Kwamamaza

Mulisa yagerewe mu kebo ka Kanyankore yamburwa Amavubi nyuma y’iminsi ine

Yanditswe kuya 29-10-2016 saa 14:05' na Manzi Rema Jules


Nyuma y’iminsi ine gusa Ishyirahamwe ry’umupira w’amaguru mu Rwanda, Ferwafa, ritangaje ko Jimmy Mulisa ariwe mutoza uzajyana Amavubi y’abatarengeje imyaka 20 (U20) mu marushanwa abiri agiye kwitabira arimo iryo muri Maroc na Cosafa, yamaze kuyamburwa ihabwa Mashami Vincent.

Kuwa Kabiri w’iki Cyumweru, tariki 25, nibwo Ferwafa yatangaje ko yatumiwe mu marushanwa abiri arimo iryateguwe n’Ishyirahamwe ry’umupira w’amaguru muri Maroc rizaba hagati ya tariki 9-13 Ugushyingo n’irihuza ibihugu byo mu Majyepfo ya Afurika (COSAFA 2016) mu batarengeje imyaka 20, rizabera muri Afurika y’Epfo hagati ya tariki 7 na 16 Ukuboza.

Jimmy Mulisa usanzwe atoza Ikipe y’Igihugu, Amavubi akaba n’Umuyobozi wa Tekinike hose yungirije, niwe wari watangajwe ko azajyana iyi kipe muri aya marushanwa ariko mu gihe yiteguraga guhamagara abakinnyi azifashisha yahise yamburwa iyi kipe ihabwa Mashami Vincent.

Aganira na IGIHE Jimmy Mulisa yavuze ko Umuyobozi wa Ferwafa, Nzamwita Vincent de Gaulle yamuhamagaye akamubwira ko ikipe izajyanwa na Mashami ubu we akaba yikomereje akazi ke ko gutegura amadosiye ajyanye na raporo yasabwe na Minisiteri ya Siporo n’Umuco ndetse n’ibijyanye na Shampiyona y’abagore.

Ati “Mu minsi ishize Perezida wa Ferwafa (Nzamwita Vincent de Gaulle) yarampamagaye turaganira ansaba ko najyana Amavubi U 20 muri Maroc. Yambwiye ko ngomba guhamagara abakinnyi batatuma shampiyona ihagarara kandi nkazahura n’abakinnyi hasigaye iminsi itatu ngo tugende.”

Yakomeje agira ati “Twaraganiriye musobanurira ko bigoye kumenya abakinnyi mu gihe gito gutyo, ikindi mwereka inshingano nyinshi mfite muri iki gihe ambwira ko azansubiza. Ejo (kuwa Gatanu) nibwo yampamagaye ambwira ko ikipe bayihaye Mashami.”

Iyi kipe ya U 20 yari yahawe Jimmy Mulisa uherutse kujyana Amavubi Makuru muri Ghana anganya igitego 1-1, hirengagijwe Kayiranga Baptiste na Mashami Vincent bafite amasezerano yo kuyitoza ndetse bayijyanye no mu mikino iherukamo yo gushaka itike y’igikombe cya Afurika cya 2017.

Amakuru agera kuri IGIHE n’uko impamvu nyamukuru yari yatumye Mulisa ahabwa iyi kipe ni uko aba bandi muri iki gihe bafite amakipe mu cyiciro cya mbere batoza, Kayiranga Jean Baptiste muri Pépinière FC na Mashami muri Bugesera FC bikaba bishobora kubangamira Shampiyona bagiye.

Ikibazwa kugeza ubu, ni icyagendeweho Kayiranga arenzwa ingohe ariwe wari Umutoza Mukuru w’Amavubi U 20 igahabwa Mashami Vincent wari usanzwe amwungirije kandi bose bahuje kuba ari abatoza bakuru mu makipe yabo.

Twagerageje kuvugana n’Umuvugizi wa Ferwafa, Dr Mussa Hakizimana atubwira ko adashobora kuvuga kuko yari mu nama.

Si ubwa mbere gufata ibyemezo bihutiweho ku batoza b’ikipe y’igihugu bibayeho muri iyi nzu y’Ishyirahamwe ry’Umupira w’amaguru.

Muri Kanama uyu mwaka, Kanyankore Gilbert ’Yaounde’ yari yatangajwe nk’umutoza uzajyana Amavubi muri Ghana asimbuye Mckinstry wari umaze kwirukanwa ariko biza gutungurana nyuma y’iminsi itatu, we na Eric Nshimiyimana wari umwungirije bayambuwe ihabwa Jimmy Mulisa na Mashami Vincent.

Inkuru bifitanye isano:

Jimmy Mulisa yahawe gutoza Amavubi U-20 yitegura kujya muri Maroc na Afurika y’Epfo

Jimmy Mulisa (iburyo) yambuwe Amavubi y’abatarengeje imyaka 20, ihabwa Mashami Vincent (ibumoso)
Kayiranga Jean Baptiste (ibumoso) yirengagijwe, ikipe ihabwa Mashami Vincent(iburyo) usanzwe amwungirije
Mashami Vincent niwe wahawe inshingano zo gutoza ikipe y'Igihugu, Amavubi y'abatarengeje imyaka 20

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved