gato, agerageza kwica umukino wuje guhanahana cyane kw’abakinnyi ba Uganda, byamuviriyemo gukora amakosa atandukanye ariko yirinda kubona amakarita.

Kalisa Rachid 7

Nibake bamuhaga amahirwe yo gukina mu byumweru bibiri bishize, ariko uko yitwaye ku mukino wa gicuti wa Congo ni nako yabigaragaje kuri Uganda mu minota 60 yakinnye mbere yo kuvunika. Ikarita y’umuhondo yabonye ku mupira Muhadjiri yatakaje yagerageje kuyirinda afatanya na Niyonzima Olivier, bica umukino wa Uganda yihariraga umupira cyane, byatumye abarimo Bright Anukani batagaragara.

Iradukunda Bertrand 6.5

Ntabwo yakoze ibyo yari yitezweho birimo guhindura imipira myinshi igera kuri rutahizamu no gushyira igitutu ku bwugarizi, ariko yafatanyije na bagenzi be gukina, ahinduranya na Omborenga Fitina wazamukaga cyane. Yahushije uburyo yagerageje mu gice cya kabiri ndetse ikosa yakoreweho mu gice cya mbere, ryahanwe na Muhadjiri, bwari uburyo bwiza ku Amavubi.

Tuyisenge Jacques 7.5

Nk’umukinnyi wari uyoboye bagenzi be ndetse uri gukina iri rushanwa ku nshuro ya gatatu kuva mu 2011, yagaragaje guhatana, aho yisangaga mu bwugarizi bwa Uganda wenyine. Tuyisenge umaze iminsi akinira ku mvune, yakorewe ikosa hakiri kare ariko yagerageje uburyo bwinshi butandukanye ndetse aba umunyamahirwe make ku mupira yateye n’umutwe ugakubita igiti cy’izamu mbere y’uko igice cya mbere kirangira.

Hakizimana Muhadjiri: 7.5

Birashoboka ko yari kuba umukinnyi w’umukino iyo adasimburwa na Manishimwe Djabel. Ishoti rikomeye ryo ku munota wa 30 yateye nyuma yo gucenga abakinyi batatu ba Uganda ni bwo buryo bukomeye bw’ingenzi mu mukino. Yigaragaje nk’umukinnyi ufite ubuhanga bwihariye, akorerwa amakosa arimo irya Tony Mawejje mu minota ya mbere y’igice cya kabiri.

Nshuti Dominique Savio: 7

Hari abiyumvisha ko atari gusoza umukino, ariko yagize uruhare cyane mu mikinire ya Imanishimwe Emmanuel, basimburana mu kugarira no gufunga uruhande rw’iburyo rwa Uganda. Yaremye kandi uburyo bw’umupira watewe na Tuyisenge n’umutwe mu gice cya mbere.

Abasimbura

Nsabimana Eric: 5.5

Yakinnye iminota 30 ya nyuma asimbuye Kalisa Rachid ndetse agerageza guhuza na Niyonzima nubwo Uganda yarushijeho kwiharira umupira.

Usengimana Danny 5.5

Yakinnye iminota 18 ya nyuma asimbuye Iradukunda Bertrand. Yatakaje umupira wamuviriyemo gukora ikosa ryamuhesheje ikarita y’umuhono akiniye nabi Ben Ocen, agerageza ishoti ryagiye ku ruhande rw’izamu.

Manishimwe Djabel 5

Yakinnye iminota 10 ya nyuma asimbuye Hakizimana Muhadjiri. Nta byinshi yakoze uretse umupira wo hasi yagerageje akigera mu kibuga, ufatwa n’umunyezamu Charles Lukwago.

Umutoza Mashami Vincent: 7

Kugirira icyizere Manzi Thierry ndetse akwitwara neza bigaragaza ko azi abakinnyi be ndetse ashobora kubategura neza mu mutwe. Amavubi yishe umukino wa Uganda kandi akina nta gitutu ndetse binyuze ku mpande zayo ubundi zakundaga kutaragaraga, ikipe y’Igihugu yabonye uburyo bwari kuvamo ibitego.

U Rwanda rwanganyije na Uganda mbere yo guhura na Maroc ku wa Gatanu muri CHAN 2020 iri kubera muri Cameroun

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .