Abatoza 12 b’Abanyarwanda bahawe impamyabushobozi A za CAF, batanu barasibira

Yanditswe na Manzi Rema Jules
Kuya 20 Werurwe 2017 saa 05:49
Yasuwe :
0 0

Ku nshuro ya mbere u Rwanda rwagize abatoza bafite impamyabushobozi y’icyiciro cya A y’Impuzamashyirahamwe y’umupira w’amaguru muri Afurika, CAF zahawe abagera kuri 12 na ho batanu batsinzwe ibizami barasibira.

Abatoza bahawe izi mpamyabushobozi barimo Bizimana Abdou “Bekeni”utoza Virunga FC yo muri Congo Kinshasa, Bisengimana Justin wungirije muri Police FC, Habimana Sosthène utoza Musanze FC, Mashami Vincent utoza Bugesera FC, Mbarushimana Abdou wa AS Muhanga, Cassa Mbungo André wa Sunrise FC, Nshimiyimana Eric wa AS Kigali, Okoko Godefroid wa Gicumbi FC, Bizimana Ally na Kayiranga Jean Baptiste badafite amakipe, Rwasamanzi Yves wungirije muri APR FC kimwe na Seninga Innocent utoza Police FC.

Abatoza batabashije gutsinda ibizamini basabwe kuzabisubiramo barimo Hitimana Thierry, Gatera Alphonse, Ruremesha Emmanuel, Sogonya Hamisi Kishi na Gatera Moussa.

Umuyobozi w’Ishyirahamwe ry’umupira w’amaguru mu Rwanda, Ferwafa, Nzamwita Vincent de Gaulle yavuze ko hari ubwo yajyaga aganira n’abayobozi b’imikino mu bindi bihugu akagira isoni zo kuvuga ko u Rwanda nta mutoza ufite impamyabushobozi ya A ya CAF ariko kuri ubu gikemutse ahubwo hasigaye gushyira mu bikorwa ibyo bize bakazamura urwego rw’umupira mu gihugu.

Yagize ati “Iki ni kimwe mu bikorwa twari twarifuje kenshi. Hari ubwo najyaga nganira n’abandi bayobozi mu bindi bihugu bakambaza bati mu Rwanda mufite abatoza bangahe bafite license A nkagira isoni ariko ubu nzajya mbirataho.”

Umuyobozi w’imikino muri MINISPOC, Bugingo Emmanuel we yaharutse cyane ku kwibutsa aba batoza gukora ibishoboka byose bakazamura umupira ariko yongera kubihanangiriza cyane ku bibazo by’ikoreshwa ry’amarozi rikunze kuvugwa mu mupira.

Ati “U Rwanda rwamenyekanye ku Isi hose atari ukubera umupira w’amaguru wateye imbere cyane ahubwo kubera umuco mubi w’ikoreshwa ry’amarozi . Byaba bibabaje twumvuse ngo umwe muri mwebwe yaraye mu irimbi cyangwa abakinnyi be bazanye udupfunyika mu kibuga. Ngira ngo isura twafashe hano ni uko twiteze impanduka, kandi nta mukinnnyi wakora amafuti nk’ayo atabishyigikiwemo n’umutoza we.”

Cassa Mbungo Andre wavuze mu mwanya wa bagenzi be yashimiye Ferwafa na Minispoc ubufasha bagiye babaha n’uko babahora hafi ariko anasangiza bagenzi be ubunarariboye yakuye muri Kenya ubwo yari yagiye gusaba akazi muri Bandari FC bikanga akaba yabasabye ko niba bashaka gutera imbere bashyira hamwe bakajya bafashanya aho gutatanya imbaraga.

Muri uyu muhango ni na bwo byari biteganyijwe ko Ferwafa yerekana umutoza mukuru w’Amavubi, Umudage Antoine Hey ariko Ferwafa yatangaje ko kubera izindi gahunda zatumye ataboneka, icyo gikorwa cyimuriwe kuri uyu wa Kabiri.

Aba batoza bashyikirijwe impano y'imipira na Minispoc nk'ikimenyetso cy'ubutumwa bahawe bwo guteza imbere ruhago
Bizimana Abdou Bekeni uzwiho gusetsa cyane na we yashyikirijwe impamyabushobozi
Byari ibyishimo ku maso y'abatoza babashije gutsinda ibizamini
Cassa Mbungo areba impamyabushobozi A ya CAF yari amaze imyaka itanu akorera
Mashami Vincent (wa kabiri ibumoso)ni we wahawe impamyabushobozi bwa mbere kuko ari na we warushije bagenzi be amanota
Rwasamanzi Yves(ibumoso), Cassa Mbungo Andre, Mashami Vincent na Habimana Sosthene
Umuyobozi wa Siporo muri Minispoc, Bugingo Emmanuel (ibumoso) na Nzamwita Vincent de Gaulle uyobora Ferwafa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza