Abaharanira impinduka muri Ferwafa batanze umukandida uzahatana na De Gaulle mu matora

Yanditswe na Manzi Rema Jules
Kuya 15 Nyakanga 2017 saa 02:46
Yasuwe :
0 0

Ubuyobozi bw’ihuriro rya bamwe mu banyamuryango ba Ferwafa batishimira icyerekezo ruhago y’u Rwanda iganamo ryamaze gutanga Albert Mwanafunzi nk’umukandida uzahangana na Nzamwita Vincent De Gaulle mu matora ateganyijwe muri Nzeri.

Iri tsinda kugeza ubu rigizwe n’abanyamuryango 25 ba Ferwafa bahuriye ku gushaka impinduka mu mupira w’amaguru, ryafashe icyemezo cyo gutanga Mwanafunzi nk’umukandida akaba ari we wenyine uzaba ahanganye na Nzamwita wari usanzwe ayobora Ferwafa.

Mu kiganiro IGIHE yagiranye na Kanamugire Fidel uyobora ikipe ya Heroes yo mu cyiciro cya kabiri akaba n’Umuvugizi w’iri huriro, yatangaje ko Mwanafunzi yatoranyije hagendewe ku bunararibonye afite mu buyobozi bw’umupira no mu nzego za Leta.

Yagize ati “Mwanafunzi Albert ni we twahisemo kuba yazaduhagararira mu matora ya Ferwafa. Ni umuntu ufite inararibonye mu mupira, yari mu buyobozi bwa Ferwafa ku buryo azi byinshi ku mpamvu zituma udatera imbere tukizera ko tuzafatanya kugira ngo bihinduke, Abanyarwanda babone umupira uryoshye bifuza.”

Yakomeje agira ati “Ikindi ni umuntu uzi kubana neza n’abandi ku buryo twizeye ko we atajya mu macakubiri yo gucamo abanyamupira ibice ahubwo azunga n’abari baratandukanye kugira ngo dusenyere umugozi umwe.”

Kanamugire yavuze ko batinze gushyira ahagaragara umukandida kuko bagombaga kwiga ku muntu ukwiriye kandi uzashobora gushyira mu bikorwa gahunda nziza z’ihuriro,ufite ubushake kandi koko ukunda umupira aho kuwushakamo amaramuko.

Mwanafunzi asanzwe ari umuyobozi ushinzwe tekinike muri AS Kigali yari n’umuyobozi ushinzwe amarushanwa muri Ferwafa ku ngoma ya mbere ya Nzamwita gusa akaba yarahisemo gutandukana na we ajya ku ruhande rw’abashaka impinduka.

Gutanga kandidatire byarangiranye n’uyu wa Gatandatu saa 11h00 z’amanywa akanama gashinzwe amatora kakazatangira kwiga ku bakandida kuva tariki 17 kugeza kuri 22 Nyakanga abemerewe bakazatangazwa tariki 8 Kanama mu gihe kwiyamamaza bizatangira kuva tariki 14 Kanama kugeza kuri 9 Nzeri 2017, mbere y’umunsi umwe ngo amatora abe tariki 10 Nzeri.

Abagize itsinda riharanira impinduka muri Ferwafa batanga inyandiko z'umukandida wabo ku bashinzwe akanama ka Ferwafa
Mwanafunzi Albert ni we ugiye guhatana na Nzamwita Vincent Vincent de Gaulle mu matora y'umuyobozi wa Ferwafa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza