Afurika y’Epfo yaciye amarenga yo kutazakira CAN ya 2019

Yanditswe na Ngabo Roben
Kuya 7 Mutarama 2019 saa 09:53
Yasuwe :
0 0

Afurika y’Epfo yifuzaga kwakira igikombe cya Afurika cya 2019 (CAN 2019), ishobora gukuramo akayo karenge, ni mu gihe habura amezi atandatu gusa ngo kibe.

Iri rushanwa ntirirabona igihugu kiryakira nyuma y’uko Cameroun yari yarabyemerewe muri 2014 itashoboye kuzuza birimo ibikorwa remezo n’umutekano bigatuma iryamburwa.

Umuyobozi w’ishyirahamwe ry’umupira w’amaguru muri Afurika y’Epfo, ‘SAFA’, Dr Danny Jordaan, yavuze ko nyuma y’uyu mwanzuro CAF yabasabye kwakira iri rushanwa.

Mu nama y’inteko rusange ya SAFA, Dr Jordaan yavuze ko bemeye kwakira iri rushanwa ritwara igihugu cyaryakiriye hafi miliyoni 10 z’amadolari.

Gusa yavuze ko atavuganye n’ubuyobozi bukuru bw’igihugu kandi nta bushobozi SAFA ifite bwo gutegura irushanwa ryose nta nkunga ya Leta.

Byavugwaga ko Afurika y’Epfo na Misiri aribyo bihugu bihabwa amahirwe yo gutoranywamo aho iki gikombe kizabera, ariko minisitiri w’imikino muri Afurika y’Epfo, Tokozile Xasa, yemeje ko ibyo gushora amafaranga mu gutegura iri rushanwa batabikozwa.

Yagize ati: “Ntabwo ari twe twabisabye. Birumvikana neza ko ari CAF yabidusabye, ni ahayo rero ho kubitegura.”

Uyu mwanzuro wahaye amahirwe menshi igihugu cya Misiri kuko umwanzuro wa nyuma wa CAF uzatangazwa kuri uyu wa Kabiri tariki 8 Mutarama 2019 mu muhango wo guhemba umukinnyi wahize abandi muri Afurika uzabera i Dakar muri Sénégal.

Mu myanzuro biteganyijwe ko izatangazwa muri uyu muhango harimo no kuba igihugu cya Cameroun gishobora gushumbushwa kwakira igikombe cya Afurika 2023 kuko Guinée-Conakry yari yaracyemerewe yemeye guhindurirwa ifata igikombe cya Afurika cya 2025.

Afurika y'Epfo ifite ibikorwa remezo birimo stade ya Soccer City yakiriye umukino wa nyuma w'igikombe cy'isi 2010 ariko ngo ntiyiteguye gushora mu kwakira igikombe cya Afurika
Ibibazo by'amikoro bikomeje gutuma ibihugu byifuzaga kwakira igikombe cya Afurika bihindura gahunda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza