00:00:00 IGIHE NETWORK KN KINYARWANDA EN ENGLISH FR FRANCAIS

Agüero agiye gusezera, Ole mu mayira abira, Messi yatsinze muri Ligue 1, Arteta ashyamirana na Klopp… avugwa mu mikino hanze

Yanditswe na Eric Tony Ukurikiyimfura
Kuya 21 Ugushyingo 2021 saa 10:06
Yasuwe :
0 0

Impera z’iki cyumweru ziri kuvugwamo byinshi birimo gusezerera ku mupira w’amaguru kwa Sergio Kun Agüero wagize ikibazo cy’umutima, kwirukanwa kwa Ole Gunnar Solskjaer utoza Manchester United, gutsinda igitego cya mbere muri Ligue 1 kwa Lionel Messi n’ibindi bitandukanye.

Sergio Agüero agiye gusezera ruhago imburagihe

Ku myaka 33, rutahizamu wa FC Barcelone, Umunya-Argentine Sergio Kun Agüero, agiye gusezera ku mupira w’amaguru nyuma yo kugira ikibazo cy’umutima akagirwa inama yo kureka gukina.

Agüero yageze muri FC Barcelone mu mpeshyi y’uyu mwaka, aho yari yizeye ko azakinana n’inshuti ye magara, Lionel Messi, ariko uyu wa nyuma ajya muri Paris Saint-Germain nyuma yo kutongera amasezerano.

Nyuma yo kugira imvune mu mikino yo kwitegura Shampiyona, Agüero yakinnye umukino wa mbere ku wa 17 Ukwakira mu gihe yagize ikibazo ubwo FC Barcelone yari yakiriye Alavés ku wa 30 Ukwakira 2021.

Icyo gihe, yaguye hasi ari wenyine mu kibuga nta kimuteze, ajyanwe kwa muganga byemezwa ko ari ikibazo cy’umutima.

Nyuma y’uyu mukino warangiye ari igitego 1-1, byemejwe ko ashobora kumara amezi atatu adakina ariko kuri ubu yagiriwe inama yo gusezera umupira w’amaguru ndetse byitezwe ko azakoresha ikiganiro n’abanyamakuru mu cyumweru gitaha.

Mu minota 165 y’imikino itanu yari amaze gukiniramo FC Barcelone, yatsinze igitego kimwe ubwo ikipe ye yatsindwaga na Real Madrid ibitego 2-1 muri Shampiyona.

Agüero yamenyekanye cyane akinira Manchester City hagati ya 2011 na 2021, aho yayifashije kwegukana ibikombe bitanu bya Premier League, bibiri bya FA Cup no kugera ku mukino wa Champions League uyu mwaka.

Mbere yaho, yakiniye Atlético Madrid yagezemo avuye iwabo muri Independiente.

Yari muri Argentine yatwaye Copa América muri uyu mwaka wa 2021 n’iyageze ku mukino wa nyuma w’Igikombe cy’Isi mu 2014.

Sergio Agüero yagiriwe inama yo gusezera imburagihe kubera ikibazo cy'umutima

=====================================================

Ole Gunnar Solskjaer agiye kwirukanwa muri Manchester United

Inama y’ubuyobozi ya Manchester United yafashe icyemezo cyo kwirukanwa umutoza Ole Gunnar Solskjaer nyuma y’inama yamaze amasaha atanu ubwo iyi kipe yari imaze kwandagazwa na Watford yayitsinze ibitego 4-1 mu mukino w’umunsi wa 12 wa Premier League wabaye ku wa Gatandatu.

Ikinyamakuru The Times cyo mu Bwongereza cyatangaje ko ubuyobozi bwa Manchester United bwemeye kwishyura uyu mutoza miliyoni 7,5£ kugira ngo asezererwe nubwo yaherukaga gusinya amasezerano mashya y’imyaka itatu muri Nyakanga uyu mwaka.

Gusa, ngo mu masezerano ye hakubiyemo ko mu gihe yakwirukanwa biturutse ku musaruro mubi, azahabwa amafaranga y’umwaka umwe.

Ole Gunnar Solskjaer watsinze umukino umwe, akanganya undi mu mikino irindwi iheruka ya Premier League, yatangiye gutoza Manchester United mu Ukuboza 2018 ubwo yari asimbuye José Mourinho.

Niyirukanwa, araba asize Manchester United iri ku mwanya wa karindwi muri Premier League, irushwa amanota 12 na Chelsea ya mbere.

Darren Fletcher usanzwe ari umuyobozi wa tekinike muri iyi kipe, ni we ushobora kuyihabwa by’agateganyo ku mukino ya Villarreal na Chelsea izaba mu cyumweru gitaha mu gihe Zinedine Zidane na Brendan Rodgers ari bo batoza bari kuvugwa muri iyi kipe.

Umutoza Ole Gunnar Solskjær ashobora kwirukanwa isaha n'isaha

======================================================

Messi yatsinze igitego cya mbere muri Ligue 1

Byasabye Lionel Messi gutegereza umukino we wa gatandatu kugira ngo atsinde igitego cya mbere muri Shampiyona y’Icyiciro cya Mbere mu Bufaransa, Ligue 1.

Messi yabigezeho ubwo yinjizaga igitego cyo ku munota wa 87 aho PSG yaraye itsinze Nantes ibitego 3-1 mu mukino w’umunsi wa 14, iyobora Shampiyona n’amanota 37 irusha 12 ikipe ya Rennes iri ku mwanya wa kabiri.

Uyu mukinnyi w’imyaka 34, yatangiye gukinira PSG ku wa 29 Kanama mu gihe kuri ubu amaze gukina imikino icyenda, atsinda ibitego bine birimo bitatu bya UEFA Champions League.

Kera kabaye, Messi yatsinze igitego muri Ligue 1

======================================================

Xavi yatangiye neza muri FC Barcelone

Umutoza mushya wa FC Barcelone, Xavi Hernández, yitwaye neza ku mukino we wa mbere muri iyi kipe yabereye umukinnyi ukomeye, aho yatsinze mukeba Espanyol igitego 1-0 cyinjijwe na Memphis Depay kuri penaliti yo ku munota wa 48.

Gutsinda uyu mukino byatumye FC Barcelone igira amanota 20 ku mwanya wa gatandatu, irushwa amanota umunani na Seville ndetse na Real Sociedad za mbere.

Mu cyumweru gitaha, Barcelone izahura na Benfica muri Champions League mbere yo kwakirwa na Villarreal muri Shampiyona.

Xavi Hernández yatsinze umukino we wa mbere nk'umutoza wa FC Barcelone

======================================================

Arteta yashyamiranye na Klopp ubwo Liverpool yandagazaga Arsenal

Liverpool yaraye inyagiye Arsenal ibitego 4-0 byinjijwe na Sadio Mané, Diogo Jota, Mohamed Salah na Takumi Minamino.

Icyagarutsweho muri uyu mukino wabereye i Anfield ni ugushyamirana gukomeye kwabaye hagati ya Arteta utoza Arsenal na Jürgen Klopp wa Liverpool mu gice cya mbere ubwo byari bikiri ubusa ku busa.

Aba batoza bombi bahawe amakarita y’umuhondo n’umusifuzi Michael Oliver nyuma yo gutukana no gushaka kurwana bapfa ko umutoza wa Arsenal yasabiye ikarita Sadio Mané wasaga n’ukiniye nabi Takehiro Tomiyasu bahuriye ku mupira wari mu kirere.

Gutsinda uyu mukino byatumye Liverpool ifata umwanya wa kabiri n’amanota 25, irushwa ane na Chelsea yagize amanota 29 nyuma yo kunyagira Leicester City ibitego 3-0.

Arsenal iri ku mwanya wa gatanu n’amanota 20, irushwa atatu na West Ham ya kane, na yo yatsinzwe na Wolves igitego 1-0 ku wa Gatandatu.

Arteta utoza Arsenal na Jürgen Klopp wa Liverpool bashyamiranye mu gice cya mbere
Abatoza bombi bahawe amakarita y'umuhondo kubera gushyamirana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .