00:00:00 IGIHE NETWORK KN KINYARWANDA EN ENGLISH FR FRANCAIS

Abafana ba Liverpool mu Rwanda baremeye batatu bacitse ku icumu rya Jenoside (Amafoto)

Yanditswe na Habimana Sadi
Kuya 21 Kamena 2021 saa 08:29
Yasuwe :
0 0

Biciye mu itsinda ry’abakunzi ba Liverpool mu Rwanda, abantu batatu bacitse ku icumu rya Jenoside yakorewe Abatutsi mu 1994, bo mu Murenge wa Masaka mu Karere ka Kicukiro, borojwe inka.

Ni umuhango wabaye ku Cyumweru tariki ya 20 Kamena 2021, ubanzirizwa no kujya ku Rwibutso rwa Nyanza ya Kicukiro ahashyinguye Abatutsi barenga ibihumbi 96.

Mbere yo kuva ku Rwibutso rwa Nyanza ya Kicukiro, aba bakunzi ba Liverpool babanje gusobanurirwa amateka yarwo n’impamvu hashyinguye abantu benshi kurusha abahiciwe. Basoje igikorwa bashyira indabo ku mva, bafata umunota umwe wo kunamira Abatutsi bazize Jenoside. Batanze kandi ibahasha irimo ubushobozi bwunganira mu bikorwa bitandukanye bihakorerwa.

Mu rwego rwo kwirinda ikwirakwira ry’icyorezo cya Covid-19, abafana ba Liverpool mu Rwanda bahagarariwe n’abiganjemo Komite Nyobozi yabo ndetse n’undi umwe utari mu buyobozi.

Nyuma yo kuva ku Rwibutso rwa Nyanza ya Kicukiro, bahise berekeza mu Murenge wa Masaka, Akagari ka Cyimo ho mu Karere ka Kicukiro. Aha ni ho baremeye abacitse ku icumu rya Jenoside batatu.

Muri uyu muhango, harimo inzego zitandukanye zari ziyobowe n’Umunyamabanga Nshingwabikorwa w’Umurenge wa Masaka, Gatashya Alexis; Gasana Thèoneste uyobora Njyanama mu Kagari ka Cyimo, uhagarariye Polisi n’abandi.

Uyu muhango wo guha inka abacitse ku icumu rya Jenoside yakorewe Abatutsi mu 1994, wabanjirijwe n’ibiganiro bitandukanye aho buri rwego rwashimye igikorwa cy’indashyikirwa cyakozwe n’aba bakunzi ba Liverpool.

Hakurikiyeho igikorwa cyo guha inka abantu batatu batoranyijwe mu Murenge wa Masaka, hashingiwe ku bababaye kurusha abandi mu bacitse ku icumu rya Jenoside yakorewe Abatutsi mu 1994.

Izi nka uko ari eshatu zikaba zaratanzweho 1.200.000 Frw. Abahawe inka ni Mukagatare Espérance w’imyaka 61, Twiringiyemungu Jean Baptiste w’imyaka 52 na Mbanzamusango Daniel w’imyaka 80.

Nyuma yo guhabwa inka, Mbanzamusango Daniel, yasazwe n’ibyishimo ashimira abatekereje iki gikorwa.

Ati “Rwose ndashimira cyane Leta y’u Rwanda ikomeza kudukangurira kubana neza. Ndashimira cyane kandi aba bana badutekereje bakaduha inka kuko ari ikimenyetso cy’urukundo. Ibyo izamfasha ni byinshi, izampa agafumbire, izampa amata. Nimara kubyara nanjye nzoroza abandi.”

Mukagatare Espérance we yavuze ko yavutse iwabo haba inka, ariko nyuma ya Jenoside yakorewe Abatutsi mu 1994, yasanze zose zarariwe. Ahamya ko kuba yongeye korozwa byamwibukije umuryango we.

Afurika Innocent uhagarariye abafana ba Liverpool mu Rwanda, yavuze ko mbere yo gufana ikipe yo mu mahanga bahuzwa n’ubunyarwanda kandi baba bakwiye kurenga gufana bagafasha abatishoboye n’igihugu cyabo muri rusange.

Ati “Ni igikorwa ngarukamwaka dusanzwe dukora. Tugikora mu rwego rwo kumva ko turi Abanyarwanda kandi tuzi ibyabaye muri iki gihugu, amateka yaranze Jenoside yakorewe Abatutsi mu 1994.”

“Tuzi ko hari abantu bababaye kandi ikipe yacu itwibutsa ko tutagomba gusa kureba umupira. Ntitugomba gusa kureba abishimye kuko igitego cyagiyemo, ariko n’abandi bababaye tugomba kubafasha muri bike dufite. N’iyo mpamvu natwe tugomba gufasha Abanyarwanda basizwe iheruheru na Jenoside yakorewe Abatutsi mu 1994.“

Afurika yakomeje avuga ko nta handi aba bakunzi ba Liverpool bakura ubushobozi, uretse ko bisaka buri wese agatanga icyo afite bakegeranya icyabonetse bakagisangira n’abababaye.

Umunyamabanga Nshingabwikorwa w’Umurenge wa Masaka, Segatashya Alexis, yashimiye abakunzi ba Liverpool abasaba gusobanurira abandi ibyiza byo gufasha abatishoboye.

Ati “Ndagira ngo mbanze nshimire abafana ba Liverpool mu Rwanda bagize igitekerezo cyo kuremera imiryango yasizwe iheruheru na Jenoside yakorewe Abatutsi mu 1994. Nk’ubuyobozi, tubifazaho kubaba hafi no kwifatanya nabo mu kababaro baba bafite.“

“Ibi bibatera imbaraga bakumva ko batari bonyine. Ibi binazamura imibereho myiza y’abaturage kuko amata ari ikimenyetso gikomeye mu Banyarwanda.“

Umwe mu bakunzi ba Liverpool yasabye bagenzi be bakunda andi makipe, ko bakwiye gutekereza uko bajya bakora ibikorwa byubaka Igihugu no gufasha abatishoboye.

Mu 2019, aba bakunzi ba Liverpool bari batanze Ubwisungane mu Kwivuza ku miryango 200 yo mu Murenge wa Masaka. Bamaze gukora ibikorwa bitandukanye by’urukundo mu Majyepfo, Iburasirazuba, Amajyaruguru no mu Mujyi wa Kigali. Ni ibikorwa bakora mu minsi ijana yo Kwibuka Jenoside yakorewe Abatutsi mu 1994.

Ubwo bari ku Rwibutso rwa Nyanza-Kicukiro
Bashyize indabo ahashyinguye Abatutsi bazize Jenoside yakorewe Abatutsi mu 1994
Habanje gufatwa umunota umwe wo Kwibuka Abatutsi bazize Jenoside yakorewe Abatutsi mu 1994
Mbere yo gusohoka mu Rwibutso rwa Nyanza ya Kicukiro, babanje kwandika ubutumwa mu gitabo cyabugenewe
Ubwo abakunzi ba Liverpool bageraga mu Kagari ka Cyimo ahabereye umuhango wo gutanga inka
Mukagatare Espérance (uri hagati), uwari uhagarariye Twiringiyemungu Jean Baptiste (ubanza iburyo), Mbanzamusango Daniel (ubanza ibumoso)
Mbanzamusango Daniel wacitse ku icumu rya Jenoside yakorewe Abatutsi mu 1994, yashimiye cyane abamuhaye inka
Umunyamabanga Nshingwabikorwa w'Umurenge wa Masaka, Gatashya Alexis, yashimiye abakunzi ba Liverpool mu Rwanda batekereje ku baturage bo muri uyu Murenge
Gasana Théoneste uyobora Njyanama mu Kagari ka Cyimo
Afurika Innocent uyobora abafana ba Liverpool mu Rwanda, avuga ko gufasha bidasaba kugira byinshi
Nkotanyi ari muri Komite Nyobozi y'abakunzi ba Liverpool mu Rwanda
Inka zahawe abacitse ku icumu rya Jenoside yakorewe Abatutsi mu 1994
Mukagatare Espérance ubwo yahabwaga inka
Inka yahawe Mbanzamusango Daniel
Abaremewe bafata ifoto y'urwibutso n'abayobozi
Mbanzamusango Daniel wacitse ku icumu rya Jenoside yakorewe Abatutsi mu 1994, yashimiye cyane abamuhaye inka
Mbanzamusango Daniel wacitse ku icumu rya Jenoside yakorewe Abatutsi mu 1994, ubwo yahabwaga inka
Abaremewe bafatanye ifoto y'urwibutso n'abakunzi ba Liverpool mu Rwanda
Uhagarariye Polisi mu Murenge wa Masaka nawe yari ari muri uyu muhango
Ni igikorwa cyabereye mu Kagari ka Cyimo
Mbanzamusango Daniel yasazwe n'ibyishimo maze atera icyivugo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .