00:00:00 IGIHE NETWORK KN KINYARWANDA EN ENGLISH FR FRANCAIS

Abataliyani biganje mu bakinnyi 30 bazavamo uwegukana Ballon d’Or ya 2021

Yanditswe na Eric Tony Ukurikiyimfura
Kuya 9 Ukwakira 2021 saa 09:59
Yasuwe :
0 0

U Butaliyani bwatwaye EURO 2020 bufite abakinnyi batanu muri 30 bazatoranywamo utwara Ballon d’Or ya 2021 barimo Jorginho uheruka gutorwa nk’umukinnyi mwiza i Burayi.

Lionel Messi watwaye iki gihembo mu 2019 ndetse akaba ari we umaze kucyegukana inshuro nyinshi (esheshatu) na we ari muri 30 batangajwe n’ikinyamakuru France Football ku wa Gatanu.

Undi mukinnyi uri mu bahabwa amahirwe watoranyijwe ni rutahizamu wa Bayern Munich, Robert Lewandowski, watsinze ibitego byinshi (41) muri shampiyona z’i Burayi ubwo ikipe ye yegukanaga Shampiyona y’u Budage mu mwaka w’imikino wa 2020/21.

Rutahizamu wa Manchester United, Cristiano Ronaldo, umaze kwegukana Ballon d’Or inshuro eshanu na Luka Modrić wa Real Madrid, ni abandi bakinnyi bari kuri uru rutonde baratwaye iki gihembo kuva mu 2008.

Muri rusange, mu bakinnyi 30 batoranyijwe harimo 14 bo muri Premier League mu gihe u Butaliyani bwatwaye EURO 2020 bufitemo batanu.

Igihembo cya Ballon d’Or gitangwa buri mwaka ku mukinnyi witwaye neza kurusha abandi. Nticyatanzwe mu 2020, bwa mbere kuva mu 1956, kubera icyorezo cya COVID-19.

Hagati ya 2010 na 2015, France Football yafatanyije na FIFA mu gutanga iki gihembo, ariko impande zombi zitandukana kuva mu 2016 ubwo Ishyirahamwe ry’Umupira w’Amaguru ku Isi ryashyiragaho igihembo cyaryo.

Uzegukana Ballon d’Or y’uyu mwaka azatangazwa ku wa 29 Ugushyingo 2021 mu muhango uzabera muri Théâtre du Châtelet i Paris.

Abakinnyi 30 ba nyuma batoranywa n’abanditsi ba France Football mu gihe uwegukana igihembo atorwa n’abanyamakuru bose bo ku Isi, buri gihugu gihagarariwe n’umuntu umwe.

Abakinnyi 30 bahataniye Ballon d’Or ya 2021:

  1. Cesar Azpilicueta (Chelsea, Espagne)
  2. Nicolo Barella (Inter Milan, u Butaliyani)
  3. Karim Benzema (Real Madrid, u Bufaransa)
  4. Leonardo Bonucci (Juventus, u Butaliyani)
  5. Kevin de Bruyne (Manchester City, u Bubiligi)
  6. Giorgio Chiellini (Juventus, u Butaliyani)
  7. Ruben Dias (Manchester City, Portugal)
  8. Gianluigi Donnarumma (PSG, u Butaliyani)
  9. Bruno Fernandes (Manchester United, Portugal)
  10. Phil Foden (Manchester City, u Bwongereza)
  11. Erling Braut Haaland (Borussia Dortmund, Norvège)
  12. Jorginho (Chelsea, u Butaliyani)
  13. Harry Kane (Tottenham, u Bwongereza)
  14. N’Golo Kanté (Chelsea, u Bufaransa)
  15. Simon Kjaer (AC Milan, Denmark)
  16. Robert Lewandowski (Bayern Munich, Pologne)
  17. Romelu Lukaku (Chelsea, u Bubiligi)
  18. Riyad Mahrez (Manchester City, Algeria)
  19. Lautaro Martinez (Inter Milan, Argentine)
  20. Kylian Mbappé (PSG, u Bufaransa)
  21. Lionel Messi (PSG, Argentina)
  22. Luka Modric (Real Madrid, Croatia)
  23. Gerard Moreno (Villarreal, Espagne)
  24. Mason Mount (Chelsea, u Bwongereza)
  25. Neymar (PSG, Brésil)
  26. Pedri (Barcelona, Espagne)
  27. Cristiano Ronaldo (Manchester United, Portugal)
  28. Mohamed Salah (Liverpool, Misiri)
  29. Raheem Sterling (Manchester City, u Bwongereza)
  30. Luis Suarez (Atlético Madrid, Uruguay)
Lionel Messi umaze gutwara Ballon d'Or esheshatu, ari muri 30 bazavamo utwara iya 2021
U Butaliyani bwatwaye EURO 2020 bufite abakinnyi batanu muri 30 batangajwe ku wa Gatanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .