00:00:00 IGIHE NETWORK KN KINYARWANDA EN ENGLISH FR FRANCAIS

Amavubi adafite icyo aharanira yiyemeje guhangara Mali

Yanditswe na Eric Tony Ukurikiyimfura
Kuya 11 Ugushyingo 2021 saa 07:35
Yasuwe :
0 0

Ikipe y’Igihugu ‘Amavubi’ irakina na Mali kuri uyu wa Kane, tariki ya 11 Ugushyingo saa Kumi n’ebyiri, iharanira ishema nyuma y’uko yamaze gusezererwa mu ijonjora rya kabiri ryo gushaka itike y’Igikombe cy’Isi cya 2022.

U Rwanda rurakina uyu mukino w’umunsi wa gatanu wo mu Itsinda E ubera i Nyamirambo, rudafite myugariro Rutabayiro Jean-Philippe utarabona ibyangombwa nk’uko byemejwe n’Umutoza Mashami Vincent.

Ati “Kuri Rutabayiro, turacyabirimo, ntabwo ibyangombwa bishobora guhita biboneka mu munsi umwe, ntabwo umuntu ashobora kubona ibyangombwa adahari ngo kuko ari Umunyarwanda, agomba kuzuza ibisabwa byose nk’uko kuri Rafael York byagenze.”

Yakomeje agira ati “Impamvu nyamukuru yo kumuhamagara ni ukugira ngo dukomeze dushishikarize abana b’Abanyarwanda bakina i Burayi muri shampiyona zitandukanye kugira ngo bashobore kutugeza kuri benshi bariyo ndetse bashobore no kubakundisha igihugu cyabo muri rusange.”

Nirisarike Salomon wageze i Kigali mu gitondo cyo ku wa Gatatu, ntiyakoranye n’abandi imyitozo ya nyuma, ariko umutoza Mashami yavuze ko ashobora gukora ku giti cye nimugoroba.

Ati “Amaze iminsi akina, nta kibazo tumufiteho. Namara kuruhuka neza, araza gukora imyitozo ye kandi biraza kumufasha kumera neza.”

Kapiteni w’Ikipe y’Igihugu, Niyonzima Haruna, we yavuze ko babizi ko ntacyo uyu mukino ubamariye mu rugendo rugana mu Gikombe cy’Isi cya 2022, ariko bagomba kuwutsinda kugira ngo biyunge n’Abanyarwanda ndetse baheshe igihugu ishema.

Ati “Turabizi ko tudashobora kurenga iki cyiciro ariko icyo dushaka ni ishema ry’igihugu cyacu, ni ukwereka Abanyarwanda ko igihe cyose tuba dushaka kubaha ibyishimo.”

“Gutsinda ikipe nka Mali ni urundi rwego, murabizi ko dufite n’undi mukino wa Kenya, dutsinze byadutera imbaraga ku mukino wa nyuma. Buri mukino uba ufite icyo uvuze.”

Ku ruhande rwa Mali, yo irakirwa n’Amavubi idafite Cheikh Doucouré utararekuwe n’ikipe ya RC Lens mu Bufaransa ndetse na Amadou Danté wanduye COVID-19.

Nyuma y’imikino ine imaze gukinwa mu Itsinda E, u Rwanda ruri ku mwanya wa nyuma n’inota rimwe rukurikiye Kenya ifite amanota abiri.

Mali ifite amanota 10 na Uganda ifite amanota umunani ni byo bizavamo igihugu kimwe kizakomeza mu ijonjora rya nyuma rizakinwa muri Werurwe 2022 rigatanga amakipe atanu azahagararira Afurika mu Gikombe cy’Isi kizabera muri Qatar.

Amavubi yamaze gusezererwa mu majonjora yo gushaka itike y'Igikombe cy'Isi, arakina na Mali kuri uyu wa Kane
Rutabayiro Jean-Philippe ntarabona ibyangombwa byo gukinira u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .