Abakinnyi bane baguye mu mpanuka y’indege, Liverpool na Arsenal zasezerewe muri FA Cup, igurwa ry’abakinnyi… agezweho mu mikino hanze

Yanditswe na Eric Tony Ukurikiyimfura
Kuya 25 Mutarama 2021 saa 12:51
Yasuwe :
0 0

Urupfu rw’abakinnyi bane b’ikipe ya Palmas yo mu Cyiciro cya Kane muri Brésil, n’umuyobozi wayo, baguye mu mpanuka y’indege ku Cyumweru ruri mu byaranze impera z’icyumweru dusoje mu mikino.

Indege nto yari itwaye abakinnyi ba Palmas ku mukino w’igikombe cy’igihugu muri Brésil ku Cyumweru, byatangajwe ko yakoze impanuka ntihagira urokoka.

Ibinyujije kuri Instagram, iyi kipe yatangaje ko umuyobozi wayo, Lucas Meira n’abakinnyi Lucas Praxedes, Guilherme Noe, Ranule na Marcus Molinari, bose bitabye Imana bazize impanuka.

Umupilote wari utwaye iyi ndege, Wagner, na we yahitanywe n’iyi mpanuka.

Abari muri iyi ndege bari berekeje i Goiania, hafi mu bilometero 800, aho Palmas yari gukinira na Vila Nova kuri uyu wa Mbere muri Copa Verde.

Ishyirahamwe ry’Umupira w’Amaguru muri Brésil ryemeje ko uyu mukino wasubitswe.

Ikinyamakuru Globo Esporte cyatangaje ko indege yaguye nyuma y’iminota mike ihagurutse.

Abakinnyi bane b'ikipe ya Palmas yo muri Brésil baguye mu mpanuka y'indege ku Cyumweru

======================================================

Arsenal na Liverpool zasezerewe muri FA Cup

Arsenal ifite igikombe giheruka cya FA Cup ndetse akaba ari yo imaze kwegukana iri rushanwa inshuro nyinshi, yasezerewe ku wa Gatanu itsinzwe na Southampton igitego 1-0.

Umukino wari utegerejwe na benshi wabaye ku Cyumweru, Manchester United isezerera Liverpool iyitsinze ibitego 3-2, byatumye ikipe y’umutoza Jürgen Klopp ikomeza kugira igitutu cyo kutabona intsinzi muri uyu mwaka.

Tombola y’ijonjora rya gatanu (1/8) yabaye ku Cyumweru, yagaragaje uburyo amakipe azahura mu mikino izaba ku wa Gatatu tariki ya 10 Gashyantare 2021.

Uko tombola yagenze:

  • Swansea vs Manchester City
  • Everton vs Wycombe/Tottenham
  • Barnsley vs Chelsea
  • Wolves vs Southampton
  • Sheff Utd vs Bristol City
  • Manchester United vs West Ham
  • Burnley vs Bournemouth/Crawley
  • Leicester City vs Brighton
Manchester United yasezereye Liverpool muri FA Cup iyitsinze ibitego 3-2
Southampton yasezereye Arsenal ifite igikombe giheruka cya FA Cup

======================================================

Mesut Özil yemejwe nk’umukinnyi wa Fenerbahçe

Bidasubirwaho, Arsenal yatangaje ko Mesut Özil atakiri umukinnyi wayo ahubwo yatanzwe muri Fenerbahce yo muri Turukiya, ku buntu.

Özil w’imyaka 32, yemejwe nk’umukinnyi mushya wa Fenerbahce ku Cyumweru, ashimira abafana ba Arsenal uburyo bamushyigikiye mu myaka irindwi n’igice yabaye mu Bwongereza.

Yagize at “Uburyo nashyigikiwe n’ikipe n’abafana mu gihe cyose nabaye hano byari byiza kandi ni ikintu nzakomeza kuzirikana kandi nishimira.”

“Turi kumwe, twatwaye ibikombe bwa mbere mu myaka myinshi ndetse turema ibyiyumviro bizamara igihe. Abafana ba Arsenal bazampora ku mutima.”

Ku Cyumweru, Özil yafotowe ari mu myitozo ya Fenerbahce, ni nyuma y’uko ubwo yageragayo, yabanje kujya mu kato.

Uyu mukinnyi wakiniye Real Madrid yaherukaga gukinira Arsenal muri Werurwe, ariko ntiyigeze ashyirwa mu bakinnyi bari gukina Premier League na Europa League muri uyu mwaka w’imikino.

Mesut Ozil yerekanywe nk'umukinnyi mushya wa Fenerbahçe yo muri Turukiya
Özil yari amaze imyaka irindwi n'igice muri Arsenal

======================================================

Arsenal ishobora kongeramo Martin Ødegaard

Ibinyamakuru bitandukanye byo mu Bwongereza, byemeje ko Arsenal yamaze kumvikana na Real Madrid ku itirwa rya Martin Ødegaard.

Bivuga ko uyu mukinnyi w’imyaka 22, azerekeza muri Arsenal muri iyi Mutarama, akayikinira kugeza ku mpera z’uyu mwaka w’imikino wa 2021 ndetse ashobora gukorerwa ikizamini cy’ubuzima kuri uyu wa Mbere.

Nubwo Ødegaard yifuzaga gutizwa muri Real Sociedad, ikipe ye yahisemo Arsenal izishyura miliyoni £2.5 yo kumutira.

Nibiramuka birangiye, Martin Ødegaard araza kuba umukinnyi wa kabiri Real Madrid itije Arsenal nyuma ya Dani Ceballos.

Mu gihe isoko ry’igura n’igurisha ry’abakinnyi rifunguye muri uku kwezi, ni byinshi bikomeje kuvugwa mu makipe atandukanye.

Football London yanditse ko Arsenal ishobora kugura Umunya-Argentine Emiliano Buendia w’imyaka 24 mu gihe Manchester United ishobora gutiza Jesse Lingard w’imyaka 28 muri West Ham nk’uko ESPN yabitangaje.

Arsenal ishobora gutizwa Martin Ødegaard
Byitezwe ko Ødegaard w'imyaka 22, akorerwa ikizamini cy'ubuzima kuri uyu wa Mbere i Londres

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .