00:00:00 IGIHE NETWORK KN KINYARWANDA EN ENGLISH FR FRANCAIS

Abakora Siporo nk’abatarabigize umwuga bari kumwenyura

Yanditswe na Habimana Sadi
Kuya 5 Kamena 2021 saa 01:04
Yasuwe :
0 0

Minisiteri ya Siporo yasohoye amabwiriza mashya agenga isubukurwa ry’ibikorwa bya Siporo n’imikino hirindwa ikwirakwizwa ry’icyorezo cya Covid-19. Igishya kirimo ni uko Siporo zimwe zihuza abantu batabigize umwuga, zakomorewe ariko zishyirirwaho amabwiriza azigenga.

Aya mabwiriza asohotse nyuma y’Ibyemezo by’Inama y’Abaminisitiri yateranye ku wa 31 Gicurasi 2021 ivuya ku ngamba zo gukumira ikwirakwizwa ry’icyorezo cya Covid-19 n’ibijyanye n’isubukurwa ry’ibikorwa bimwe na bimwe bifitiye abaturage akamaro.

Muri aya mabwiriza mashya, arimo ibice bibiri, areba abakora Siporo muri rusange n’andi areba abanyarwanda n’abaturarwanda muri rusange mu kubungabunga ubuzima hirindwa icyorezo cya Covid-19.

Aya mabwiriza arimo ko:

1. Ibikorwa bya Siporo bisanzwe byarakomorewe gusubukurwa, bizakomeza nk’uko byari byarateganyijwe hubahirizwa ingamba zo kwirinda no gukumira ikwirwakwizwa rya Covid-19.

2. Imyitozo ya Siporo Njyarugamba irimo: (Karate, Taekwondo, Boxing, Kung Fu na Fencing) mu matsinda ariko abayikora bategeranye, yemerewe gusubukurwa. Amarushanwa ntiyemewe.

3. Isomo Ngororamubiri na Siporo mu mashuri, riremewe hubahirizwa ingamba zo kwirinda Covid-19.

4. Siporo yo mu matsinda mu mashuri yiga abanyeshuri baba mu kigo, iremewe hubahirizwa ingamba zo kwirinda Covid-19.

5. Imyitozo, imikino n’amatsinda y’abatarabigize umwuga, yemerewe gusubukurwa mu gihe ibereye mu kigo cya Siporo.

Ubuyobozi bw’ikigo bugomba kwandika imyirondoro y’abakigana ndetse n’uburyo bwo kubahiriza ingamba zo kwirinda Covid-19 nko gupima umuriro, gukaraba intoki, kugenzura ko abatari mu myitozo cyangwa abayisoje bambaye neza agapfukamunwa.

Abakina basabwa kuba bambaye neza agapfukamunwa mbere na nyuma y’imyitozo. Mu gihe cy’imyitozo idasaba ingufu nyinshi nabwo ni ngombwa kwambara neza agapfukamunwa.

Ikindi ni uko basabwa kwitwaza imiti yo gusukura intoki mu gihe ukorera Siporo hanze no kuyikoresha igihe cyose bibaye ngombwa.

Guhana intera ya metero ebyiri nabyo ni itegeko mu gihe abantu bagaragaza ibimenyetso birimo inkorora, umuriro, ibicurane no kwitsamura cyo kimwe no kuribwa Umutwe batemerewe gukorera imyitozo ngororamubiri mu ruhame, ahubwo bagomba kwegera inzego z’ubuzima.

Ibigo bifite uko byakira imikino n’imyitozo by’amakipe atarabigize umwuga, bigomba kugaragaza no gushyira mu bikorwa ingamba zo gukumira no kwirinda ikwirakwira rya Covid-19 no kugenura ko zubahirizwa n’ababigana bose.

Ibi bikaba bisobanuye ko buri rwego rwujuje ibisabwa guhera kuri uyu wa 5 Kamena 2021, rwabishyirikiza inzego bireba hanyuma rugasubukura imyitozo rwubahiriza izi ngamba nk’uko amabwiriza mashya abivuga.

Siporo Rusange iremewe ariko hubahirizwa amabwiriza yo kwirinda ikwirakwira rya Covid-19
Amakipe akina nk'atarabigize umwuga, arasabwa kubahiriza amabwiriza ya Minisiteri ya Siporo yo kwirinda Covid-19 ubundi agasubira mu kibuga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .