Amakipe 20 yinjije menshi ku Isi, amadeni ya Barcelone, COVID-19 muri Premier League…agezweho mu mikino hanze

Yanditswe na Eric Tony Ukurikiyimfura
Kuya 26 Mutarama 2021 saa 12:40
Yasuwe :
0 0

FC Barcelone na Real Madrid ziyoboye urutonde rw’amakipe yinjije amafaranga menshi mu mwaka w’imikino wa 2019/20, rwakozwe n’ikinyamakuru Deloitte.

Liverpool yashyizwe kuri uru rutonde, iza ku mwanya wa gatanu, ku nshuro ya mbere mu myaka 20. Rukorwa hashingiwe ku mafaranga amakipe yinjije mu mwaka w’imikino.

Barcelone yisanze ku mwanya wa mbere ikurikiwe na Real Madrid yatwaye La Liga mu gihe Bayern Munich yatwaye UEFA Champions League, iri ku mwanya wa gatatu.

Manchester United yasubiye inyuma umwanya umwe nyuma yo kutitabira Champions League mu mwaka ushize w’imikino mu gihe Liverpool yabaye iya gatanu kubera ibikombe iheruka kwegukana birimo icya Champions League n’icya Premier League.

Amakipe 20 ya mbere:

Mu dukubo, ni umwanya ikipe yariho ubushize

  • 1 (1) Barcelona £627.1 (£741.1)
  • 2 (2) Real Madrid £627 (£667.5)
  • 3 (4) Bayern Munich £556.1 (£581.8)
  • 4 (3) Manchester United £509 (£627.1
  • 5 (7) Liverpool £489.9 (£533)
  • 6 (6) Manchester City £481.6 (£538.2
  • 7 (5) PSG £474.1 (£560.5)
  • 8 (9) Chelsea £411.9 (£452.2)
  • 9 (8) Tottenham £390.9 (£459.3)
  • 10 (10) Juventus £349 (£405.2)
  • 11 (11) Arsenal £340.3 (£392.4)
  • 12 (12) Borussia Dortmund £320.7 (£327.6)
  • 13 (13) Atletico Madrid £291 (£324)
  • 14 (14) Inter Milan £255.6 (£321.3
  • 15 (28) Zenit £207.4 (£159)
  • 16 (15) Schalke £195.4 (£286.3)
  • 17 (19) Everton £185.9 (£185.5)
  • 18 (17) Lyon £158.5 (£194.7)
  • 19 (20) Napoli £154.6 (£182.8)
  • 20 (27) Eintracht Frankfurt £152.6 (£160.6)
Liverpool yashyizwe ku rutonde rw'amakipe yinjije amafaranga menshi nyuma y'imyaka 20

=====================================================

FC Barcelone ibereyemo andi makipe amadeni asaga miliyari 110 Frw

FC Barcelone igomba kwishyura andi makipe 19 agera kuri miliyoni £112 (hafi miliyari 152 Frw) ku bakinnyi yaguze nk’uko byagaragajwe na raporo y’umutungo yashyizwe hanze ku wa Mbere.

Muri uwo mwenda, harimo miliyoni £25 zizahabwa Liverpool ziyongera kuri miliyoni £142 zishyuwe bwa mbere hagurwa Philippe Coutinho mu myaka itatu ishize.

Ku ikubitiro, FC Barcelone yishyuye miliyoni £105, yemera ko izajya yishyura asigaye mu byiciro.

FC Barcelone igomba kandi kwishyura Bordeux miliyoni £8.8 kuri Malcom, miliyoni £7 kuri Arthur Melo (kuri ubu wagiye muri Juventus) n’andi miliyoni £14 azahabwa Ajax kuri Frenkie de Jong.

Iyi kipe yo muri Espagne ivugwaho kuba ifite ideni ry’igishoro kingana na miliyoni 535£ mu gihe kandi hari na miliyoni 89£ yagujije.

Mu mwaka ushize w’imikino, yari yiyemeje kuba ikipe ya mbere yinjije miliyari 1£, ariko ikomwa mu nkokora n’icyorezo cya COVID-19 ndetse mu Ukwakira 2020, yatangaje ko imyenda yayo yikubye inshuro ebyiri.

Mu gushaka igisubizo, yagabanyirije abakinnyi imishahara, ininjiza agera kuri miliyoni 71£ nyuma yo kugurisha Nelson Semedo, Arthur, Ivan Rakitić na Marc Cucurella.

FC Barcelone ntirarangiza kwishyura amafaranga igomba guha Liverpool kuri Philippe Coutinho

======================================================

Muri Premier League habonetse ubwandu bushya umunani

Shampiyona y’Icyiciro cya Mbere mu Bwongereza (Premier League) yatangaje ko ibipimo biheruka gufatwa amakipe byagaragaje ko hari abarwayi umunani bashya ba COVID-19.

Mu bakinnyi n’abandi bakozi b’amakipe 2518 bapimwe, umunani ni bo byagaragaye ko banduye, aho bagabanyutse ugereranyije na 40 bari babonetse hagati ya tariki ya 28 Ukuboza n’iya 3 Mutarama 2021.

Kuva Premier League y’uyu mwaka itangiye, hamaze kuboneka abarwayi 231 ba COVID-19 mu bipimo 36,615 byafashwe (abarwayi bangana na 0.6%).

Imikino itandatu ni yo imaze gusubikwa muri Shampiyona y’u Bwongereza bitewe na COVID-19 irimo uwari guhuza Aston Villa na Everton ku wa 24 Mutarama.

Imikino itandatu ya Premier League imaze gusubikwa kubera COVID-19

=======================================================

Gushwana na Granovskaia biri mu byatumye Lampard yirukanwa

Frank Lampard yirukanywe muri Chelsea nyuma yo kudahuza n’Umuyobozi wayo ushinzwe igura n’igurishwa ry’abakinnyi, Marina Granovskaia, kubera uburyo yafashemo umunyezamu Kepa Arrizabalaga ndetse akaba yarashakaga ko hagurwa Declan Rice.

Lampard w’imyaka 42, yeretswe umuryango ku wa Mbere, asiga Chelsea iri ku mwanya wa cyenda muri Premier League.

Ikinyamakuru The Athletic cyatangaje ko imwe mu mpamvu zatumye uyu mutoza yirukanwa harimo umubano utari mwiza yari afitanye na Granovskaia kubera ibyo batumvikanagaho.

Kudahuza kw’abo bombi kwatangiye mu mezi 12 ashize ubwo Lampard yanengaga mu ruhame uburyo Chelsea yitwaye ku isoko ryo mu kwa mbere.

Kuba umunyezamu Kepa ataritwaye neza, agakora amakosa menshi akomeye mu kibuga byatumye Lampard yifuza umunyezamu mushya, ariko asabwa gufasha uyu munyezamu kwigirira icyizere.

Kepa waguzwe miliyoni 72£ ntiyishimiye uburyo Lampard yitwaye mu kibazo cye, ariko yari ashyigikiwe n’ubuyobozi gusa birangira haguzwe Edouard Mendy wakinaga muri Rennes.

Gushyiraho igitutu ubuyobozi ngo businyishe Declan Rice wo muri West Ham, biri mu byashwanishije uyu mutoza n’ubuyobozi kuko byari kubusaba hafi miliyoni 70£.

Chelsea ikomeje gushaka umusimbura we, ariko uhurizwaho ni Umudage Thomas Tuchel uheruka gutandukana na Paris Saint- Germain yo mu Bufaransa.

Frank Lampard yirukanywe na Chelsea ku wa Gatandatu
Kudahuza n'abarimo Marina Granovskaia biri mu byatumye Frank Lampard yerekwa umuryango
Uburyo Lampard yitwaye mu kibuga cya Kepa Arrizabalaga na byo biri mu byamuhaye amanota make imbere y'ubuyobozi bwa Chelsea

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .