Amashirakinyoma ku myambaro y‘Amavubi yavugishije benshi

Yanditswe na Eric Tony Ukurikiyimfura
Kuya 18 Mutarama 2021 saa 11:06
Yasuwe :
0 0

Imyambaro Ikipe y’Igihugu ‘Amavubi’ izakinana muri Shampiyona Nyafurika ihuza abakinnyi bakina imbere mu bihugu byabo (CHAN 2020) ikomeje kuvugisha benshi bitewe n’amakosa yabaye mu kuyandikaho amazina.

Kuri uyu wa Mbere, Ishyirahamwe ry’Umupira w’Amaguru mu Rwanda (FERWAFA) ryasohoye itangazo ryisegura ku Banyarwanda ku makosa yabaye mu kwandika ku myambaro y’abanyezamu b’Amavubi, aho bigaragara ko habanje gusibwa ijambo “RWANDA”.

Umwambaro Amavubi yamuritse azaserukana muri CHAN 2020 ni mushya nk’uko Ishyirahamwe ry’Umupira w’Amaguru mu Rwanda ryabitangaje ariko ntugezweho kuko ni ubwoko bwakozwe n’uruganda rwa Errea rwo mu Butaliyani mu mwaka w’imikino wa 2017-18, aho buri mwaka rusohora umwambaro (version) ugezweho.

Byagenze bite kugira ngo aya makosa abeho?

Kuva mu 2013, binyuze muri Komite Olempike y’u Rwanda, uwayiyoboraga, Robert Bayigamba, yasinyanye amasezerano n’uruganda rwa Errea rwo mu Butaliyani ngo rujye rwambika amakipe y’u Rwanda ndetse ruyahe ibikoresho bitandukanye ruyagabanyirije 40% ku biciro bisanzwe.

Aya masezerano yabaye nk’ahagaze gato muri Kamena 2015 ubwo FERWAFA yasinyanaga amezi atandatu n’uruganda rwa AMS rwo muri Australia, aha birumvikana ko uwatozaga Amavubi icyo gihe, Johnathan McKinstry, yabigizemo uruhare dore ko urwo ruganda rwakoranaga na Sierra Leone yari amaze igihe atoza.

AMS Clothing yambitse bwa mbere Amavubi ku mukino ubanza w’amajonjora y’Igikombe cya Afurika yakiniye muri Mozambique agatsinda igitego 1-0 cyatsinzwe na Sugira Ernest i Maputo.

Amasezerano y’uru ruganda na FERWAFA yavugaga ko igihe impande zombi zitanyurwa zitakongera gukorana. Yararangiye ntiyongerwa, uruganda rwa Errea rwo mu Butaliyani rusanzwe rwambika andi makipe y’Igihugu y’u Rwanda mu yindi mikino, rwongera kwambika Amavubi uhereye muri CHAN 2016.

Ubusanzwe hari miliyoni 100 Frw Minisiteri ya Siporo igenera buri shyirahamwe ry’imikino mu Rwanda, atangwa buri myaka ibiri, agenewe ibikoresho birimo n’imyambaro y’amakipe y’Igihugu. Kuri FERWAFA, yo igenerwa kandi n’Ishyirahamwe ry’Umupira w’Amaguru ku Isi (FIFA) ibihumbi bisaga 200$ yo kugura ibikoresho birimo imyambaro ndetse hakabamo agenewe ibijyanye n’amacumbi ku makipe y’Igihugu.

Mu 2018, hari amarushanwa menshi ku makipe y’Igihugu mu mupira w’amaguru arimo CECAFA y’abagore, gushaka itike y’Igikombe cya Afurika ku batarengeje imyaka 23 no gushaka itike y’Igikombe cya Afurika cya 2019 ku ikipe y’Igihugu nkuru y’abagabo.

Ibi byatumye muri uwo mwaka, FERWAFA igura imyambaro myinshi yakozwe mu mwaka w’imikino wa 2017-18, nk’iyi Amavubi yajyanye muri CHAN 2020, aho hari hakozwe imyambaro itandatu ku mukinnyi umwe kandi ku mabara atandukanye arimo umuhondo (wambarwa mu rugo), ubururu (bwambarwa hanze) n’icyatsi (nk’umwambaro wa gatatu). IGIHE yamenye ko ubwo iyi myambaro yageraga i Kigali, kuri buri mwambaro haje ibiri gusa, ku ruganda rwa Errea mu Butaliyani hasigara imyambaro 276.

Ubwo u Rwanda rwajyaga gukina amajonjora ya mbere yo gushaka itike y’Igikombe cy’Isi cya 2022 kizabera muri Qatar, yagombaga gukinisha umwambaro mushya kuko IGIHE yumvise ko FIFA ikurikirana cyane kureba niba mu marushanwa yayo amakipe yambara imyenda igezweho kuko iba yarahaye amashyirahamwe y’imikino amafaranga yo kuyigura. Nibwo haguzwe umwambaro wa Errea uri kwambarwa ubu, ufite ibara ry’ubururu mu gatuza (ku muhondo wambarwa mu rugo) n’ibara ry’umuhondo mu gatuza (ku bururu bwambarwa hanze).

Nyuma yo kubona itike ya CHAN 2020 mu Ukwakira 2019, FERWAFA yagombaga gushaka umwambaro wihariye Amavubi azajyana muri iri rushanwa ryari kubera muri Cameroun muri Mata 2020 kandi ukaba wanditseho amazina y’abakinnyi mu gihe iyari isanzwe, yose yari yanditseho Rwanda. Hatumijwe ya yindi yasigaye mu Butaliyani mu 2018, igera i Kigali muri Mutarama 2020.

Icyo gihe nibwo hagaragaye ko imyambaro y’abanyezamu yaje yanditseho “RWANDA” kandi nayo yari kwandikirwaho amazina i Kigali. Ikitumvikana n’uburyo imyambaro y’abanyezamu yatumijwe mu Butaliyani kuva icyo gihe ariko bikaba byarageze muri Mutarama 2021 itaraboneka kugeza ubwo igisubizo kibaye gusiba ibyari byanditse ku yaje mbere, hagashyirwaho amazina.

Mu gusobanura ibi, Ishyirahamwe ry’Umupira w’Amaguru mu Rwanda (FERWAFA) ryagize riti “Byaje kugaragara ko habaye ikosa ku myenda y’abanyezamu kuko yaje yanditseho izina ry’Igihugu kandi yaragombaga kuza nta kintu cyanditseho kugira ngo hazandikweho amazina y’abakinnyi.”

“Mu gushaka igisubizo, hahise hatumizwa indi myenda y’abanyezamu ariko bitewe n’icyorezo cya COVID-19, iyo myenda ntiyabashije kuzira igihe nk’uko byari biteganyijwe ari nayo mpamvu yatumye imyenda y’abazamu yandikwaho amazina habanje gusibwa ibyari byanditsweho.”

Si ku nshuro ya mbere Amavubi aserukanye umwambaro utajyanye n’igihe dore ko muri CHAN 2018 yabereye muri Maroc, Ikipe y’Igihugu yambaye uwakozwe na Errea mu mwaka w’imikino wa 2014-15.

Ikipe y’Igihugu ‘Amavubi’ iratangira urugendo rwayo muri CHAN 2020 kuri uyu wa Mbere saa tatu z’ijoro, aho yisobanura na Uganda mu mukino ubanzirizwa n’uhuza Maroc na Togo biri kumwe mu itsinda C rikinira i Douala.

Umwambaro Amavubi atangira guserukana muri CHAN 2020 kuri uyu wa Mbere tariki ya 18 Mutarama 2021
Amakosa yagaragaye ahanditse amazina y'abakinnyi yavugishije abatari bake
Amazina y'abanyezamu yanditswe habanje gusibwa ijambo RWANDA
Ikipe y'Igihugu y'Abagore yabimburiye ayandi kwambara uyu mwambaro muri CECAFA yabaye muri Nyakanga 2018 i Kigali

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .