AgDF: Ibihe by’ingenzi byaranze umukino Rayon Sports yatsinzemo Police FC (Amafoto)

Yanditswe na IGIHE
Kuya 10 Nzeri 2017 saa 09:55
Yasuwe :
0 0

Kuri uyu wa Gatandatu, tariki ya 9 Nzeri 2017, nibwo irushanwa ry’Agaciro Development Fund ryatangijwe ku mugaragaro, aho amakipe ane yabaye aya mbere muri Shampiyona y’umwaka ushize yinjiye mu rugamba rwo guhatanira igikombe gifite agaciro ka miliyoni eshatu.

Iri rushanwa rizakinirwa kuri Stade Amahoro i Remera, ryatangijwe n’umukino wahuje APR FC na AS Kigali warangiye Ikipe y’Ingabo itsinze iy’Abanyamujyi ibitego 2-0 bya Maxime Sekamana na Issa Bigirimana.

Nyuma yawo Rayon Sports ifite igikombe cy’umwaka ushize na Police FC yasoje ku mwanya wa kabiri nabo bahise bacakirana mu mukino watangiye amakipe yombi akinira hagati cyane ariko acunganwa yirinda ko hari iyaca indi mu rihumye ikayinjiza igitego.

Umukino wakinwe imvura iri kujojoba mu kirere cya Kigali, igice cya mbere kigiye kurangira umuzamu wa Police FC, Nzarora Marcel, yagize ikibazo ahita asimburwa na Bwanakweli Emmanuel.

Amakipe yombi yarangije iminota 45 anganya 0-0 mbere y’uko mu cya kabiri Rayon Sports iza yiminjiyemo agafu. Police FC yakomeje kotswa igitutu yaje kwinjizwa igitego cyatsinzwe na myugariro Mugabo Gabriel ku mupira wari uvuye muri koruneli yatewe na Kwizera Pierrot ku munota wa 70 ari nacyo rukumbi cyatandukanyije impande zombi.

Mu bihembo, amakipe yitabiriye iri rushanwa yagenewe harimo miliyoni eshatu zo gutegura imikino uko ari itatu; izaryegukana ikazahabwa izindi eshatu, iya kabiri ikazabona miliyoni ebyiri naho iya gatatu ikazatahana miliyoni imwe bivuze ko amakipe azasangira miliyoni 18 hagati yayo.

Uretse amakipe, hazanahembwa umukinnyi mwiza w’irushanwa, umukinnyi watsinze ibitego byinshi, umukinnyi ukiri muto wigaragaje kurusha abandi ndetse n’umuzamu mwiza buri umwe akazahabwa ibihumbi 150 by’amafaranga y’u Rwanda.

Amafaranga azinjira ku bibuga azashyirwa mu “Agaciro Development Fund”.

Rayon Sports niyo yegukanye irushanwa ry’Agaciro ku nshuro ya mbere, mu gihe AS Kigali ifite igikombe giheruka mu 2015.

Uko indi mikino yose izabera kuri stade Amahoro iteganyijwe:

Tariki 13 Nzeri 2017

- As Kigali vs Rayon Sports 13:00”
- APR FC vs Police 15:30”

Tariki 16 Nzeri 2017

- Police vs As Kigali 13:00”
- Rayon Sports vs APR FC 15:30”

Isaie Songa wa Police FC ahanganye n'abakinnyi ba Rayon Sports barimo Muhire Kevin na Caleb (wambaye nimero 7)
Umurundi ukinira Rayon Sports, Caleb Bonfils Bimenyimana ahanganye na Iradukunda Bertrand
Minisitiri w'Ingabo, Gen. James Kabarebe
Minisitiri w'Ubucuruzi n'Inganda, Vincent Munyeshyaka
Yannick Mukunzi yagaragaye bwa mbere mu mwambaro wa Rayon Sports mu mukino ukomeye
Mukunzi Yannick wahoze akinira APR FC ahanganye na Mushimiyimana Mohammed wa Police FC hagati mu kibuga
Karekezi Olivier utoza Rayon Sports (wambaye ishati yera) na Seninga Innocent wa Police FC batanga inama ku bakinnyi
Abafana ba Rayon Sports baje bitwaje igikombe
Abayobozi batandukanye barimo Gacinya Denis uyobora Rayon Sports (uwa kabiri ibumoso) bareba umukino
Perezida w'Ishyirahamwe ry'Umupira w'Amaguru mu Rwanda (FERWAFA), Nzamwita Vincent De Gaulle
Manzi Thierry yacenze Isaie Songa, ahita agwa hasi
Manzi Thierry ni umwe muri ba myugariro ngenderwaho muri Rayon Sports
Muhire Kevin agerageza gucenga Twagizimana Fabrice
Abafana ba Rayon Sports bari mu bicu nk'ibisanzwe
Mugabo Gabriel watsinze igitego, Djabel Manishimwe (ibumoso) na Caleb Bonfils Bimenyimana bishimira intsinzi
Abakinnyi ba Rayon Sports bari mu byishimo by'ikirenga
Ngenzahimana Bosco 'Rwarutabura' (ufite vuvuzela mu ntoki) werekeje muri AS Kigali yarebaga umukino w'ikipe yihebeye kuva kera
Karekezi Olivier yatangiye irushanwa ry'Agaciro yitwara neza
Abakinnyi n'abatoza ba Rayon Sports basuhuza abafana nyuma y'umukino

Amafoto: Mazimpaka Jean Pierre


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza