Abanyamahanga bakinira Rayon Sports banze guhembwa 30%

Yanditswe na Eric Tony Ukurikiyimfura
Kuya 5 Gashyantare 2021 saa 04:46
Yasuwe :
0 0

Abakinnyi b’abanyamahanga bakinira Rayon Sports bateye utwatsi icyemezo cy’ubuyobozi bw’iyi kipe cyo guhemba abakozi bayo umushahara wa 30% muri ibi bihe nta mikino iri kuba kubera COVID-19.

Ku wa 24 Mutarama 2021, Rayon Sports yabwiye abakinnyi n’abandi bakozi bayo ko muri ibi bihe nta mikino iri kuba, bose bazajya bahabwa 30% by’umushahara.

Iki cyemezo cyafashwe nyuma y’uko Minisiteri ya Siporo ihagaritse Shampiyona y’Icyiciro cya Mbere ku wa 12 Ukuboza, amakipe yose asabwa kureka abakinnyi bakajya mu miryango yabo kubera ubwandu bwa COVID-19 bwagaragaye muri amwe muri yo.

Amakuru IGIHE yamenye ni uko aba bakinnyi b’abanyamahanga batigeze bitabira inama yatangarijwemo icyemezo cyo kugabanya umushahara wabo, yabaye hifashishijwe ikoranabuhanga. Abandi batayitabiriye ni abari mu Ikipe y’Igihugu ’Amavubi’ yakinnye CHAN 2020.

Bamwe mu bakinnyi b’abanyamahanga bavuze ko batemeye icyemezo cy’ubuyobozi cyo kubahemba 30% kuko yaba ari amafaranga make kandi ntacyo yabafasha hamwe n’imiryango yabo.

Umwe yagize ati “30% ntacyo yakora ku bibazo by’imiryango yacu. Mfite umuryango mu gihugu cyanjye, mfite umugore n’umwana, urumva yamara iki? Nanjye ngomba kubaho hano mu Rwanda.”

“Oya, narabyanze. Twahawe igice cy’umushahara wa Ukuboza, uwa Mutarama nturatugeraho none ubuyobozi ngo burashaka kuduha 30%. Twe abanyamahanga twarabyanze, ni make ku buryo yadutunga hamwe n’imiryango yacu.”

Aba bakinnyi barimo abavuga ko hari abagifitiwe amafaranga yasigaye ku yo baguzwe, bavuze ko hari uburyo bafashwa kubaho , aho bari mu Nzove nubwo atari byiza cyane nk’uko babyifuza.

Rayon Sports ifite abanyamahanga bane barimo Umunye-Congo Manace Mutatu, Umunya-Mali Oumar Sidibé, Abanya-Côte d’Ivoire Drissa Dagnogo na Jean Vital Ourega.

Abanyamahanga bakinira Rayon Sports bateye utwatsi icyemezo cyo guhembwa umushahara ungana na 30%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .