Abagabo babiri bafatiwe hafi y’urugo rwa Mesut Özil bituma ataza gukina na Newcastle United

Yanditswe na Eric Tony Ukurikiyimfura
Kuya 11 Kanama 2019 saa 08:27
Yasuwe :
0 0

Abagabo babiri bafatiwe hafi y’inzu y’umukinnyi wa Arsenal, Mesut Özil, aho bakurikiranywe nyuma y’uko uyu mukinnyi yibasiriwe n’amabandi yitwaje ibyuma ubwo yari kumwe na Sead Kolasinac mu kwezi gushize.

Ferhat Ercan wo mu gace ka Highgate na Salaman Ekinci wo muri Tottenham bafatiwe hafi y’urugo rwa Mesut Özil ruri mu Majyaruguru y’Umujyi wa Londres, ku wa Kane.

Kuba baherutse kwibasirwa n’amabandi yitwaje ibyuma mu mpera z’ukwezi gushize, byatumye Mesut Özil na Sead Kolasinac bakurwa mu bakinnyi ba Arsenal bakina na Newcastle united kuri iki Cyumweru kubera ibibazo by’umutekano wabo.

Nk’uko bitangazwa, aba bagabo babiri bafatiwe mu mukwabo wakozwe n’abashinzwe umutekano hanze y’inzu ya Özil.

Polisi yo mu Mujyi wa Londres yatangaje ko ‘aba bagabo babiri bafashwe hakurikijwe ingingo ya 4a mu mategeko arengera abaturage bigendanye n’igikorwa cyabereye mu gace ka Camden ku wa Kane, tariki ya 8 Kanama 2019.”

Ercan na Ekinci, bombi bafite imyaka 27, bazagezwa imbere y’urukiko rwa Highbury tariki ya 6 Nzeri 2019.

Polisi yatangaje ko ibyo bakurikiranyweho ntaho bihuriye n’igikorwa cy’uko Özil aherutse kwibasirwa n’amabandi yitwaje ibyuma.

Mesut Özil w’imyaka 30 na Sead Kolasinac w’imyaka 26, bombi ntabwo bakinnye umukino wa Lyon mu minsi ishize nyuma yo kwibasirwa n’amabandi mu gace ka Golders Green mu mpera za Kanama 2019.

Nyuma y’iki gikorwa, Kolasinac yashyize hanze ifoto ari kumwe na Özil, yongeraho amagambo agira ati” Twizere ko tumeze neza.”

Ku wa Gatanu w’iki cyumweru, Arsenal yavuze ko aba bakinnyi bombi batashyizwe mu bakina na Newcastle kuri iki Cyumweru bitewe n’umutekano wakajijwe ku bufatanye na Polisi ndetse yongeraho ko uw’abakinnyi bayo ari cyo cy’ingenzi.

Arsenal iratangira urugendo rwo guhatanira Igikombe cya Shampiyona y’Icyiciro cya Mbere mu Bwongereza uyu munsi, aho yakirwa na Newcastle United guhera saa 15:00.

Sead Kolasinac na Mesut Özil (iburyo) ntabwo bakina umukino wa Newcastle United kuri iki Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza